29
Hezekiah Pennak
(2Sia 18.1-3)
Hezekiah cu kum 25 a ti ah pen hram a thawk i Jerusalem in kum 29 a pen. A nu min cu Abijah a si, Zekhariah fanu a si. A pa David nih a rak tuah bantuk khan amah nih Bawipa mithmuh i a dingmi kha a tuah.
Hezekiah Nih Biakinn A thianh
A bawi a kum khatnak, thla khatnak thla ah Bawipa inn i innka kha a hun hna i a remh hna. Tlangbawi hna le Levi mi hna kha a ratpi hna i nichuahlei kam tual ah khan a pumh hna i, annih cu a thawh hna i, “Levi mi hna, ka bia thei tuah u! Atu cu i thianh u law Bawipa nan pupa hna Pathian inn kha thianhhlimh tuah u, hmunthiang khan hmunthur kha hlonh u. Zeicahtiah kan pupa hna cu zumhtlak loin an um i Bawipa kan Pathian mithmuh ah a òha lomi thil kha an tuah; amah cu an hlawt i Bawipa umnak hmun cu kaa dang an hoihtak i an hnulei an chit. Innleng innka zong kha an khar hna i meiinn kha an hmih hna i Israel Pathian sinah khan zihmui zong an khang lo i khangh thawinak zong an pechan lo. Cucaah Bawipa thinhunnak cu Judah le Jerusalem cungah a tlung i tuksapur, khuaruahhar le serhsat awk thil ah, nannih nih nan mit hrim i nan hmuh bang hin a ser hna. Cucaah zohhmanh u, hi ruangah hin kan pupa hna cu vainam in an rak thi i kan fapa le kan fanu le kan nupi hna cu sal ah an rak tang. 10 Òih a nungmi thinhunnak cu kan sinin aa mer nakhnga, Bawipa, Israel Pathian sin i biakamnak ser cu atu cu ka lung i a ummi a si. 11 Ka fapale hna, atu cu thluarthlap in um hlah u, zeitintiah Bawipa nih nannih cu a hmai i dir awk le amah rianòuan awk le amah rianòuantu si awk le amah sinah zihmui khangh awkah an thim hna,” tiah a ti.
12 Khi tikah Levi mi cu an tho, Amasai fapa Mahath, Azariah fapa Joel, Kohath mi hna fapa hna; cun Merari fapa hna chungin, Abdi fapa Kish, Jehallelel fapa Azariah; cun Gershon mi hna chungin Zimmah fapa Joah, Joah fapa Eden; 13 Elizafan fapa hna chungin, Shimri le Jeuel; cun Asaf fapa hna chungin, Zekhariah le Mattaniah; 14 Heman fapa hna chungin, Jehuel le Shimei; Jeduthun fapa hna chungin, Shemaiah le Uzziel. 15 An unaule kha an pumh hna i anmah kha an i thianh i Bawipa bia in siangpahrang nih nawl a pek hna bangin, Bawipa inn thianh awkah cun an lut. 16 Tlangbawi hna cu Bawipa inn chungchin thianh awkah khan an lut i Bawipa biakinn chungah thurhhnawmhnak an hmuhmi vialte kha Bawipa inn inntual ah an chuahpi hna i Levi mi hna nih khan an lak i Kidron tivarek ah khan an kalpi. 17 Thianhhlimh cu thla khatnak thla a ni khat ni ah an thawk i cu thla ni riat ni ah cun Bawipa innleng kha an phan; cun ni riat chung Bawipa inn cu an thianh i cu thla ni hleiruk ni ah cun an lim.
18 Cun Siangpahrang Hezekiah sinah cun an va lut i, “ Bawipa inn kha kan thianh dih cang, khangh thawinak biakòheng le a umkheng vialte, hun camcinmi changreu cabuai le a umkheng vialte, kan thianh dih hna. 19 Cun zumhtlaklo a si tikah Siangpahrang Ahaz nih a hlawtmi umkheng vialte kha kan timh dih hna i kan thianh dih hna; cun zohhmanh, Bawipa biakòheng hmaiah an um,” tiah an ti.
