5
1 Esther kuex dungc svy mamc vtueq raungnuiyq thuimx vngoz raungnuiyq hokhvmx khoz vkhvy kuex svmx ruiux, hoc daungraungc khok rulc rvtac phvt rvtueq hoc mungx wangx nuex jvp woz tueq. Kvkaq hokhvmx waz kuex vnyuip juing kaluix lvmx rulc rvtac phvt hoc mungx wawc hoc daungraungc nuex ngaungc yaq.
2 Hokhvmx nyuiuz Esther yuz phic kox nuex jvp yaq kuex hokhvmx waz rueq khiz vtueq, piq htvlx phawc httaz ningkhvnc nuex hokhvmx waz rueq piq kox nuex kuimshawx paq kuex tenz tueq. Esther muinz duiz woz vtueq paq khux kvyuq kvtuingc tueq.
3 Hokhvmx waz rueq, “Hokhvmx nyuiuz Esther lex, yvmx lac rax yaq nguinx? Mnoz muex yvmx lac rax yaq nguinx ngaz muex jungx koq, ngvy honoc mungtan kholak doc muinz kuq phaungx,” ngoz tueq wiz tueq.
4 Esther rueq, “Taungjix hokhvmx waz rungx raz naungx ruiux kuex majuiuc raungyac phuiuz svy moalx kvyuq mnoz nuiyc Haman kuex gvl roc vshaungx,” ngoz tueq tvralc tueq.
5 Kvruex yimaq Hokhvmx waz rueq Haman kuex Esther rueq gvl tueq kvyuq yauk lox maq kay tvkoc nvr tueq. Kvkhoc rvtueq hokhvmx waz nuiyc Haman kuex Esther rueq raungyac dungc svy moalx kvyuq kaz tueq.
6 Hokhvmx waz rueq svpiq tix nuingx yaq lvmx maq Esther muex ngoc, “Mnoz rueq yvmx lac roc shuiux ngaz muex jungx koq. Ngaz rueq mnoz muex kuq phaungx, ngvy honoc mungtan kholak ngoz ruiux doc muinz kuq phaungx,” ngoz tueq jungx tueq.
7-8 Esther rueq, “Taungjix hokhvmx waz kuex ngaz rueq thoz phaungx kvjaz kuex menjenc kuq phux ngoz ruiux kuex, invp raungyac mnoz muex phuiuz svy tvhungx htaungx kuq yek phaungx kvyuq Haman rulc vdvmz kaz yek luit. Kvkaq jix ngaz muex rax yaq lvmx kuex jungx kuq phaungx,” ngoz tueq tvralc tueq.
9 Haman kuex raungyac dungc saq vtueq vshuenc vruenc maq kaz wvnc tueq. Yuq muinz hoc wangx kaluix lvmx nuex httax yaq Mordekai kuex piq kaz wvnc koq tueq kvtenc muq, tvtsanc nganc lvmx yvmx muinz tvkhic muq kuex piq rueq khiz vtueq, Haman kuex piq muex pinhtumc khaq tueq.
10 Yuq muinz piq kuex vthuinz nuex laungc maq nanx vtueq yuimx nuex yek waung tueq. Kvruex yimaq piq kungjix hez kuex vyuimx kvyuq gvl tueq, vtaungx nyuiuz Zeresh muinz tsuinghez rulc lomx tvkoc gvl taq tueq.
11 Piq rueq tsuinghez muex piq mtanc lac luiz waungx yaq lvmz, vsaz hez waz mjuc httax yaq lvmz, hokhvmx waz rueq mtanc lac somraungc wvnc tvnx lvmz, hokhvmx waz vyungx vlaungx vganc jix htauk nuex jvnc vtueq piq kuex mtanc vkhek nuex lac taq yaq nguinx lvmz kuex kvsomc parc jungx tueq.
12 Haman rueq, “Kvruex htauk nuex lvy vtueq, hokhvmx nyuiuz Esther rueq doc muinz ukhaq muex muinz tvyoalc kuq muq raungyac phuiuz vsvy moalx nuex hokhvmx waz nuiyc ngaz dvyx gvl phuex, invp muinz nuiyhez kuex raungyac dungc svy muex gvl yek phuex.
13 Yuq muinz Yuda miqsaz Mordekai kuex hoc kaluix lvmx nuex ngaungc yaq kuex ngaz rueq khiz shaungx wawwawx, majuiuc jungx vshaungx lvmx htenc kuex ngvy tvkoc yvmx vjux lac httax yaq nguinx,” ngoz tueq jungx tueq.
14 Kvkhoc rvtueq vtaungx nyuiuz nuiyc vkungjix hez lotlaz rueq, “Mnoz rueq meter 22 joz yaq miq tvshuirc pauk juing kuex tvhungx muq rvtonx? Invp raungnvp Mordekai kuex buq shuirx htung kvyuq tvshuirc pauk gay tvkoc hokhvmx waz muex tvtay jungx shuiuz, kvruex yix maq mnoz kuex raungyac dungc svy moalx nuex vkoz vkez maq kaz lvp tuiux,” ngoz tueq kvmungx kuq tueq.
Haman rueq vruex kvmungx kuex vhvlx rvkoq tueq piq rueq miq tvshuirc pauk juing kuex tvhungx tueq.