2
(Mik 4:1-3)
Vruex kuex Yuda mungx nuiyc Yerusalem nuex seng vtueq Amoza saz Esaia muex Tishox rueq vkuq bomjungc kuex vkhoc rvtueq:
Httuiuc wvnc yaq raungnuiyq
htenc nuex Shomc Yuimx httax yaq kanx kuex lotlaz htauk
nuex vjoz pinhtumc yaungx tuex,
kanx lotlaz htauk nuex vjoz pinhtumc rvtuex.
Miq phvnx paunghvlc kvyuq kaz wuez tuex,
tsuingshiq miq htenc rueq,
“Naungshiq Yehowa kanxRef 2:3 Taungjix kanx: Yerusalem nuex Shomc Yuimx guirx tueq Zion Kanx baung ngoc rvtueq. wawc,
Israel miqsaz Tishox Shomc Yuimx httax yaq baung nuex waung wuez ix.
Vpiq rueq naungshiq muex vpiq
rueq tvshuimc roc shuex kuex tvluing kuq phuex;
naungshiq kuex vpiq rueq vthvl
kuq lvmx nuex khuemx wuez ix.
Yehowa rueq tvluingc kuy bomc
kuex Yerusalem wawc dung vtueq;
vpiq rueq Zion maq vpiq miqsaz htenc kuex jungx yaq.”
 
Vpiq rueq miqphvnx yunghvlc
hvlwvl wawc rvkhawc rvlvlc lvmz htenc kuex phox gay shuex.
Tsuingshiq rueq tsuingshiq yaung kuex nax htoay juing muex
tsuingshiq paq kuex vsoalc juing yaung muex tvyaungc gay shuex.
Miq phvnx htenc kuex mkaq muinz rvkhvt yek tuex rvmuq shex,
rvkhvt tvkoc mkaq muinz tvyoalc shuex rvmuq shex.Ref 2:4 Yoel 3:10; Mik 4:3
Majuiuc, Yaku suiuz vsaz htenc lex, Yehowa rueq naungshiq muex kuq yaq raungwuic nuex khuemx wuez ix!
O Tishox lex, mnoz rueq Yaku suiuz vsaz htenc ngoz yaq mmiqsaz htenc kuex tuip gay toq! Kvruex ghaq vraungx kuex shaldungc mungx nuiyc Philistin miqsazRef 2:6 Vkvmx juing vkez nuex Ghaq vraungx...Philistin miqsaz; Hebre maq sawc muq, ngoz tueq. kox wawc luinglawc yauk shuimc dvyx shex mvrx wvnc tueq. Mungx miqsaz htenc muinz mungganc phvnx htungx vlayx dvyx shex phvnx wvnc vshuex. Tsuingshiq ghaq vraungx nuex kuimphox nuiyc kuimshawx htenc mvrc vtueq, tsuingshiq tsak vnyvmx kuex vhtumx ngoz tueq vguez. Tsuingshiq ghaq vraungx nuex mvre htenc mvrc yaq, tsuingshiq mvre renc htenc muinz vwvlc lot juing rvmuq. Tsuingshiq ghaq vraungx nuex yac yuimx htenc mvrc yaq, tsuingshiq kuex tsuingshiq yauk maq vtvhungx vyac htenc kuex nawk palx wuez yaq.
Miq pumz tek vtueq vyomc namc nuiyc muingc bac rvhumc wuez tuex. Yehowa lex, tsuingshiq muex mvrax nauk dawc kuq kaz!
10 Tsuingshiq kuex Yehowa thuinkhvy wawc dungc wvnc tvkoc muinz, vpiq ngauz vngax, luimc vkawc wawc kvhttuiyq kay tvkoc muinz, lung tap lungshaung htenc nuex nuiyc ghaq luix nuex kvhttuiyq wuez tuex!Ref 2:10 Tvkh 6:15; 2Thes 1:9 11 Miqsaz laungc tsvnc yaq kuex tvnulx gay ruiux miqsaz ngamc boq yaq kuex tvbac gay rvhumc tuex raungnuiyq httuiuc wvnc yaq. Kvruex yimaq Yehowa dvyx somraungc kuy rvhumc tuex. 12 Kvruex raungnuiyq Tvphaungc Tvsuip Yehowa rueq luimc vkawc httaz jix miq ruip rawx kvmuinz, ngamc yungx ngax yungx raz tueq thuinz tvyungc jix miq ruip rawx kvmuinz tvyomx kuq gay shuex. 13 Vpiq rueq Lebanon wawc kedar pulx loayc htenc nuiyc Bashan mungx wawc khauk rauk pulx htenc lotlaz kuex tvbac gay shuex. 14 Vpiq rueq johvlc kuz nuiyc kanx htenc kuex tvraz gay shuex, 15 johvlc pvrrawx ruip rawx nuiyc nolaungx ghaqshungc ruip rawx wawc palx ruk htenc kuex tvbac gay shuex. 16 Vpiq rueq yunghvlc pinhtumc lix htenc nuiyc svp hvlc lix htenc kuex tvhtuip gay shuex. 17-18 Miqsaz laungc tsvnc yaq kuex tvnulx gay ruiux, miqsaz ngamc boq yaq kuex tvbac gay rvhumc tuex. Yac yuimx htenc kuex tvhtumx puik moz wvnc ruiux, Yehowa dvyx shex kvruex raungnuiyq somraungc rvhumc tuex.
19 Vpiq kuex mungkawx ghaq vruex builc gay tvkoc httuiuc kaz tuex nuex, miq htenc kuex Yehowa thuinkhvy wawc dungc wvnc tvkoc muinz, vpiq ngauz vngax, luimc vkawc wawc htvlx httuiyq lvp tvkoc muinz lung tap lungshaung htenc nuex muinz, ghaq luix htuz vtueq muinz kvhttuiyq wuez tuex. 20 Kvruex raungnuiyq httuiuc wvnc tuex nuex, tsuingshiq kuex tsuingshiq rueq vtvhungx kuimshawx kuimphox yac yuimx htenc kuex tuip gay ruiux, kvruex htenc kuex tvruiuc nuiyc phauk suiyq htenc kox nuex taq gay shuex. 21 Yehowa kuex mungkawx ghaq builc gay muex httuiuc kaz tuex nuex, miq htenc kuex vpiq thuinkhvy wawc dungc wvnc tvkoc muinz, vpiq ngauz vngax nuiyc luimc vkawc wawc htvlx httuiyq lvp laz ngoz tueq ghaq luix htenc nuiyc lung tap lungshaung htenc nuex httax yaq ghaq luix htenc nuex kvhttuiyq wuez tuex.
22 Vthueyc rvyaq phvnx muex nauk tvluimc wuez kaz. Tsuingshiq htawz vrawz kuex yvmx lac rvtvnx?