13
Vtvsuip Honc Jungc Kuy nuiyc Gvnhttuingc Kvjaz
1 Majuiuc ngaz kuex laukthuimx ngoc yaungc nuimshiq kox nuex kaz vraungx. Rumvrc luik nuex jungx shec tueq rulc rv-ngvlc, “Khuec vlvmz ngoz yaq kuex hakhix wanueyc waz thuimx rueq jungx shuex kvjaz maq jix tvsuip juing rvtueq,” ngoz tueq jungx tueq.Ref 13:1 2Kor 12:14; Wkh 35:30; Tvrac 17:6; Yoh 8:13
2 Kungkhux nuex mvrax shuimx wvnc tueq jix nuiyc vganc jix lotlaz muex ngaz rueq jungx vphaungx; kungkhux nuex lauknueyc ngoc yaungc ngaz kaz raungx ikaq, ngaz rueq jungx phaungx rulc rv-ngvlc majuiuc nuimshiq rulc yal wvnc tauk nuex muinz ngaz laukshiz jungx yek vphaungx. Kvruex kuex yix maq lauk ngaz httuiuc kaz ruiux nuimshiq vshiz muinz murx tvgurc shuex kvwawc luenx wvnc lvp tuinx rvmuq.
3 Christu kuex ngaz maq kvjak yaq lvmx hakhix kuex nuimshiq rueq thoz vphuinx rulc rv-ngvlc ngaz kaz ruiux yuq lvp shuinx. Christu kuex nuimshiq rulc rvbomc nyamc tueq nuex hungc vlaungc nulx muq maq vpiq luimc vkawc kuex nuimshiq muex tvkhic kuq shuex.
4 Yvmx khoc lac ngoz ruiux lec vpiq kuex yauk juinc bulx nuex but gay tueq baunglaung hungc vlaungc vyomx rvtueq ngoz ruiux muinz, majuiuc kuex Tishox luimc vkawc maq vtvraungx httax yaq. Nuiyshiq muinz vpiq rulc vshiz dvyx yaungc ningkhvnc nuex hungc vlaungc yomx vtix, yuq muinz nuimshiq rulc rvhumc hemc lvmz nuex nuiyshiq kuex Christu rulc vdvmz tvraungx vtix ningkhvnc nuex Tishox luimc vkawc kuex lvp wvnc vshix.
5 Nuimshiq kuex kvmluimx lvmx nuex phaungx vtuinx shuex phaungx muit lac kuex miqmac nuiyc miqmac kvhelc wuez kuinz. Kvkhoc vwiz vsoz rvhumc vtuinx kuex taungx wvnc ruiux yuq, nuimshiq thuinz vmungx nuex Christu httax yaq lvmx kuex rvkhauk laz tuiuz lvp wvnc shuinx.
6 Nuiyshiq kuex vwiz vsoz rvhumc vtueq taungx wvnc jix hez rvtiq lvmz kuex, nuimshiq rueq tuiuz vshuinx shvmx ngoz tueq ngaz rueq tvmaung vshaungx.
7 Nuimshiq rueq vbac vtac lvmx koayc tvkoc Tishox kox wawc nuiyshiq rueq vjux thoz vshix; kvkhoc shuimx kaz vshix lvmx kuex nuiyshiq miqmac shauk vgvnz lotlaungc wvnc jix htenc rvtiq lvmz tvkhic roc vtueq rvmuq, nuiyshiq kuex max lotlaungc jix ikhoc muex yaungx vtueq nuimshiq rueq vhvlx shuimc kay tvkoc vjux thoz vshix.
8 Yvmx khoc lac ngoz ruiux lec nuiyshiq rueq tsuingrux lvmx rulc rv-ngvlc muq juing yvmx muinz shuimx kaz miq, tsuingrux lvmx nuex dvyx jvp vtix.
9 Nuiyshiq hungc vlaungc yomx ruiux nuimshiq hungc vlaungc yungx vtuinx kvmac nuiyshiq kokez vtix, kvkhoc rvtueq nuimshiq kuex hunghtaungx yaq miq muex yaungc tvkoc nuiyshiq rueq vjux thoz vshix.
10 Nuimshiq rulc lvmx luz nuex httax tix baunglaung luik vruex wuiyq tvgurc wvnc vphaungx, vruex kuex vrangx vpangx tsanc hvlc maq shuimx miq tvkoc rvtueq, kvruex vrangx vpangx kuex nuimshiq tvyungc loayc kuy tvkoc rvtueq, vtvbac gay tvkoc rvmuq.
11 Ngvy phunox bix lex, majuiuc nuiyshiq rueq gvnhttuingc ngoz vphix! Hungx laz htaungx laz yaungx lot laz juing hunglaungx wuez kuinz; ngaz rueq kvmenc jenc jungx vphaungx kvjaz kuex tay vtueq, vdvmz dvmz thuinz vshiz maq httax ruiux nomic httax wuez kuinz. Kvkhoc httax ruiux yuq jix lungwawc nuiyc nomic httax yaq waz Tishox kuex nuimshiq rulc vdvmz nuex httax tuex.
12 Nuimshiq vdvmz dvmz vsawc htungx vlayx maq rvshup vtueq gvnhttuingc rvbomc wuez kuinz.
Tishox miqsaz lotlaz rueq nuimshiq muex gvnhttuingc ngoz kuq yaq.
13 Taungjix Yesu Christu ruimrix kejux, Tishox lungwawc nuiyc Vsawc Siyac maq lux rvyaungc lvmx kuex nuimshiq lotlaz rulc vdvmz nuex mhttax kueq.