4
Kungkhux Lauk Rvjungc Rv-phvnc
Eliphaza
1-2 Yoba lex, ngaz mnoz rulc rvbomc ruiux yuq mthuinz lac bac tvnx?
ngaz kuex kuiyqshuik dvyx httax lot mauk.
3 Mnoz rueq miq paunghvlc muex tvluing tvtharc kuq wvnc toq,
hungc vlaungc vnulx yauk htenc kuex tvhungc kuq wvnc toq.
4 Miq vshiz shiz kvhtuip rul vtueq, hungc vlaungc vnulx hunnyex ruiux yuq,
piq kuex htuiz daungx tvkoc mkvjaz htenc maq hungc vlaungc kuq toq.
5 Majuiuc kuex mnoz kuilc daz jamjaux rvhumc jauz shex rvtueq,
mnoz rueq kvruex rvhumc khvmc muq tanc khvnc tvmaung vshuiux.
6 Mnoz rueq Tishox muex nawk palx vshuiux,
mrullungx kuex mvrax tvgurc juing vguez rvtueq;
kvkhoc rvtueq mnoz nuex kvmluimx thuinz tvluimc juing httax tuex.
7 Majuiuc tvmaung yek shuiuz. Tsuingrux miq washiz kuex,
kuilc daz jamjaux rvhumc wvnc tueq haz? Ngaz muex tvkhic koq.
8 Ngarvyx kuex htuz vtueq vlix ikhoc layx vbac wuinc jix
miqsaz htenc kuex ngaz rueq khiz tauk;
majuiuc kuex layx vbac nuiyc ngarvyx kuex tsuingshiq rueq yut wvnc tueq.
9 Tishox kuex vthuinz khaq vtueq tsuingshiq kuex
raunghtiq raungguil rueq ikhoc tvbac gay tueq,
10 Layx vbac kuex hangsic ikhoc huk yaq,
yuq muinz Tishox rueq kvruex hez kuex tvthauk gay ruiux,
tsuinghez wac htenc kuex tv-ngawk buiuq gay tueq.
11 Yvmx muinz kauk lvp muq hangsic hez ikhoc,
tsuingshiq thueyc wvnc vtueq tsuingshiq sahez lotlaz rv-phvlc kaz wvnc wuez tueq.
12 Lauk shiz bomjungc vshiz shiz kuex httuiuc tueq,
kvkhoc rvtueq kvruex kuex pinhtumc kuiyqshuik maq httuiuc kaz vtueq,
ngaz rueq kvruex phuinz shiz rac tay lvp mauk rv-khvmz.
13 Kvruex kuex ngaz kvtsoalx nuex maung rueq htuing yaq ikhoc tvkuilc daz phuex.Ref 4:13 Yob 33:15
14 Ngaz kuex hiyaz kawc yawc vtueq kv-khuirc dvndvnz rvtauk;
ngvy shauk pumz kuex hiyaz kawc yawc vtueq kvbuilc kaz tueq.
15 Raungguil guil kuiyq rueq ngvy htvlx phawc nuex tuingc wvnc phuex tueq,
kawc yawc vtueq ngvy gvnz nuex sungx thuey waungc tueq.
16 Ngaz rueq kvruex yuq phvnx shishiz jvp yaq kuex khiz vtueq, vwangc rvtauk,
yuq muinz kvruex yvmx wuez raz tvnx jungx lot mauk.
Kvruex yimaq suinglix lix httax yaq mungx wawc tvruingc phvnx shiz tay tauk:
17 “Tishox khaungkac nuex ukhaq lac tsuingrux yaq nguinx?
Ukhaq lac Tvdungc Sungc jix waz vpiq khaungkac nuex sawc nawc lot tvnx?
18 Tishox kuex vpiq raungsaz nvrc waz hez muex doc muinz kvmx muq;
vpiq rueq vkamx waz hez nuex doc muinz vyaq mvrax humc yaq.
19 Vpiq rueq ghaq gvmlawx maq tvdung shec tueq,
bokkhuyx wawc tvhungx ruiux vyung kuiux ikhoc
tvbunx gay yaq miqsaz muex kvmx tuex ngoz tueq haz tvmaung vshuiux?
20 Miqsaz kuex raungnvp kox nuex tvraungx httax vtix,
yuq muinz raungx max yac nuex yvmx muinz jungphvnx muq maq thueyc wvnc mvy yaq.
21 Miqsaz rueq lvp yaq phvnx ruip saz kuex vlvmc wvnc rvhumc wuez vtix;
taksux tharc rax yek yaq nuex,
miqsaz kuex moz thueyc kay dvyx,” ngoz tueq.