4
Nebukhadnezar rueq Lauknueyc ngoc yaungc Maung
1 Hokhvmx Nebukhadnezar rueq mungkawx wawc miqphvnx htenc, vphvnx htenc, nuiyc kvjaz phvnx ruip kvjak yaq miq lotlaz muex vkhoc bomjungc tvjungc tueq:
“Nuimhez nuex gvnhttuingc mhttax kueq!
2 Johvlc Tishox rueq ngaz muex tvkhic kuq phuex vtawz juing nuiyc vwangc juing htenc kuex tay shuinz.
3 “Tishox rueq naungshiq muex tvkhic phuex vtawz juing
htenc kuex vtanc khvnc yungx luz yaq nyix!
Vpiq rueq shuimx wvnc tueq vwangc juing htenc kuex vtanc
khvnc luimc vkawc yungx yaq nyix!
Tishox kuex pattup pat-sac
hokhvmx, vpiq rueq pattup guimz lawc shuex.
4 “Ngaz kuex ngvy hoc nuex vlenc vlauk httax vtueq, vrungx vwanx yunghvlc maq vkoz vkez httax vtaungx.
5 Yuq muinz ngaz vkvtsoalx nuex vhiz juing maung nuiyc vkawc yawc juing romzyac htenc kuex ngaz rueq khiz tauk.
6 Maung vlvmz kuex yvmx lac rvtvnx ngaz muex jungphvnc tvkoc Babelon mungx wawc hokhvmx rulc rvjungc rv-phvnc jix miq lotlaz kuex ngaz kox nuex waungc tvkoc tvjungc tauk.
7 Kvkaq luinglawc jix lotlaz, muik tv-phelc jix htenc, htaungc kvpumz jix hez, nuiyc ruiysuiyq yapix lawc thenc jix htenc httuiuc waung phuex tueq, ngvy maung kuex jungx kuq tauk, yuq muinz tsuinghez rueq jalc jungx kuq lot muq.
8 Kvruex yimaq Daniel kuex nyuip waung ruex. (Piq kuex ngvy tishox muingc tv-phvnc maq Belteshazar ngoz tueq gvl tauk.) Vsawc tishox htencRef 4:8 tishox htenc; rvmuq ngoz ruiux Tishox. siyac kuex piq nuex httax yaq, kvkhoc rvtueq ngaz rueq khiz tauk maung kuex piq muex jungx tauk. Ngaz rueq piq muex jungx tauk:
9 Luinglawc jix hez muex walaungx waz Belteshazar lex, vsawc tishox htenc siyac mnoz nuex httax yaq ningkhvnc nuex vhttuiyq vpuiuc vruez lotlaz mnoz rueq tuiuz yaq kuex ngaz rueq tuiuz yaq. Vruex kuex ngvy maung rvtueq. Ngaz muex vlvmz jalc jungx kuq koq.
10 “Ngaz kvtsoalx nuex, pulx jungx yunghvlc vshiz ghaq vmungx baung nuex kemz yaq kuex romzyac khiz tauk.
11 Kvruex jungx kuex yungx wvnc vtueq raungx nuex httuiuc laz yungx luz wvnc tueq kuex mungkawx miqsaz ruip rawx rueq khiz tueq.
12 Kvruex jungx yauk htenc kuex svp hvlc, kvyuq mungkawx lotlaz rueq svy muex hungx laz vthuey thuey yaq. Yaruix ngvmx saz htenc muinz kvruex jungx buingc nuex guilc wuez yaq, wushawx htenc rueq vnoz vkanx htenc nuex vjejez yaq, vtvraungx phvnx ruip rawx rueq kvruex thuey kuex saq wuez yaq.
13 “Ngaz rueq romzyac nuex seng vtueq tvmaung yaq nuex, honc lvmz hvt maq bvmc lawc yaq raungkamx washiz kuex raungmungx maq svt kaz yaq kuex ngaz rueq khiz tauk.
14 Piq rueq bomc laung maq, ‘Pulx jungx kuex dauk vtueq vnoz vkanx htenc kuex tvp gay shuiuz; vyauk htenc kuex guiyx gay ruiux vthuey htenc kuex wuinc gay shuiuz. Kvruex jungx khung wawc ngvmx saz htenc nuiyc vnoz vkanx htenc nuex ngaungc yaq wushawx htenc kuex yurc gay shuiuz.
15 Yuq muinz ghaq nuex httax yaq vjungx khuiuq kuex yanx ruiuz nuiyc poysac ruiuz maq khvrc vtueq taq shuiuz. Kvruex kuex kvwawc wuik vnax nuex kemz yaq httuingx ruix kvyuq taq shuiuz.
