9
1 Vkhoc kuilc daz rvhumc tuex baunglaung wawc dungc wvnc juing lvmx tsuingshiq tvkoc httax tuex rvmuq.Ref 9:1 Mat 4:15
Mediteranean maq shaldungc kox nuex kaz yaq Yodan ruilx ral maq Galile nuex httuiuc laz httax yaq, Zebulun nuiyc Naphtali phvnx ghaq hong ngoz yaq pungnuk phvnx htenc httax yaq hong kuex mvnnuex muingc jungc bac wvnc tueq, yuq muinz yix maq kuex tvtsanc nganc lvp wvnc shuex.
2 Raungnyauk nuex khuemc jix miq
htenc rueq raungwuic yunghvlc khiz yaq.
Tsuingshiq kuex wulumx mungx nuex httax wvnc tueq,
yuq muinz majuiuc raungwuic kuex tsuingshiq htauk nuex wuix yaq.Ref 9:2 Mat 4:16; Luk 1:79
3 Taungjix lex, mnoz rueq tsuingshiq
muex vkokez juing yunghvlc kuq toq;
mnoz rueq tsuingshiq muex tvkoz kez kuq toq.
Tsuingshiq kuex mnoz rueq shuimx wvnc toq yauk shuimc ningkhvnc nuex,
miq htenc rueq tuiz vtsvmz yut lvp wvnc shuex nuex nuiyc
tsuingshiq rueq khvt vtueq vlvp wvnc tsak vnyvmx rv-phvlc
tuex nuex kokez yaq ikhoc kokez wuez yaq.
4 Yvmx khoc lac ngoz ruiux lec
tsuingshiq muex tvliq yaq kandaungc nuiyc tsuingshiq
phauk nuex wung yaq jowvyx kuex mnoz rueq tv-ngawk kuq gay toq.
Mvnnuex mnoz rueq Midian
nolaungx bix khvt gay toq ikhoc
Mmiqsaz htenc kuex guirguenc naqsaq jix nuiyc mop jap jix
miqphvnx kuex mnoz rueq khvt taungx gay toq.
5 Vkhvt rvyaq ralx nolaungx bix
jotac htenc nuiyc tvguiy kop yaq khvy htenc kuex wvr
maq juiuz tvbac gay rvhumc tuex.
6 Naungshiq tvkoc nox vshiz jawx tueq shex!
Naungshiq muex miqwaz saz kuq phuex!
Vpiq rueq naungshiq kuex guimz phuex.
Vpiq kuex, “Vwangc juing,” “Tharc jungc jix,”
“Ngauz ngax Yunghvlc Tishox,” “Pattup Vwaz,”
“Nomic Hokhvmx saz,” ngoz tueq muingc shuex.
7 Vpiq honoc luimc vkawc kuex
tvhttoarc vtueq yungx luz wvnc tuex;
Vpiq mungtan kuex mkaq muinz nomic rvtuex.
Vpiq kuex Hokhvmx Dawid hoc nuex duiz vtueq guimz lawc shuex,
vpiq luimc vkawc kuex tsuingrux nuiyc tvrac vlvmz nuex vruingx waungc vtueq
majuiuc vmaq raz tueq tvsuip nuex httuiuc laz phaungx ngaungx wvnc tuex.
Tvphaungc Tvsuip Yehowa rueq
vruex lotlaz yaungc wvnc tvkoc
vhtvp htaz wuez shex rvtueq.Ref 9:7 Luk 1:32-33
8 Yehowa rueq Israel mungx htauk nuex nuiyc Yaku suiuz vsaz htenc htauk nuex phoc juing lvmx tvtay jungx tueq.
9 Israel miqsaz lotlaz nuiyc Samaria ghaqyungx nuex httaz yaq miq pumz tek vtueq vpiq rueq shuimx wvnc tueq yauk shuimc kuex tuiuz wvnc wuez shuex. Majuiuc kuex tsuingshiq ngamc ngax vtueq thuinz tvyungx wuez yaq. Tsuingshiq rueq,
10 “Ghaq lung yuimx htenc rul wvnc tueq, yuq muinz naungshiq rueq kvyuq lung yuimx shex guirx yek tiq. Phuiuq muiuq jungx htenc dauk gay tueq, yuq muinz naungshiq rueq kvyuq vhtawz vhttax kedar pulx maq layc wuez tiq,” ngoz tueq jungx wuez yaq.
