9
Saul Nih Samuel A Ton
Benjamin phun mi pakhat a min Kish a si i a rum ngaimi a um; amah cu Abiel fapa a si, Abiel cu Zeror fapa, Zeror cu Bekorath fapa, Bekorath cu Afiah fapa a si; cun fapa pakhat a ngei i a min cu Saul a si, tlangval chuakthiam ngai a si. Israel mi lakah amah nakin aa dawh deuhmi pakhat hmanh an um lo; ahohmanh a liang cungin a lonh dih hna.
Saul pa Kish i laa cu an tlau i Kish nih a fapa Saul cu, “Sinum pakhat khan i kalpi law, tho law, laa kawl awkah cun va kal tuah,” tiah a ti. Cun annih nih Efraim tlangram kha an òol, cun Shalisha ram kha an òol, sihmanhsehlaw an hmu hna lo. Cun Shaalim ram kha an òol, sihmanhsehlaw khika zongah an um lo. Cun Benjamin peng kha an òol, sihmanhsehlaw khika zongah an hmu hna lo.
Zuf peng kha an phak tikah, Saul nih a sinum cu, “Ra, kir cang u sih, ka pa nih khan laa kong kha ruat ti loin, kanmah kong tu ah lungrethei in a um sual lai,” tiah a ti. Sihmanhsehlaw anih nih amah cu, “Zohhmanh, hi khua chungah hin Pathian mi pakhat a um i amah cu an hmaizah ngaimi a si; a chimmi vialte kha a tling dih ko. Khika ah va kal u sih; kan pawhhnawhmi kan khual tlawnnak kong hi a hei kan chimh khawh ko hnga dah kaw,” tiah a ti. Cun Saul nih a sinum sinah cun, “Sihmanhsehlaw, kan kal ahcun mipa cu zeidah kan put khawh lai? Kan zal chung i changreu a dih cang caah Pathian mi cu laksawng zeihmanh put awk a um òung lo. Zeidah kan ngeih?” tiah a ti. Sinum nih khan Saul cu a leh òhan i, “Zohhmanh, ngun shekel phar cheu li cheu khat ka ngei, kan lam a kan chimhnak dingah mah hihi Pathian mi cu ka pek lai,” tiah a ti. (Hlan lioah cun Israel mi hna lak i pakhatkhat nih Pathian kha hal an duh ahcun, “Ra tuah, hmutu sinah kal u sih,” tiah an rak ti tawn, zeicahtiah atu i profet timi hi hlanah cun hmutu ti a rak si.) 10 Cun Saul nih a sinum sinah cun, “Na bia a òha, ra, kal u sih,” tiah a ti. Cucaah Pathian mi a umnak khua ah khan an va kal.
11 Khua chung hung kal awk i fing an hun zawh lioah khin ti than awkah a rami ngaknu an ton hna i annih cu, “Hika ah hmutu kha a um maw?” tiah an hal hna. 12 Annih nih, “A um ko; zohhmanh u, nan hmaite ah khan a kal. I khulranh u; nihin ah hi khuami nih khuahrum bo ah khan raithawinak an ngeih caah khua chungah atu naite ah khan a ra. 13 Nannih nih khua chungah nan va luhka te in, khuahrum bo i rawl ei awk i a kal hlanah khan, nan va hmuh ko lai; amah nih raithawinak cu thluachuahnak a pek awk a si caah amah a rat hlanah cun mi nih khan an rak ei lai lo; cu hnuah cun sawmmi hna nih khan an ei lai. Cucaah cun hung kal u law, nan hung ton colh ko lai,” tiah an ti. 14 Cucaah khua ah khan an hung kal. Khua chung i an va luh lioah khan, Samuel cu khuahrum bo lei i a kalpah ah annih lei i a rat kha an hmuh.
15 Cun Saul a rat hlan ni khat ah khan Bawipa nih Samuel sinah khan a rak phuan i, 16 “Thaizing atu tik hrawngah hin, na sinah Benjamin peng i mipa pakhat ka rak thlah lai i amah cu ka mi Israel mi hna cung i bawi si awkah chiti na rak thuh lai. Amah nih ka mi hna cu Filistin mi kut chungin a khamh hna lai; zeitintiah an aunak kha ka sinah a phak cang caah ka mi hna nih hremnak an inmi cu ka hmuh cang,” tiah a ti. 17 Samuel nih Saul kha a hmuh tikah, Bawipa nih amah cu, “A kong kan chimh mipa kha mah pa hi a si! Amah hi ka mi hna uktu ding cu a si,” tiah a chimh. 18 Cun Saul nih Samuel kha hauka ah cun a hei fuh i, “Hmutu inn cu khuazei ah dah a si, ka chim tuah,” tiah a ti. 19 Samuel nih Saul cu a leh i, “Hmutu cu keimah hi ka si; ka hmaiah hin khuahrum bo leiah khan kal ko, zeitintiah nihin cu keimah sinah rawl na ei lai i thaizing ah kan kalter te lai i na ruah lengmangmi cu kan chimh dih lai. 20 Na laa, ni thum a tlau cangmi hna cu ruat len ti hna hlah, zeicahtiah an hmuh cang hna. Cun Israel mi hna lak i duh awk thil vialte cu aho caah dah an si? Nangmah le na pa chungkhar vialte hna caah an si lo maw?” tiah a ti. 21 Cun Saul nih a leh i, “Keimah cu Israel phun hna lakah a hme bik Benjamin phun mi ka si lo maw? Cun ka chungle hna cu Benjamin phun chung i a ummi chungkhar vialte hna lakah a nauta bik an si lo maw? A si kun ahcun, zeicahdah mah bantuk hin ka sinah bia na chim?” tiah a ti. 22 Cun Samuel nih Saul le a sinum kha a kalpi hna i innchung khaan ah a luhpi hna i an sawmmi mi 30 tluk hna lakah khan, upatnak hmun ah khan a òhutter hna. 23 Cun Samuel nih rawl chuangtu sinah khan, “ ‘A dang tein rak chia,’ ti i ka rak in pekmi covo kha rak pu tuah,” tiah a ti. 24 Cucaah rawl chuangtu nih cun a ke le a thaumi a mei kha a hun put hna i Saul hmaika ah cun a chiah hna; cun Samuel nih, “Zohhmanh, ka rak kenretmi cu hunh na si hih. Ei tuah; zeicahtiah sawmmi hna he nan ei òi nakhnga, caan tinhmi a tlin hlantiang, nangmah caah chiah a si,” tiah a ti.
Cucaah cu ni ah cun Saul cu Samuel sinah rawl a ei. 25 Cun khuahrum bo in khua chungah an run tikah inncung ah Saul cu ihnak a phahpiak i a it. 26 Cun ceu vukvak ah inncung i a ummi Saul cu Samuel nih a auh i, “Tho tuah, ka hei in thlah tuah lai,” tiah a ti. Cucaah Saul cu a tho i Samuel he cun an pahnih in khuachung lam ah khan an va chuak. 27 Cun khua pawngri lei i an vung kal lioah khan Samuel nih Saul sinah cun, “Na sinum kha kan lonh seh, hei chim tuah; cun a kan lonh tikah nang cu hika ah hin tlawm tein um ta rih tuah, Pathian bia cu nangmah kha kan hngalhter lai,” tiah a ti.