“ ‘Majuiuc vruex waz htauk nuex buing mdvy kueq, piq kuex ngvmx saz htenc nuiyc vkhic vyuingc vruez jungx htenc rulc mhttax kueq.
16 Piq kuex wawc mvshix tup miqsaz thuinz vtharc httax tuex rvmuq, yuq muinz ngvmx saz thuinz vtharc httax wvnc tuex.
17 Vruex kuex honc lvmz hvt maq bvmc yaq raungkamx waz hez rueq htvp htaz yaq lvmz rvtueq. Kvkhoc rvtueq Johvlc Tishox rueq miqsaz mungtan htenc htauk nuex luimc vkawc httax yaq lvmx muinz, vpiq rueq yvmx muinz rvmuq miq kuex thvl wvnc vtueq vkhek miq muex tvyaungc tueq lvmx muinz baung ruip saz wawc miq rueq mtuiuz wvnc shueq,’ ngoz tueq ramc tueq.
18 “Hokhvmx Nebukhadnezar rueq, “Vruex kuex ngvy maung rvtueq. Majuiuc Belteshazar lex, kvruex vlvmz yvmx lac rvtvnx ngaz muex jungx kuq koq. Ngaz hokhvmx rulc rvjungc rv-phvnc jix hez rueq jalc jungx kuq tsic muq, yuq muinz mnoz kuex vsawc tishox htencRef 4:18 tishox htenc; rvmuq ngoz ruiux Tishox. siyac mnoz nuex httax yaq ningkhvnc nuex jalc jungx lot shuiuz,” ngoz tueq.
Daniel rueq Maung Vlvmz Jalc jungx tueq \p
19 Kvkaq, Belteshazar ngoz yaq Daniel kuex yvmx muinz jungphvnx lot muq pinhtumc kawc yawc kaz tueq. Hokhvmx waz rueq piq muex, “Belteshazar lex, maung nuiyc kvruex bomjungc vlvmz ningkhvnc nuex mnoz nauk kawc yawc kaz,” ngoz tueq.
Belteshazar rueq, “Taungjix hokhvmx waz lex, maung nuiyc vlvmz kuex mnoz tvkoc rvmuq, mralx hez tvkoc mruez kueq.
20 Pulx jungx kuex raungx htanc laz luz wvnc vtueq mungkawx miqsaz tek rueq kvruex khiz wuez yaq.
21 Kvruex pulx yauk htenc svp hvlc ningkhvnc nuex, mungkawx lotlaz rueq svy muex hungx laz vthuey thuey yaq. Yaruix ngvmx saz htenc kuex kvruex khung nuex guilc wuez ruiux, wushawx htenc rueq vnoz vkanx nuex vjejez wuez yaq.
22 “Taungjix hokhvmx waz lex, mnoz kuex loayc hvlc nuiyc hungc hvlc pulx jungx rvtoq. Mnoz kuex yunghvlc ningkhvnc nuex raungx htanc vshuiux, mnoz luimc vkawc maq mungkawx lotlaz puingc vshuiux.
23 Taungjix hokhvmx waz rueq lawc yaq nuex, raungkamx washiz kuex raungmungx maq kaz vtueq, ‘Pulx jungx kuex dauk gay ruiux tvbac gay shuiuz, yuq muinz vjungx khuiuq kuex ghaq nuex dvyx taq shuiuz. Yanx ruiuz nuiyc poysac ruiuz maq khvrc shuiuz, httuingx kemz yaq wuik kvyuq taq shuiuz. Kvruex waz htauk kvyuq buing mdvy kueq, kvyuq wawc mvshix tup ngvmx saz htenc rulc mhttax kueq,’ ngoz tueq jungx tueq.
24 “Kvmaq, Taungjix hokhvmx waz lex, vruex kuex kvruex lvmz rvtueq, kvruex kuex mnoz nuex yaungx wvnc tuex lvmz Johvlc Tishox rueq vjungx lvmz rvtueq.
25 Mnoz kuex miq phungc wawc yurc gay rvhumc vtueq yaruix ngvmx saz htenc rulc vdvmz httax tuiux. Mnoz kuex manx rueq ikhoc renhttuingx kuex wawc mvshix phauk ruiux, mhtauk nuex buing rueq hemc vtueq vshuip vpuingc vguez baung nuex woalc tuiux. Kvkaq Johvlc Tishox rueq miqsaz mungtan htenc guimz lawc ruiux, vpiq rueq vthvl miqsaz ukhaq muex muinz vpiq rueq kuq lot yaq kuex mnoz kvjungc tuiux.
26 Raungkamx waz rueq ghaq nuex pulx jungx khuiuq tvjungx tvy tvkoc nvr tueq. Kvruex kuex mungkawx lotlaz Tishox rueq guimz yaq ngoz tueq mnoz kvjungc tuiux kvkaq, mnoz hokhvmx muex hulawx yaungx wvnc yek tuiux ngoc rvtueq.