11 Yehowa rueq tsuingshiq kuex tvkhvt muex tsuingshiq ralxRef 9:11 Vkvmx juing luik nuex tsuingshiq ralx; Hebre nuex Rezin ralx, ngoz tueq. htenc kuex naq kuq tueq.
12 Shaldungc kox wawc Siria mungx nuiyc shalx nyuip kox wawc Philistin mungx rueq Israel kuex yuk gay tvkoc tsuingshiq nuix htenc tvkac wuez yaq. Kvkhoc rvyruiux doc muinz, Yehowa vpiq thuinkhvy kuex shiz muq; vpiq yauk kuex murx tvgurc muex tenz hvt dvyx doc.
13 Israel miqsaz rueq tharc humc muq shauk doc; Tvphaungc Tvsuip Yehowa rueq tsuingshiq muex murx tvgurc koq muinz, tsuingshiq kuex vpiq kox nuex yek muq.
14 Yehowa rueq raungnuiyq shiz nuex dvyx Israel walaungx bix nuiyc mungx miqsaz htenc muex murx tvgurc shuex; vpiq rueq vkhux kox nuiyc vmiz kox kuex jumz gay shuex.
15 Rullungx nyuiuz waz rulx nuiyc tvtsanc nganc lvp jix miqwaz rulx kuex vkhux rvtueq, vrot vkaq tvluingc jix shvmmax bix kuex vmiz rvtueq!
16 Kvruex hez muex lvmx shvlc jix hez rueq lvmx vyaq kuex tvkhic vtueq thuinz tvmvruz raung kuq yaq.
17 Kvkhoc rvtueq Taungjix rueq yalxrox waz washiz muinz tvdung gay shuex rvmuq, nojix saz tamx nuiyc mvntix nyuiuz tamx muex muinz menjenc shuex rvmuq, yvmx khoc lac ngoz ruiux lec miq lotlaz kuex tishox vguez, layx bac nuiyc tsuingshiq kvjak tuex ruip rawx kuex vshuy vshac kvjaz dvyx rvtueq. Kvkhoc rvtueq Yehowa vpiq thuinkhvy kuex htumx muq, murx tvgurc muex vyauk kuex tenz hvt dvyx.
18 Miqsaz layx vbac yauk shuimc kuex shuiuq jungx htenc nuiyc shuiuq rumz htenc khamc gay yaq wvr rulc rv-ngvlc yaq. Kvruex kuex wvr khuiuq tul tvduiz yaq rumz wvr ikhoc khamc gay yaq.
19 Tvphaungc Tvsuip Yehowa kuex khaq vtueq, vpiq rueq murx tvgurc shuex kuex mungtan tvlot laz khamc wvnc yaq wvr ikhoc khamc vtueq, miq htenc kuex tvbac gay yaq, miq htenc rueq tsuingshiq phuz vnox htenc kuex tvjungx shec shuex rvmuq.
20 Baung ruip saz nuex httax yaq mungx miqsaz htenc tsuingshiq rueq thuiy vtueq lvp luz yaq vphuinz vphux phuiuz svy raungluingx saz kuex phauk saq shuex, yuq muinz tsuingshiq rvmc svy kuex mkaq muinz thauk muq. Tsuingshiq rueq miqmac saz tamx kuex phauk gay wuez yaq!
21 Manase miqsaz nuiyc Ephraim miqsaz kuex vdvmz dvmz rvkhvt wuez tueq yix maq, vdvmz nuex kvruiuz vtueq Yuda kuex khvt tueq. Kvkhoc rvtueq Yehowa thuinkhvy kuex htumx muq, murx tvgurc muex vyauk kuex tenz hvt dvyx.