21
Yoba
1-2 Ngaz rueq jungx vshaungx kuex tay shuinz;
ngaz rueq sitenc yatenc lvp tvkoc vtanc khvnc vkhangx lvp juing dvyx thoz vphaungx.
Ngaz muex kvjaz jungc vkhangx kuq kuit,
ngaz rueq jungc lot yix jix, nuimhez rueq nueykuic roc ruiux nueykuic kuit.
 
Ngaz rv-ngoc ngac vtaungx kuex vthueyc rvyaq miqsaz htenc rulc rvmuq;
ngaz nuex nanx lot mauk hakhix vhvlx muinz httax yaq.
Ngaz vruex lawc kuit. Nuimhez kuex suinglix lix maq
wangc tvkawc yawc kvdoc muinz hungx tuex shex rvmuq haz?
Ngaz nuex yvmx lac yaungx wvnc tvnx lvmz kuex ngaz rueq tvmaung tauk vtueq,
ngaz kuex thuinbac nulx rvhumc ruiux, hiyaz kv-khuirc vtueq kvbuilc vtaungx.
 
Tishox rueq layx bac miqsaz htenc kuex yvmx ngoz tueq lac
thuiuzthuic tvraungx taq ruiux,
tsuingshiq kuex rullungx sung laz tvrungx wanx yaq nguinx?
Tsuingshiq rueq suiuz vsaz htenc kuex lvp wuez vtueq,
kvruex htenc peluz yungx wvnc laz tsuingshiq kuex bvmc lawc wuez yaq.
Tishox rueq tsuingshiq yuimx htenc kvyuq kuilc daz kuex tvhttuiuc kuq muq;
tsuinghez kuex mkaq muinz hisungx kv-khuirc vtueq httax wuez yaq rvmuq.
10 Rvtueq, tsuingshiq khelx vmanx htenc pux paung wvnc vtueq,
vgvrx vtsvrx vguez maq vsaz nyuiuz wuez yaq.
11 Tsuingshiq sahez kuex khelbuenx sahez ikhoc dawk yuz wuez yaq,
12 torox nuiyc supseng tvthuiz ruiux shix ngoyx vtueq wvnuemz wuez yaq.
13 Tsuingshiq kuex nomic maq httax lvp wuez vtueq,
vkuilc vdaz muinz vguez maq dvyx thueyc wvnc wuez yaq.
 
14 Layx bac jix bix rueq miqmac vshiz lauk lauk httaz tvkoc Tishox muex jungx wuez yaq;
tsuingshiq kuex vpiq rueq yvmx khoc wuez tvraungx tvhttax roc yaq nguinx
tsuingshiq rueq tuiuz muq.
15 Tishox muex nawk palx tvkoc rac muq ngoz tueq muinz,
vpiq kox wawc vjux thoz ruiux yvmx vjux muinz vguez
ngoz tueq tsuingshiq rueq tvmaung wuez yaq.
16 Tsuingshiq kuex tsuingshiq hungc vlaungc maq dvyx lotlaungc
wvnc yaq ngoz tueq jungx wuez yaq,
yuq muinz tsuingshiq rueq tv-maung yaq lvmz kuex ngaz rueq lvp lot mauk.
 
17 Layx bac miqsaz raungwuic kuex mkaq muinz thuik muq haz?
Tsuingshiq wawc vshiz shiz kuex vkuilc vdaz mkaq muinz rvhumc wuez yaq rvmuq haz?
Tishox kuex layx bac jix muex thuinz tvkhaq vtueq muinz,
18 raungguil rueq pvnc wvnc yaq tsvmkuiz ikhoc muinz,
raungguil rueq pvnc wvnc rv-humc yaq bokkhuyx ikhoc muinz
tsuingshiq muex murx tvgurc shuex rvmuq haz?
 
19 Tishox rueq vwaz mvrax ning-khvnc nuex vsaz muex murx
tvgurc yaq ngoz tueq nuimshiq rueq ngoz vshuinx.
Kvkhoc rvmuq! Tishox rueq mvrax yaq jix waz muex dvyx murx mtvgurc shueq;
tsuingshiq rueq shuimx wvnc tueq mvrax ningkhvnc nuex
kvruex murx tvgurc shuex lvmz kuex piq muex mtvkhic shueq.
20 Mvrax yaq jix bix kuex tsuingshiq rueq murx m-gurx shueq;
Tvphaungc Tvsuip Tishox thuin-khvy kuex mrvhumc kueq.
21 Naungshiq rullungx htenc lvy wvnc tuex nuex,
naungshiq sahez kokez lvp laz naungshiq rueq vsuing haz tvguing gawx lvp shix?
22 Johvlc htauk wawc hez muex phoc kuy jix Tishox kuex
uraq lac tvtharc lot shvnx?
 
23-24 Tsuingshiq thueyc wvnc tuex raungnuiyq nuex httuiuc laz
miq wvyvmc kuex vhvlx gvn-httuingc httax yaq;
tsuingshiq kuex vpiauc vliauc vkoz vkez maq thueyc wvnc yaq,
tsuingshiq shauk gvnz kuex phuiuz vsvy vhvlx ningkhvnc nuex vshvmx hvlx wuez yaq.
25 Wvyvmc kuex vpiauc vliauc lvmx lvp wuez yaq rvmuq;
tsuingshiq kuex thuinz vmungx nuex vkhuip vkhaq maq httax
vtueq dvyx thueyc wvnc wuez vtuex.
26 Yuq muinz lotlaz kuex vthueyc jvnc raz tueq luip gay rvhumc yaq;
tsuingshiq lotlaz kuex vyung rueq puingc wvnc tueq.
 
27 Nuimshiq nuex yarc tvyez thuinz httax yaq kuex ngaz rueq tuiuz yaq.
28 Nuimshiq rueq, “Layx bac yauk shuimc jix vyungx vloayc jix
yuimx vtap kuex majuiuc mbaung nuex lac?” ngoz tueq wiz wuez yaq.
 
29 Nuimshiq kuex vkhuemc jix miqsaz rulc rvbomc muit doc haz?
tsuingshiq rueq tvyez jungx yaq thaungc kuex nuimshiq rueq tay muit haz?
30 Tishox kuex thuinkhaq vtueq murx tvgurc shuex kvruex raungnuiyq,
miqyaq waz kuex mkaq muinz rungwanx lvp yaq.
31 Layx bac jix hez muex uraq muinz mvrax tvgurc khvmc muq,
piq rueq shuimx wvnc tueq lotlaz tvkoc nuex piq muex tvyez jix ukhaq muinz vguez.
32 Luip ruiuz khux htenc kuex vhvlx waq bvmc yaq luip khurx nuex
tsuingshiq kuex pix laq koq tueq,
33 miq vhingc maq maungx luip moalx nuex phvnx naungx wuez tueq,
yvnc vghaq htenc muinz tsuing-shiq shauk vgvnz htauk nuex piauc hvlc woalc yaq.
 
34 Kvkhoc rvyruiux! Nuimshiq rueq ngaz muex khuec guez kvjaz
htenc maq ngaz muex sitenc yatenc vphuinx nyix!
Nuimshiq rueq tvralc shuinx ruip rawx kuex vrot vkaq kvjaz dvyx rvtueq!