27 Kvkhoc rvtueq, Taungjix hokhvmx waz lex, ngaz rueq tharc jungx vphaungx kuex phvnx shuiuz. Mvrax lvmx kuex gay shec ruiux vlvmx yauk shuimc kuex shuimx shuiuz, htemc saz jix muex menjenc shuiuz. Kvkaq mnoz kuex tvhttoarc vtueq vrungx vwanx paung wvnc yek tuiux.”
28 Vlvmx htenc lotlaz kuex Hokhvmx Nebukhadnezar nuex yaungx wvnc tueq.
29 Yapix lex rokshiz rac vnueyc yix maq, piq kuex Babelon mungx piq hokhvmx hoc htauk nuex khuemx shamx yaq nuex,
30 piq rueq, “Lawc shuiuz Babelon mungx kuex pinhtumc yungx luz yaq nyix! Kvruex kuex ngvy luimc vkawc nuiyc hungc vlaungc, ngauz vngax dung wvnc tvkoc muingjungc khushec tvkhic muex ngvy ghaqyungx tvyaungc muex ngaz rueq vtec rvtueq,” ngoz tueq jungx tueq.
31 Piq nuix maq kvjaz jungc max lot nuex dvyx, raungmungx maq kvjak yaq kvjaz kuex, “Hokhvmx Nebukhadnezar lex, ngaz rueq jungx vphaungx kuex tay shuiuz! Mnoz hokhvmx luimc vkawc kuex majuiuc mnoz kox wawc lvmz gay tauk shex.
32 Mnoz kuex miq phungc wawc yurc gay rvhumc vtueq yaruix ngvmx saz htenc rulc vdvmz wawc mvshix tup manx rueq ikhoc renhttuingx kuex phauk shuiux. Kvkaq Johvlc Tishox rueq miqsaz mungtan htenc htauk nuex guimz yaq luimc vkawc lvp vtueq vpiq rueq vthvl ukhaq muex muinz vpiq rueq kuq lot yaq kuex mnoz kvjungc tuiux,” ngoz tueq.
33 Kvjaz kuex vsuing lvmx lvy dvyx httuiuc kaz tueq. Nebukhadnezar kuex miq phungc wawc yurc gay rvhumc vtueq manx rueq ikhoc renhttuingx phauk yaq. Piq kuex buing rueq hemc vtueq, piq khux mul kuex lawx mul ikhoc luz ruiux, piq yauk vyaz httuinc htenc kuex wushawx yaz httuinc ikhoc luz wvnc tueq.
Nebukhadnezar rueq Tishox muex Tvtsvmc tueq
34 Hokhvmx waz rueq jungx tueq, “Wawc mvshix yix maq ngaz rueq raungx nuex kac lawc koq tueq, miqsaz thuinz vtharc kvyez yek tauk. Ngaz rueq Johvlc Tishox muex tvtsvmc kvmc ruiux pattup httax yaq waz kuex tvtsanc nganc vtueq ngauz ngax kuex tvtsvmc tauk.
“Vpiq rueq pattup guimz lawc shuex,
vpiq mungtan kuex patshiz maq patshiz phaungx ngaungx wvnc tuex.
35 Vpiq rueq mungkawx miqsaz kuex yvmx muinz rvmuq dvyx khiz yaq;
raungmungx wawc raungkamx bix nuiyc mungkawx miqsaz
kuex vpiq khung nuex httax yaq.
Uraq muinz vpiq thuinroc kuex tuingshaung lot muq
vpiq rueq shuimx yaq kuex uraq muinz wiz khvmc muq.
36 “Ngvy tharc svmz wvnc tauk nuex, ngvy tvtsanc nganc, ngvy hungc vlaungc nuiyc ngvy mungtan ngauz vngax kuex kungkhux wawc ikhoc ngaz muex kuq yek phuex. Ngvy miq vyungx vlaungx bix nuiyc ngaz rulc rvjungc phvnc hez rueq ngaz kuex malc wvnc phuex, ngaz rueq kungkhux wawc htauk nuex muinz vjvnc tvtsanc nganc yunghvlc nuiyc ngvy hokhvmx luimc vkawc kuex lvp wvnc yek tauk.
37 “Majuiuc kuex, ngaz, Nebukhadnezar rueq, raungmungx Hokhvmx waz ngauz vngax kuex tvtsanc nganc, tvtsvmc kvmc vshaungx. Vpiq rueq shuimx wvnc tueq phvnx ruip saz kuex vlvmx nuiyc tsuingrux yaq ningkhvnc nuex vpiq rueq ngamc vngax maq shuimc vkay jix ukhaq muinz tvruinc rvgay yaq,” ngoz tueq.