26
David Nih Saul Kha Zif Ah A Zuah
1 Cun Zif khuami hna cu Saul sinah Gibeah ah an ra i, “Jeshimon nichuahlei ah a ummi Hakhilah tlang ah David cu aa thup ko lo maw?” tiah an chimh. Ref 26.1: Slm 54 (A tlangpi)
2 Cucaah Saul cu a tho i Zif ramlak ah khan, Israel mi chungin thimmi 3-000 he tiah, Zif ramlak i David kha kawl awkah a vung kal.
3 Cun Saul cu Jeshimon in nichuahlei ah a ummi lam pawng i Hakhilah tlang ah khan a riak. Sihmanhsehlaw David cu ramlak ah khan a um ko; cun Saul nih ramlak ah a ka dawi ti kha a hngalh tikah,
4 David nih ngiatu a thlah hna i Saul cu a ra taktak ko, ti kha a hngalh.
5 Khi tikah David cu a tho i Saul riahnak hmun ah khan a ra; cun David nih Saul cu a ralkapbu haotu Abner, Ner fapa, he khan khuazei ah dah an ih ti kha a hmuh; Saul cu an riahhmun chungah cun a it i ralkapbu nih a velchum in an riahhnawh.
6 Cun David nih Hit mi Ahimelek le Joab unau Abishai, Zeruiah fapa, sinah khan, “Ahodah riahhmun chungah khin, Saul sinah khin, a vun ka zul lai?” tiah a ti.
Cun Abishai nih, “Keimah nih kan zulh lai,” tiah a ti.
7 Cucaah David le Abishai cu ralkapbu chung cun zan ah khan an lut; cun khaka ah khan Saul cu riahhmun chungah a rak it ko i a fei cu a lu hramah, vawlei ah a rak i bunh ko; cun Abner le ralkapbu hna cu a velchum in an it.
8 Khi tikah Abishai nih David cu, “Pathian nih nihin ah hin na ral cu na kut chungah an pek ko; cucaah fei in voi khat chunhte ah amah hi vawlei ah bunh chih ko ning, voi hnih ka chun lai lo,” tiah a ti.
9 Sihmanhsehlaw David nih Abishai cu, “Amah kha hrawk hlah; zeitintiah ahodah Bawipa chiti thuhmi cungah a kut a samh i mawh loin a um kho lai?” tiah a ti.
10 Cun David nih, “ Bawipa nih a nun bangin, Bawipa nih a thah te ko lai; asiloah a thih ni cu a phan te ko lai; asiloah raltuknak hmun ah a kal lai i a lotlau te ko lai.
11 Bawipa chiti thuhmi cung i ka kut samh awk cu Bawipa nih ka kham ko seh; sihmanhsehlaw a lu hram i a ummi fei kha le hranthawl kha la law kal u sih,” tiah a ti. Ref 26.11: 1Sam 24.6
12 Cucaah David nih Saul lu hram khan fei le hranthawl kha a lak hna i an kal. Ahohmanh nih cucu an hmu lo, a hngalh zong an hngal lo, ahohmanh zong an i hlau lo zeitintiah Bawipa sinin mitkuh thut kha an cungah a tlung i an i hngilh dih.
13 Cun David cu ralchan ah khan a va kal i lam hlatpi ah tlang cungah khan a dir i an karlak cu aa hlat ngaingai;
14 cun David nih ralkapbu kha le Ner fapa Abner kha a hei auh hna i, “Abner, na ka let lai lo maw?” tiah a ti.
Cun Abner nih, “Ahodah na si, siangpahrang a autu cu?” tiah a leh.
15 Cun David nih Abner cu, “Pa na si lo maw? Nangmah bantuk ahodah Israel mi lakah a um? A si kun ahcun zeicahdah siangpahrang na bawipa cu na kilven kun lo? Zeicahtiah mi pakhat nih siangpahrang na bawipa kha thah awkah a rak luhhnawh òung?
16 Hi thil na tuahmi hi a òha lo. Bawipa a nun bangin, nang cu thih awk na tlak, zeicahtiah Bawipa chiti thuhmi, na bawipa kha na kilveng lo. Siangpahrang lu hram i fei le hranthawl a ummi kha khuazei ah dah an um cang, hun zoh tuah ngat,” tiah a ti.
17 Saul nih David cu a hngalh i, “Mah cucu nangmah aw a si maw, David ka fapa?” tiah a ti. Cun David nih, “Keimah aw a si, ka bawipa, maw siangpahrang,” tiah a ti.
18 Cun anih nih, “Zeicahdah ka bawipa nih hin a salpa hi a dawi lengmang ko hnga? Zeidah ka tuahmi a um? Zei mawhnak dah ka kut chungah a um?
19 Cucaah ka bawipa siangpahrang nih hin a salpa ka bia hi ka ngaihpiak tuah seh. Keimah doh awkah an forhtu hi Bawipa a si ahcun, pekchanhnak hi cohlang ko seh; sihmanhsehlaw minung an si ahcun, Bawipa hmaiah chiat si ko hna seh, zeitintiah annih nih nihin ah hin Bawipa ro chungah covo ka ngeih nakhnga lo an ka dawi i, ‘Va kal law, pathian dang kha va bia hna,’ an ka ti.
20 Cucaah cun ka thisen hi Bawipa hmuhphak lonak vawlei ah luang hlah seh; zeitintiah vaking kah awkah tlang cungah ram a vaimi bantukin Israel siangpahrang nih ka nunnak kha hloh awkah a ra chuak cang,” tiah a ti.
21 Khi tikah Saul nih, “Ka palh cang, ra kir tuah, ka fapa David, ka nunnak cu na mit ah nihin ah hin a sun caah na cungah harnak ka tuah ti lai lo; zohhmanh, ka rak hrut hrimhrim ko i fak piin ka palh cang,” tiah a ti.
22 Cun David nih a leh i, “Maw siangpahrang, hika ah hin fei kha a um ko! Tlangval pakhat in rak thlah law ra la seh.
23 Bawipa nih mi zeipaoh kha a dinnak ca le zumhawktlak a sinak caah laksawng a pek cio hna; zeitintiah Bawipa nih nangmah cu nihin ah ka kut chungah an pek, asinain Bawipa chiti thuhmi cungah khan ka kut ka samh duh lo.
24 Zohhmanh, nangmah nunnak cu keimah mit ah nihin ah a sun bantukin ka nunnak cu Bawipa mit ah sung ve seh law, temhinnak vialte chungin ka chuah ko seh,” tiah a ti.
25 Cun Saul nih David sinah khan, “Ka fapa David, nangmah cu thluachuahnak hmu ko! Thil tampi na tuah lai i cu thil hna ah cun na hlawh a tling lai,” tiah a ti.
Cucaah David cu amah lam ah khan a kal i Saul cu amah hmun leiah khan a kir òhan.