4
1 Kvruex yimaq ngaz rueq vruex mungkawx nuex yaungx yaq tvrac vlvmz rvmuq kuex lawc wvnc tauk. Htuingtuing rvhumc yaq jix khoar wuez yaq tsuingshiq muex uraq muinz romc kuq muq. Htuingtuing jix hez kuex luimc vkawc httaz hvlc ningkhvnc nuex tuinghtuing rvhumc jix muex uraq muinz romc kuq wuez muq.
2 Ngaz rueq vthueyc kay wuez jix nuiyc vlvy wvnc wuez jix htenc muex khunnyerc sac yaq; tsuingshiq kuex tvraungx httax yaq jix htauk nuex muinz vhvlx pinhtumc yaungx yaq.
3 Tsuingnueyc htauk nuex muinz vhvlx pinhtumc kuex mkaq muinz jawx muq shauk jix hez nuiyc vruex mungkawx vyuq yaungx wvnc yaq tvrac muq kuex rvhumc muq jix htauk nuex doc muinz vhvlx pinhtumc rvtueq.
4 Miqsaz kuex lotlaungc wvnc tvkoc yauk shuimc pinhtumc hunglaungc shuimc juing kvmuinz ngaz rueq tvluing wvnc tauk: kvruex kuex yvmx khoc lac ngoz ruiux lec tsuingshiq yuimx phic wuinz rulc rvlongx roc ningkhvnc nuex rvtueq lvmz ngaz rueq khiz vshaungx. Yuq muinz kvruex kuex khuec guez. Kvruex kuex raungguil yurc shix ikhoc dvyx rvtueq.
5 Tsuingshiq kuex rvmc thuiuz rueq thueyc wvnc nuex httuiuc laz miqmac yauk got vtueq httaz jix kuex miqyaq ngoz tueq ngoz yaq.
6 Yuq muinz raungluingx saz hup vsvmx maq, thuinz suinglix lix httax tix kuex, yauk nueyc rac maq yauk shuimc paung vtueq raungguil yurc lvp shix htauk nuex muinz vhvlx pinhtumc rvtueq.
7 Ngaz rueq rullungx lvmx nuex khuec guez yaungx yaq phvnx shiz kuex tvtsuingc taq tauk.
8 Vruex yuq piq dvyx httax yaq miq washiz vhttax. Piq nuex vsaz miqwaz vguez, vphuz vnox muinz vguez, yuq muinz piq rueq mkaq muinz yauk shuimx ruq dvyx, piq tsak vnyvmx kvmac mkaq muinz vthuinz suing muq. Piq kuex yauk shuimc nuex dvyx hunglaungx ruiux piq shauk gvnz tvkoc vpiauc liauc juing tvdux gay tueq kuex ukhaq tvkoc lac rvtvnx? Kvruex muinz khuec guez nuiyc rullungx tvraungx tvkoc thuinz kuilc daz juing dvyx rvtueq.
9 Miq kuex washiz dvyx httaz ngoc mvnx wanueyc httax ruiux kuex vhvlx pinhtumc rvtueq, yvmx khoc lac ngoz ruiux lec tsuingnueyc rueq vdvmz nuex kvruiuz vtueq yauk shuimx ruiux yuq jvnc vtueq shuimx lot shuex.
10 Tsuingnueyc wawc washiz rul kaz ruiux yuq, vganc washiz rueq romc kuq lot shuex. Yuq muinz washiz lauk lauk httax vtueq piq rul kaz ruiux yuq, kvruex vbac, yvmx khoc lac ngoz ruiux lec uraq muinz piq muex romc kuy jix vguez rvtueq.
11 Raungsungx yaq nuex wanueyc vdvmz nuex woalc ruiux luimx yaq, yuq muinz mnoz lauk lauk dvyx ngoz ruiux yvmx khoc maq lac luimx lot tuiux?
12 Miq wanueyc rueq kuex washiz lauk lauk rueq dvyx khvt yaq kuex tvgawx gay lot shuex. Ruiuz thuimx maq vruip ruiuz kuex puinc gay tvkoc yoalx muq.
13-14 Miq washiz shiz kuex htemc saz yaungx yaq wawc piq mungtan nuex hokhvmx yaungx wvnc lot yaq, rvmuq ngoz ruiux khoktep nuex shuiuz rvhumc yaq wawc hoc daungraungc htauk nuex duic waungc mvy yaq, yuq muinz kvruex hokhvmx waz kuex kuiux kawx wvnc tueq vkhing nuex honc vtharc htenc kuex thoz muq maq miqyaq yaungx ruiux kuex, wvtharc htemc saz yalxrox waz kuex kvruex waz htauk nuex muinz jvnc vtueq vlap httax yaq.
15 Ngaz rueq mungkawx nuex httax yaq miq lotlaz lvmz kuex tvmaung koq tueq, vganc baungshiz shiz nuex hokhvmx muex yaungc jix yalxrox washiz httax yaq kuex ngaz rueq tuiuz lvp tauk.
16 Hokhvmx washiz rueq mungx miqsaz mjuc guimz aungx yaq ngoz tueq htvp htaz ruiyrawz tvy vguez; piq thueyc kaz ruiux, piq rueq shuimx lvmz wvnc tueq tvkoc nuex uraq muinz kejux vyungx ngoz shuex rvmuq. Kvruex kuex khuec guez dvyx. Kvruex kuex raungguil yurc shix ikhoc dvyx yaungx yaq.