20 Cun Siangpahrang Hezekiah cu zingka tein a tho i khua chung bawi kha a pumh hna i Bawipa inn ah khan a hung kal. 21 Cun ram le hmunthiang le Judah ca i sual thawinak caah cawtum pasarih, tuukawng pasarih, tuufa pasarih le mehehtum pasarih an rak put hna. Cun Aaron fapa tlangbawi hna kha Bawipa biakòheng cung i pekchanh awkah nawl a pek hna. 22 Cucaah cawtum kha an thah hna i tlangbawi nih an thi kha an lak i biakòheng kha an theh; cun tuukawng kha an thah hna i an thi khan biakòheng kha an theh; cun tuufa kha an thah hna i an thi khan biakòheng kha an theh. 23 Cun sual thawinak ca mehehtum kha siangpahrang le aa pummi hna sinah khan an ratpi hna i an cungah an kut an chuan i 24 tlangbawi hna nih khan an thah hna i an thi cun Israel mi vialte ca i remnak sernak ah biakòheng cungah khan sual thawinak an tuah. Zeitintiah siangpahrang nih khan khangh thawinak kha le sual thawinak kha Israel mi vialte caah tuah awk a si lai tiin nawl a pek hna.
25 Cun David le siangpahrang i a hmutu Gad le profet Nathan nawl peknak ning khan, Levi mi cu Bawipa inn chungah khan sumsel le tingtang le thonglawi he tiah a chiah hna; zeitintiah nawlbia cu Bawipa sinin a profet hna hmang in a ra. 26 Levi mi hna cu David thilri he khan an dir i tlangbawi hna cu muko he khan an dir. 27 Khi tikah Hezekiah nih, khangh thawinak cu biakòheng cungah pekchanh si seh tiah nawl a pek. Cun khangh thawinak cu thawk a si tikah, Bawipa sin hlasak le muko tum cu David nih a sermi hlasaknak thilri he khan an thawk ve. 28 Aa pummi nih cun an zapi in an biak, hlasatu nih khan hla an sak, muko tumtu nih khan muko an tum; mah vialte hi khangh thawinak a dih hlantiang an tuah. 29 Cun pekchanhnak kha a dih tikah, siangpahrang le a sin i a ummi vialte nih khan an lu an khun i an biak. 30 Cun Siangpahrang Hezekiah le bawi hna nih khan Levi mi hna cu David bia le hmutu Asaf bia in Bawipa cu hla in thangòhat u, tiah nawl an pek hna. Cun annih nih lunglawmhnak in thangòhatnak hla kha an sak i an kun i an biak.
31 Khi tikah Hezekiah nih, “Nannih nih Bawipa sinah nan i thianh cang; ra u law raithawinak le lawmhnak thawinak cu Bawipa inn ah rak pu tuah hna u,” tiah a ti. Cun aa pummi nih raithawinak hna le lawmhnak thawinak hna kha an rak put i duhnak lungthin a ngeimi paoh nih khan khangh thawinak an rak put. 32 Aa pummi nih khangh thawinak an rak putmi cu cawtum 70, tuukawng 100 le tuufa 200 an si; mah vialte hi Bawipa sin i khangh thawinak caah a si. 33 Cun thilthiang pekchanhmi cu cawtum 600 le tuu 3-000 an si. 34 Sihmanhsehlaw tlangbawi cu an tlawm tuk caah khangh thawinak sa vialte cu a phaw an hawk cawk hna lo, cucaah tlangbawi dang hna nih an i thianh hlantiang, an unau Levi mi hna nih khan rian cu a dih tiang an bawmh hna § zeicahtiah Levi mi hna cu lungthin ah tlangbawi hna nih an i thianhnak nakkhan an ding deuh. 35 Khangh thawinak tampi lengah cun daihnak thawinak ca i sathau le khangh thawinak ca i thletmi an um. Cuticun Bawipa inn i rianòuannak cu umter òhan a si. 36 Cun Pathian nih mi zapi ca i a tuahmi caah khan Hezekiah le mi vialte cu an i lawm; zeicahtiah cu thil cu duak tiah a hung ummi a si ko.