16
Asa le Benhadad An Òang Òi
(1Sia 15.16-24)
1 Asa a bawi kum 36nak ah Israel siangpahrang Baasha nih Judah cu a hung doh i Judah siangpahrang Asa sinah khan ahohmanh luhter lo le chuahter lo awkah Ramah khua kha a ser.
2 Cun Asa nih Bawipa innchung le siangpahrang innchung i a ummi ro chung khan ngun le sui kha a lak hna i Siria siangpahrang Benhadad, Damaskas i a ummi kha a kuat i,
3 “Ka pa le na pa karlak i a rak um bang khan, keimah le nangmah karlak ah òan òinak um seh; zohhmanh, ngun le sui kan kuat; cucaah va kal law Israel siangpahrang Baasha nih hin a ka kirtak nakhnga, amah he nan òan òinak kha va chat tuah,” tiah a ti.
4 Cun Benhadad nih Siangpahrang Asa kha a bia a ngaih i a ralkapbu haotu hna kha Israel mi khua doh awkah a thlah hna i Ijon, Dan, Abelmaim le Naftali i thil chiahnak khua vialte kha an tei hna.
5 Cun mah cucu Baasha nih a theih tikah Ramah khua ser kha a ngol i a rian kha a òhulh.
6 Cun Siangpahrang Asa nih Judah mi vialte kha aa kalpi hna i Baasha nih Ramah khua sernak i a hmanmi lung le thing kha an phorh hna i Geba le Mizpah khua sernak ah a hman hna.
7 Cu caan ah cun hmutu Hanani kha Judah siangpahrang Asa sinah cun a ra i, “Siria siangpahrang cu naa bochan i Bawipa na Pathian cu naa bochan lo caah, Siria siangpahrang ralkapbu cu na chuahter cang hna.
8 Ethiopia mi hna le Libia mi hna kha ralkapbu ngan ngaingai, rangleng tam hringhran le rangcung ralkap tam hringhran he a ummi an si lo maw? Asinain, Bawipa kha naa bochan caah annih cu na kut chungah amah nih an pek hna.
9 Zeitintiah vawlei cung dihlak ah hin Bawipa mit cu aa chawk dih i amah lei i an lung soisel awk a um lomi hna cungah a òhawnnak kha a langhter. Hi thil ah hin hrut piin na tuah cang; zeitintiah atu cun ral na ngei cang lai,” tiah a ti.
10 Khi tikah Asa cu hmutu cungah khan a thin a hung i hi kong ah a cungah a thin a hun caah thong chungah hreng a khenh. Cun Asa nih mi cheukhat cungah hi caan ah hin hremnak zong a tuah.
11 Asa tuahsernak hna cu a hramthawk in a donghnak tiang Judah le Israel Siangpahrang hna cauk chungah aa òial.
12 Asa cu a bawi kum 39nak kum ah a ke ah zawtnak a ing i a zawtnak cu a fak ngaingai; asinain a zawtnak hmanh ah cun Bawipa kha a kawl lo i sihmanhsehlaw sibawi hna sin tu khan bawmhnak a kawl deuh.
13 Cun Asa cu a pupa sinah a it, a bawi kum kum 41nak kum ah a thi.
14 David khua chungah amah nih aa cawhmi thlan ah khan an vui. Zihmui ser thiam hna nih an sermi zihmui phun zakip in a khatmi ruakkuang ah khan an suan; cun amah hmaizahnak ah mei nganpi an tih.