13
1-2 Mnoz rueq jungx vshuiux phvnx ruip saz kuex,
ngaz rueq kungkhux nuex tay wvnc tauk shex.
Kvruex lotlaz kuex ngaz rueq tuiuz yaq;
mnoz rueq taungx vshuiux tanc khvnc shuimx vshuiux kuex ngaz rueq tuiuz yaq.
Ngaz kuex nuimshiq khung nuex httax vtaungx rvmuq.
3 Yuq muinz ngaz kuex nuimshiq rulc rv-khawc lvlc vtaungx rvmuq, Tishox rulc rvtueq;
vpiq rulc dvyx ngvy khac kuex rv-khawc roc vshaungx.
4 Nuimshiq rueq vrot vkaq kvjaz htenc nuiyc
nuimshiq tharc guez lvmz kuex puingc taq vshuinx;
nuimshiq kuex ukhaq muinz tvhvlc laz phemc kuq lot muq dokta bix ikhoc yaungx vtuinx.
5 Yvmx muinz kvjak muit ngoz ruiux kuex nuimshiq taksux tharc httax yaq ngoz tueq
miq washiz shiz rueq tvmaung mvy yaq.
6 Ngvy khuec vkhac jungx vshaungx nuex tay wuez shuinz;
7 Nuimshiq rueq yvmx ngoz tueq lac rot kaq wuez vtuinx?
Nuimshiq rueq jungx vshuinx vrot vkaq kvjaz htenc kuex
Tishox muex vjux httax tuex ngoz tueq haz tvmaung wuez vshuinx?
8 Nuimshiq rueq vpiq kox nuex phoc waz muex haz yaungx vtuinx?
Vpiq khuec vkhac kuex tvrac rungx maq haz rv-khawc tuinx?
9 Tishox rueq nuimshiq kuex vnyek saz maq lawc ruiux yuq,
vhvlx phvnx kuex vpiq rueq humc shuex haz?
Miq kuex nuimshiq rueq tvyoay ngaz lot shuinx ikhoc
Tishox kvmuinz tv-ngaz lot shuinx ngoz tueq haz tvmaung vshuinx?
10 Nuimshiq rueq htvlx phawc thvl httauk vshuinx kuex vguiuq maq httuiyq ruiux muinz,
vpiq rueq nuimshiq kuex httonx tvtharc kv-phuinx,
11 vpiq luimc vkawc rueq kvhiz juing phvnx maq nuimshiq muex tvmvrc kuq kv-phuinx.
12 Nuimshiq bomc tvguip htenc kuex tvp ikhoc khuec guez dvyx;
nuimshiq rv-khawc lvlc vtuinx bomc kuex gvmlawx ghaq ikhoc nyenz yaq.
13 Kuiyq shuik rvkuinz, kvjaz tvkoc vkhangx ngaz muex kuq kuit,
ngaz nuex yvmx yaungc raung yuq muinz m-yaungx kueq.
14 Ngvy rullungx kuex puinc gay muex ngaz rueq tvyoalc yoalx shex.
15 Tishox rueq ngaz kuex thvt gay ruiux yuq, ngaz nuex tvluimc
juing lotlaz kuex vguez shex rvmuq haz?
Ngaz rueq ngvy khac kuex vpiq htumc nuex jungx shaungx.
16 Miqyaq jix waz kuex Tishox khaungkac nuex nyuip khvmc muq,
kvkhoc ruez ruiux yuq ngaz rueq khvmc vshaungx kuex
ngvy kvpalc daungc juing yaungx ruiux yaungx tuex.
17 Majuiuc kuex ngaz rueq tvlvmx jungx vshaungx kvjaz kuex tay wuez shuinz.
18 Ngaz vlvmz kuex ngaz rueq tuiuz yaq ningkhvnc nuex,
ngvy khuec vkhac kuex jungc kuy tvkoc vyoalx shex.
19 Tishox lex, ngaz muex mvrax tvgurc tvkoc haz httuiuc kaz ruiux?
Kvkhoc rvruiux kuex, ngaz kuiyq shuik maq httax vtueq thueyc khvmc shaungx.
20 Phvnx nueyc laung nuex ngaz rueq thoz vphaungx; kvruex rungx raz naungx koq,
kvkaq mnoz kox wawc ngaz kvhttuiyq kay tvkoc hung-laungx mauk;
21 ngaz muex murx tvgurc vphux kuex tvthauk gay shuiuz,
ngaz kuex kvhiz sungx juing maq nauk tvhiz vkueq.
22 O Tishox lex, kungkhux jungx shuiuz, ngaz tvralc phaungx.
Rvmuq ngoz ruiux ngaz jungx phaungx, mnoz rueq ngaz muex tvralc koq.
23 Ngvy mvrax htenc kuex yvmx lac? Ngaz rueq yvmx yauk shuimc lac yaq tauk nguinx?
Ngaz rvhumc tauk khuec vkhac kuex yvmx lac?
24 Mnoz rueq ngaz kuex yvmx ngoz tueq lac koayc vphux?
Mnoz rueq ngaz kuex ralx washiz ikhoc yvmx ngoz tueq lac ruez vphux?
25 Ngaz kuex tvhiz sungx tvkoc haz mnoz hunglaungx vtuiux?
Ngaz kuex yvmx muinz rvmuq pulx yauk ikhoc dvyx rvtauk;
mnoz rueq vshanc kay wuez tsvmkuiz kuex khvt vshuiux.
26 Yalx rox yac nuex ngaz rueq vshuimc tvyaq wvnc tauk ningkhvnc nuex,
mnoz rueq ngaz muex vkhuip vkhaq ngoz yaq khac kuex tvrvhumc kuq vphux.
27 Mnoz rueq ngvy yaz kuex yanx ruiuz maq khvrc gay ruiux;
ngvy khamz tenc ruip rawx mnoz rueq bvmc lawc vphux,
ngvy mal htenc muinz mnoz rueq wisoz lawc vshuiux.Ref 13:27 Yob 33:11
28 Kvruex ningkhvnc nuex, ngaz kuex ramx wvnc tueq pulx ikhoc,
vhttvp rueq vphauk gay khvy ikhoc ngaz kuex bunx bac wvnc tauk.