2
Yona rueq Vjux Thoz tueq
1 Ngaq wuk mungx nuex baunglaung Yona rueq Yehowa piq Tishox kox wawc vjux thoz tueq kuex:
2 “O Yehowa lex, ngaz vgvrx rvhumc vtaungx ningkhvnc nuex mnoz gvl vphaungx,
mnoz rueq tvralc koq.
Wulumx mungx maq ngaz muex romc kuy tvkoc,
guyc sez phaungx tueq, mnoz rueq ngvy guyc tay toq.
3 Mnoz rueq ngaz kuex thuiuz hvlc svmuktvrax phawx rawz nuex
httuiuc laz tvdvy tuip gay phux,
kvyuq yuix htenc rueq ngaz kuex tvroz tuimx wvnc vtueq,
m-yuix daungx yungx tul htenc kuex ngvy htauk maq kuix wvnc wuez tueq.
4 Ngaz kuex mkhaungkac wawc yurc gay rvhumc tauk ningkhvnc
nuex, mnoz vsawc Shomc Yuimx kuex mkaq muinz khiz
shaungx rvmuq shex ngoz tueq tvmaung wvnc tauk.
5 Yuix rueq ngaz kuex luimz wvnc vtueq, ngvy thuiuzthuic shup muinz mvy muq shex;
svmuktvrax yuix rueq ngaz kuex luimz wvnc vtueq,
svmuktvrax photwot rueq ngvy khux nuex menc laq wuez phuex.
6 Ngaz kuex kanx yaz nuex httuiuc kaz vtueq, wulumx mungx wawc
kaluix htenc pattup pat-sac shauk gay tueq.
Yuq muinz, O Yehowa ngvy Tishox lex, ngvy thuiuzthuic
kuex thuiuz hvlc mungx wawc palc wvnc yek phux.
7 Ngvy thuiuzthuic pat wvnc vtuex shex ngoc juing nuex,
O Yehowa lex, ngaz rueq mnoz kox wawc vjux thoz tauk,
mnoz rueq ngvy thuic bomc kuex vsawc Shomc Yuimx maq tay toq.
8 Khuec guez yac yuimx htenc nawk palx jix hez rueq
mhtauk nuex tvmtuing httaz lvmz lauk tuip gay wuez tueq.
9 Yuq muinz ngaz kuex mnoz muex shix ngoyx tvtsvmc shaungx;
ngaz rueq mnoz muex shomc nawk kuy shomc kuq vtueq,
ngaz rueq bomkhvmc taq tauk rulc rv-ngvlc shuimx shaungx.
Palc daungc wvnc lvmz kuex
Yehowa kox wawc vkaz rvtueq!” ngoz tueq thoz tueq.
10 Kvruex yimaq Yehowa rueq ngaq kuiux muex nvr koq tueq ngaq kuiux rueq Yona kuex taungkawx htauk nuex phaay gay waung tueq.