50
Yehowa rueq,
“Vtaungx nyuiuz shurc gay tueq miq washiz ikhoc
ngaz rueq ngvy miqsaz htenc kuex yurc gay tueq ngoz tueq haz tvmaung vshuinx?
Kvkhoc ngoz ruiux rv-phvlc luik phux htenc kuex m-yuq lac?
Miq washiz rueq vsaz hez kuex dax muex shaung gay tueq ikhoc
ngaz rueq mnoz kuex wuinz saz muex shaung gay tueq ngoz tueq haz tvmaung vshuinx?
Rvmuq, mnoz thuq lvy rvhumc tuit kuex mmvrax htenc ningkhvnc nuex rvtueq;
mnoz rueq shuimx wvnc toq vbac yauk shuimc ningkhvnc nuex vyurc gay rvhumc tuit.
 
“Tsuingshiq kuex palc kay tvkoc ngaz tsuingshiq kox nuex kaz koq tueq
yvmx ngoz tueq lac tsuingshiq rueq ngaz muex tvyez tvralc muq rv-phvnx?
Ngaz rueq gvl koq tueq yvmx ngoz tueq lac tvralc wuez muq?
Ngaz kuex tsuingshiq palc lot mauk tanc khvnc haz nulx vtaungx?
Ngaz rueq svmuktvrax kuex nvr koq tueq ruic kaz lot tueq
yuix yungx ruilx htenc kuex kumtsvy tvnx muex wek gay tauk,
kvkhoc rvtueq yuix vguez ningkhvnc nuex ngaq htenc thueyc tueq.
Vthueyc vmvy ningkhvnc nuex yonzyex yaq ikhoc,
ngaz rueq raungx kuex nyauk duk tvyaungc lot shaungx,” ngoz tueq.
Johvlc Yehowa rueq yvmx khoc jungc juing lac kuex ngaz muex tvluing kuq yaq,
kvkaq ngaz rueq vhunc vnyec jix muex hunglaungc kuq lot tauk
Wvraungx nvp tek vpiq rueq ngaz muex yvmx khoc tvluingc kuy
juing lac lvmz kuex tay wvnc muex tvraungc raq yaq.
Yehowa rueq ngaz muex vtuiuz tay juing kuq phuex ningkhvnc nuex,
ngaq rueq khawx lvlx mauk
vpiq kuex koayc gay ruiux kaz wvnc mauk.
Ngaz rueq ngvy wungc jix waz muex rawx htungx kuex jungc kuq tauk.
Tsuingshiq rueq ngaz kuex yomnamc vtueq,
Ngvy kaq mul htenc kuex phiz gay ruiux ngvy htvlx nuex htoz maq htoz phuex nuex,
ngaz rueq tsuingshiq kuex tvgawx gay mauk.Ref 50:6: Mat 26:67; Mak 14:65
 
Yuq muinz tsuingshiq rueq guirguenz phuex kuex ngaz nuex thuiuz muq,
yvmx khoc lac ngoz ruiux lec Johvlc Yehowa rueq ngaz muex romc kuy ningkhvnc nuex rvtueq.
Ngaz rueq nanx lot tvkoc tsanz dez maq tvhttax phuex.
Ngaz kuex yvlc svy rvhumc taungx rvmuq,
yvmx khoc lac ngoz ruiux lex Tishox kuex ngvy hep nuex httax yaq,
vpiq rueq ngaz mvrax vguez lvmz hakhix kuex tvkhic shuex.
Ngaz muex nyvnc jix miq vshiz shiz vhttax haz?
Rungx nuex rvtuimx kaz wuez ix!
piq rueq nyvnc yaq kuex mlaq rueq!Ref 50:8-9 Rom 8:33-34
Johvlc Yehowa vpiq pumz maq ngaz muex tvguing jungx shuex ningkhvnc nuex,
ngaz vyaq ngoz tueq uraq lac hakhix tvkhic lot shvnx?
Ngaz muex nyvnc jix lotlaz kuex moz wvnc wuez tuex;
tsuingshiq kuex vyung rueq vtvnc khvy ikhoc bac wvnc tuex.
 
10 Yehowa muex tvtsanc nganc jix nuimshiq lotlaz kuex
vpiq nvrc waz kvjaz kuex tay phvnx wuez yaq,
mnoz khuemc juing kuex nyauk duk yaungx ruiux yaungx tuex,
yuq muinz Yehowa muex kvmx kuiuz, m-Tishox nuex kvnvp rvwak kuiuz.
11 Vganc jix htenc kuex tvbac gay tvkoc vyumx maq dvnc jix lotlaz lex,
miqmac rueq vyumx maq dvnc vshuinx kvyuq dvyx bac wvnc tuinx.
Yehowa vpiq pumz maq vkhoc tvyaungx shuex rvtueq;
mnoz kuex kuilc daz thuinbac rvhumc tuex.