38
(2Hokh 20:1-11; 2Tvts 32:24-26)
Kvtanc jauz Hokhvmx Hezekia kuex thueyc khvmx thuiuz tueq. Amoza saz shvmmax Esaia kuex piq kox nuex rvhumc kaz vtueq, “Mnoz kuex hvlx lot muq shex ningkhvnc nuex phvnx ruip saz tvhungx htaungx shec vtueq, vthueyc wvnc tvkoc tvyoalc shuiuz ngoz tueq Yehowa rueq mnoz muex jungx yaq,” ngoz tueq jungx tueq.
Hezekia kuex khoalx tuk kox nuex htvlx tvmuiz vtueq vjux thoz tueq: “Yehowa lex, ngaz kuex mnoz muex tvmtuing httax vtueq tsuingrux maq shuimx kuq ruiux, mnoz rueq ngaz muex tvshuimc roc vshuiux yauk shuimc mkaq muinz shuimx vshaungx yauk shuimc htenc kuex rvwvl shuiuz.” Ngoz tueq piq kuex khuip khaq laz juing gushuex guz khoar tueq.
Kvruex yimaq Yehowa rueq Esaia muex nvr tueq Hezekia kox nuex yek kaz vtueq piq muex jungx shuiuz, “Yehowa, mjix m-waz Dawid Tishox waz ngaz rueq mnoz vjux thoz bomc kuex tay tauk, mmuik phic htenc kuex khiz tauk; ngaz rueq mnoz kuex wawc rok shiz rac wawc bv-ngac tvhttax yek phaungx. Ngaz rueq mnoz muinz vruex Yerusalem ghaqyungx muinz Asiria honoc kox wawc palc wvnc phaungx, ngaz rueq vruex ghaqyungx kuex tvhttoarc vtueq tvkhup wungx shaungx.”
21 Esaia rueq hokhvmx waz muex jungx tueq, mtsuimx mac kuex phuiuq muiuq thuey maq phuirc vtueq puingc ruiux yuq, piq hvlx kaz tuex ngoz tueq jungx shuiuz.Ref 38:21 Pvlruinx 21-22 kuex vtvsuip wawc vyuq tvhttot shec tueq (2Hokh 20:6-9 nuex lawc shuinz). 22 Kvruex yimaq Hokhvmx Hezekia rueq, “Ngaz kuex Shomc Yuimx nuex kaz wvnc taungx kuex yvmx khoc hakhix yac khawx lac tuiuz tvnx?” ngoz tueq wiz tueq.
Esaia rueq, “Yehowa kuex vpiq bomkhvmc tvhungx tvkoc hakhix yaungc muex vyac khawx vshiz mnoz muex kuq kv-phux. Hokhvmx Ahaza rueq vguirx hikhux htauk nuex Yehowa rueq yac khawx kuex yix nuex phac rokshiz tvhttot shuex,” ngoz tueq tvralc jungx tueq. Kvruex yac khawx kuex yix nuex phac rokshiz kvhttot tueq.Ref 38:8 hikhux...phac rokshiz...phac; rvmuq ngoz ruiux shalhtaz...degree rokshiz...degree (2Hokh 20:9-11 nuex lawc).
Hezekia kuex vhvlx phenz wvnc tueq yix maq, vruex tvtsvmc shic vngoyc kuex wuiyq tueq:
10 Ngaz kuex rullungx sung laz httax
taungx rvmuq
Hungc kvlungx baung nuex dvyx wulumx mungx nuex kaz
wvnc juing shex ngoz tueq tvmaung tauk.
11 Ngaz kuex vruex tvraungx httax yaq mungkawx vyuq
Yehowa muinz, tvraungx httax yaq miqsaz htenc muinz
mkaq muinz khiz yek shaungx
rvmuq shex, ngoz tueq rvwvl gay tauk.
12 Httak vtueq taq gay tueq tap ikhoc,
Khvy tuiuz juing wawc gvnz vtueq vlvmz khvy ikhoc,
Ngvy rullungx kuex gvnz vtueq htumx kaz shex.
13 Ngaz kuex wvrx taungx vthuiuz
thuiuz muex guyc sez khoar tauk,
Hangsic rueq ngvy ruk vrawz
htenc kuex tvbunx gay tueq ikhoc,
Tishox rueq ngvy rullungx kuex
tvhtumx gay phuex shex ngoz tueq tvmaung tauk.
14 Ngvy tvruingc kuex vruinx saz rvyuiuq rvbvt wvnc tueq,
Ngaz kuex hituiuc ikhoc gulx vtaungx.
Ngvy muik htenc raungmungx
nuex lawc htuiz rueq htvrz wvnc vtuex.
Yehowa rueq ngaz kuex vruex kuilc
daz lotlaz wawc palc wvnc phuex.
15 Ngaz rueq yvmx lac jungx lot shaungx? Yehowa rueq vruex shuimx tueq.
Ngvy thuinz vmungx nuex kuilc daz rvhumc vtaungx, ngaz kvtsoalx lvp mauk.
 
16 Taungjix lex, ngaz kuex mnoz
tvkoc, mnoz washiz tvkoc dvyx tvraungx vtaungx;
Ngaz muex tvhvlc kuq vtueq ngaz tvraungx tvhttax koq.
17 Ngvy thuiuz vsac kuex hvlx kaz taungx.
Mnoz rueq ngvy rullungx kuex
kvhiz juing lotlaz wawc palcRef 38:17 Vlayc vruez vkez wvyvmc nuex palc; Hebre nuex lungwawc. wvnc phux;
Mnoz rueq ngvy mvrax htenc lotlaz dawc kuq phux.
18 Wulumx mungx wawc miq uraq
muinz mnoz muex tvtsvmc kuq lot muq;
Vthueyc vmvy rueq mtvmtuing muex tvluimc lot muq.
19 Majuiuc mnoz muex ngaz rueq tvtsvmc phaungx kvkhoc,
Vtvraungx httax yaq jix rueq mnoz muex tvtsvmc wuez yaq.
Vnyuiuz vwaz rueq mnoz mtanc
lac tvmtuing httax vtuiux kuex tsuingshiq sahez muex jungx kuq yaq.
20 Yehowa lex, mnoz rueq ngaz muex tvhvlc kuq phux,
Nuiyshiq rueq torox htenc tuimz
ruiux mnoz muex tvtsvmc vtueq shix tix.
Nuiyshiq vtvraungx wawwawx
Mshomc Yuimx nuex tvtsvmc shic maq shix tix.Ref 38:20 Pvlruinx 21-22 kuex pvlruinx 6 htumx nuex.