23
Yoba
1-2 Ngaz kuex majuiuc nuex httuiuc lac Tishox muex khawx lvlx vtueq kvbot vtaungx;
ngaz thuirthux vtaungx kuex tvthauk lot mauk.
3 Vpiq kuex mruex baung nuex lac humc lvp shaungx,
vpiq httax yaq baung kvyuq yvmx khoc maq kay juing lac
ngaz rueq tuiuz roc thvt vshaungx.
4 Ngaz rueq ngvy khoc kuex vpiq khaungkac nuex jungphvnx vtueq,
ngvy htumc wawc rv-ngoc rv-ngac bomc lotlaz kuex taq gay shuex.
5 Ngaz muex vpiq rueq yvmx khoc lac ngoz phvnx nuiyc
yvmx khoc lac tvralc phvnx kuex ngaz rueq tuiuz roc vshaungx.
6 Tishox rueq ngaz khawx lvlx phuex nuex vpiq hungc vlaungc lotlaz haz shuimx shvnx?
Kvkhoc rvmuq, ngaz rueq jungx shaungx kuex vpiq rueq tay kuq phuex.
7 Ngaz kuex kenx vtsuing vrux miq ningkhvnc nuex Tishox rulc rvjungc phvnc mvy yaq;
vpiq rueq ngaz ngoc mvrax kop muq waz ngoz tueq
lauk shiz lvmx maq dvyx tvdup suik ngoz shuex.
8 Ngaz rueq shaldungc kox nuex thuiyx tauk, yuq muinz Tishox kuex kvyuq httax muq;
shalx nyuip kox nuex thuiyx kox muinz ngaz rueq vpiq kuex humc mauk.
9 Tishox kuex ghaqkhux kox nuiyc ghaqyaz kox nuex yauk shuimx yaq,
yuq muinz ngaz rueq vpiq kuex khiz mauk.
10 Yuq muinz ngaz khuemx taungx khamz tenc ruip rawx Tishox rueq tuiuz yaq;
vpiq rueq ngaz kuex taruiyx ruiux yuq, ngaz vsawc kuex vpiq rueq khiz lvp shuex.
11 Ngaz kuex vpiq rueq thvl phuex nuex tvmtuing maq phvnx vshaungx;
ngaz kuex mkaq muinz lvmx tvmoz gay shaungx rvmuq.
12 Tishox rueq nvr yaq kuex ngaz rueq mkaq muinz shuimx vshaungx;
ngvy thuinroc lvmx phvnx mauk, vpiq thuinroc lvmx dvyx phvnx vshaungx.
13 Vpiq kuex pattup kvlayc kaz muq. Uraq muinz vpiq kuex khawx lvlx lot muq,
vpiq rueq shuimx roc vtueq shuimx yaq kuex tvthauk lot yaq rvmuq.
14 Vpiq rueq ngvy tvkoc dvnc taq yaq lvmz kuex tvhungx shuex;
kvkhoc dvnc yaq yauk shuimc kuex vpiq rueq shuimc wvnc tueq
paunghvlc wawc phvnx shiz shauk doc ningkhvnc nuex,
15 vpiq khaungkac nuex ngaz hiyaz kv-khuirc vtaungx.
16-17 Tvphaungc Tvsuip Tishox rueq ngvy khvmc thuinz kuex tvbac gay tueq.
Raungnyauk ningkhvnc nuex ngvy muik htenc maq khiz mauk yuq muinz,
ngaz muex tvhiz sungx yaq kuex raungnyauk rueq rvmuq, Tishox dvyx rvtueq.