11
Dawid hokhvmx phvnx vmaq kuex vduiuz vruez gay pulx rulc rv-ngvlc yaq; yuq muinz vjungx khuiuq maq vnyalx sung yek yaq ikhoc Dawid suiuz vsaz htenc wawc hokhvmx vnyalx washiz dung tuex.Ref 11:1 Tvkh 5:5; 22:16
Piq rueq miqmac miqsaz htenc kuex guimz lawc tvkoc,
Yehowa siyac rueq piq muex taksux tharc,
phaqjic nuiyc vthenc vtuiuz kuex kuq shuex.
Piq rueq Yehowa thuinroc kuex tuiuz vtueq vpiq muex tvtsanc nganc shuex,
vpiq lvmx phvnx vtueq thuinz hvlc juing lvp shuex.
Piq rueq vshvmx vrvmx maq muinz, bomc thawx tay vtueq muinz phox shuex rvmuq;
piq rueq htemc saz jix muex
tvrac vlvmz maq phox kuq ruiux thuinz tvyomx jix muex
tvkhup wungx kuq shuex.
Piq rueq nvr yaq kvjaz kvmaq miq htenc rueq murx gurx shuex,
layx bac jix miq kuex vthueyc rvhumc tuex.Ref 11:4 2Tim 2:8
Piq rueq piq miqsaz kuex tvrac vlvmz nuiyc tsuingrux maq guimz lawc shuex.Ref 11:5 Eph 6:14
 
Shoalx kuex khelbuenx rulc vdvmz nomic maq httax tuex,
jaq tuik htenc muinz khelkhix sahez rulc vdvmz nuex woalc tuex.
Manx sahez nuiyc hangsic htenc
kuex vdvmz nuex phauk saq vtueq nosaz rulx rueq remx lawc shuex.Ref 11:6-9 Esa 65:25
Manx kuiux htenc nuiyc japbawx
htenc kuex vdvmz nuex wvsvy saq shuex,
tsuingshiq sahez kuex vdvmz nuex nomic maq httax wuez tuex.
Hangsic htenc kuex suiux vmanx
rueq ikhoc tsvmkuiz phauk shuex.
Mkhoc shoc maq nox vshiz kuex vyangx vhttax puiuc luix kvlc
nuex luemz ruiux yuq vhiz juing rac muq.
Tishox vpiq vsawc kanx, Zion
htauk nuex, vguirc vguenc nuiyc tvbac gay httax tuex rvmuq.
Svmuktvrax nuex yuix mvrc yaq
ikhoc ghaq vraungx kuex Yehowa phaqjic vmvrx maq httax tuex.Ref 11:9 Hab 2:14
10 Dawid phvnx wawc vdung hokhvmx vnyalx kuex miqphvnx htenc tvkoc tvkhic tvtsuingc juing muex yaungc wvnc vkhing httuiuc wvnc yaq. Tsuingshiq kuex piq hokhvmx ghaqyungx nuex rvtuimx kaz vtueq piq muex tvtsanc nganc kuq shuex.Ref 11:10 Rom 15:12 11 Kvruex raungnuiyq httuiuc tuex nuex, Taungjix rueq vpiq luimc vkawc kuex shuimx vtueq vpiq miqsaz kuex Asiria nuiyc Ejip wawc, Pathro, Ethiopi, Elam, Babelon nuiyc Hamat mungx htenc, svmuktvrax nuiyc julc lomx htenc nuex httaz jix htenc kuex gvl wvnc shuex. 12 Taungjix rueq rv-nyanc khuemx wvnc vtuex Israel nuiyc Yuda miqsaz htenc kuex ghaq shuk bvlic wawc shvlx vtueq tvtuimx yek yaq lvmz miq htenc muex tvkhic tvkoc ngoz tueq vyac mal nganc dvmx vshiz tsomz shuex. 13 Israel mungtan kuex Yuda muex mkaq muinz khunnyerx shuex rvmuq, Yuda mungx jix muinz Israel ralx muex yaungx tuex rvmuq. 14 Tsuingshiq kuex vdvmz nuex kvruiuz vtueq shalx nyuip kox wawc Philistin miqsaz kuex khvt ruiux, shaldungc kox nuex httax yaq jix hup vsvmx kuex nyvlc wvnc shuex. Tsuingshiq rueq Edom nuiyc Moba miqsaz kuex khvt taungx gay ruiux, Ammon miqsaz rueq tsuingshiq kvjaz tay kuq shuex. 15 Yehowa rueq raungguil kalc hvlc tvguil vtueq Su-et noc nuiyc Euphrat ruilx kuex tvruic gay ruiux, uraq muinz yanz lot yaq yuix saz ruilx mvshix dvyx shex httax tuex, kvkaq uraq muinz khuemx shamx lvp tuex.Ref 11:15 Tvkh 16:12 16 Israel miqsaz htenc Ejip mungx maq kaz wvnc tueq nuex tsuingshiq jix vwaz tamx tvkoc tvtsuingc juing muex yaungx tueq ikhoc, Asiria mungx nuex kvjungx yaq Israel miqsaz htenc muex tvtsuingc juing tvkoc lvmx laungx yungx kvruex baung nuex httax tuex.