22
1 Cun David nih, “Hika ah hin Bawipa Pathian inn cu a si lai i hika ah hin Israel mi ca i khangh thawinak biakòheng cu a si lai,” tiah a ti.
David Nih Biakinn Ca A Timh
2 David nih Israel ram chung i ramdangmi a ummi hna kha i pumh awkah nawl a pek hna i Bawipa inn saknak caah lung attu hna kha lung a remhter hna.
3 David nih kutka innka hna le kapza hna khenhnak thir caah khan thir tampi a rak chiah, cun dar cu thlai cawk loin a chiah i
4 sidar thingah cu rel cawk loin a chiah; zeitintiah Sidon mi le Tair mi nih sidar thing tampi David sinah khan an rak phorh.
5 Cun David nih a thawh i, “Ka fapa Solomon hi a ngakchia i zeihmanh a hngal rih lo, cun Bawipa ca i sak dingmi inn cu rumra a um hringhranmi, a minthannak le a sunparnak ram vialte ah a thangmi a si awk a si; cucaah ka rak timhlamh chung lai,” tiah a ti. Cucaah David nih a thih hlanah thilri tampi a damhtak.
6 Cun a fapa Solomon cu a auh i Bawipa, Israel Pathian ca i inn sak cu a cungah a khinh.
7 David nih Solomon cu a thawh i, “Ka fapa, Bawipa ka Pathian min thangòhatnak ca i inn sak cu ka lung chungin ka rak i ruahchihmi a si. Ref 22.7-10: 2Sam 7.1-16; 1Cha 17.1-14
8 Sihmanhsehlaw Bawipa bia cu ka sinah a ra i, ‘Thisen tampi na chuah i ral ngan kha na doh hna; keimah hmaiah vawlei cungah thisen tampi na chuah caah ka min thangòhatnak caah inn na sa lai lo.
9 Zohhmanh, fapa pakhat na hrin lai; amah cu daihnak mi a si lai. Amah cu a velchum i a ummi ral vialte hna lakin daihnak ka pek lai; zeitintiah a min cu Solomon a si lai i amah chan chungah cun Israel mi cu daihnak le remnak ka pek hna lai.
10 Amah nih cun ka min caah inn pakhat a sak lai. Amah cu ka fapa a si lai i keimah cu a pa ka si lai i a siangpahrang bawiòhutdan cu Israel chungah zungzal in ka fehter lai,’ a ti.
11 Cucaah ka fapa, nangmah kong ah a chimmi bia bangin Bawipa na Pathian ca i inn saknak ah cun na hlawhtlin nakhnga, Bawipa cu na sinah um ko seh.
12 Nangmah cu Israel mi zohkhenh awk òuanvo kha an pek tikah Bawipa na Pathian phungbia cu na zulh nakhnga, Bawipa nih fimnak le hngalhthiamnak in pe ko seh.
13 Khi tikah Bawipa nih Moses cu Israel mi caah a pekmi phunglam le nawlbia hna kha òha tein na zulh hna ahcun, na hlawh a tling lai. Òhawng ngai le ralòha in um tuah. Òih hlah; na lung dong hlah. Ref 22.13: Jos 1.6-9
14 Har ngaiin Bawipa inn caah cun sui talen sing khat, ngun talen nuai khat, dar le thir cu thlai cawk lo ka timh cang, a tam hringhran ko; thingah le lung zong ka timh cang. Mah vialte ah hin na chap awk a si lai.
15 Rianòuantu tlamtling tein na ngei ko: lung attu, lung remhtu, inn sak thiam, zungthiam a phunphun rel cawk lo,
16 sui siseh, ngun siseh, dar siseh, thir siseh ser a thiammi na ngei ko hna. Tho law òuan colh ko! Bawipa cu na sinah um ko seh!” tiah a ti.
17 David nih Israel mi haotu vialte zong kha a fapa Solomon cu bawmh awkah nawl a pek hna i,
18 “ Bawipa nan Pathian cu nan sinah a um lo mei? Cun amah nih kam kip ah daihnak an pe hna lo mei? Zeitintiah hi ram chung i a ummi hna cu nan kut chungah an pek hna i ram cu Bawipa le a mi hna hmaiah tei a si cang.
19 Atu cu Bawipa nan Pathian kha nan ruahnak le nan lungthin in biatak tein kawl tuah u. Bawipa biakamnak kuang le Pathian umkheng thiang hna cu Bawipa min ca i sakmi inn chungah khan luhpi an si nakhnga, tho u law Bawipa Pathian i hmunthiang cu sa tuah u,” tiah a ti hna.