15
Kuang Kha Jerusalem Ah An Ratpi
(2Sam 6.12-23)
1 David nih amah caah David khua chungah khan inn a sak hna i Pathian kuang caah khan hmun pakhat a timh i thlam pakhat a bunhpiak.
2 Cun David nih, “Levi mi dah ti lo nih cun ahohmanh nih Pathian kuang cu i zawn hna hlah seh, zeitintiah annih cu Bawipa nih Bawipa kuang i zawnh awk le a rian òuan zungzal awkah a thim hna,” tiah a ti. Ref 15.2: Deu 10.8
3 Cun Bawipa kuang cu a ca i a timhmi hmun i hun kalpi awkah, David nih Israel mi vialte cu Jerusalem ah a pumh hna.
4 Cun David nih Aaron fapa hna le Levi mi hna kha a pumh hna:
5 Kohath fapa hna chung khan, haotu bik Uriel le a unau 120;
6 Merari fapa hna lakin, haotu bik Asaiah le a unau 220;
7 Gershom fapa hna chungin, haotu bik Joel le a unau 130;
8 Elizafan fapa hna chungin, haotu bik Shemaiah le a unau 200;
9 Hebron fapa hna chungin, haotu bik Eliel le a unau 80;
10 Uzziel fapa hna chungin, haotu bik Amminadab le a unau 112.
11 Cun David nih tlangbawi Zadok le Abiathar le Levi mi Uriel, Asaiah, Joel, Shemaiah, Eliel le Amminadab kha a kawh hna i,
12 annih cu, “Nannih cu Levi mi hna chung i pale innchungkhar hna lu cio nan si; nannih nih Bawipa Israel Pathian kuang kha, ka timhpiakmi hmun ah cun nan hunpi nakhnga nan unau le he i thianh tuah u.
13 A voi hmasa bik ah khan nannih nih nan put lo caah Bawipa kan Pathian nih kan cungah a thinhunnak a langhter; zeicahtiah kannih nih hitin tuah awk a si lai ti i fehter ciami ning khan kan rak zohkhenh lo,” tiah a ti hna.
14 Cucaah Bawipa, Israel Pathian kuang cu hun zawnh awkah tlangbawi hna le Levi mi hna cu an i thianh.
15 Cun Moses nih Bawipa bia ningin nawl a pek bangin, Pathian kuang cu Levi mi hna nih a lang hna khan an liang in an i zawn. Ref 15.15: Exo 25.14
16 David nih Levi mi haotu bik hna kha, nannih nan unaule hna cu hlasatu lunglawmhnak thawng thanter awkah, aw dawh thilri fak piin a tum ding le tingtang le thonglawi le sumsel a tum dingah nan thiah hna lai, tiah a ti hna.
17 Cucaah Levi mi hna nih cun mah hna hi an thiah hna: Joel fapa Herman le a unau hna Berekhiah fapa Asaf le an unau hna Merari fapa hna lakin Kushaiah fapa Ethan;
18 cun anmah sinah cun an unau hna dot hnihnak pawl, Zekhariah, Jaaziel, Shemiramoth, Jehiel, Unni, Eliab, Benaiah, Maaseiah, Matti-thiah, Elifelehu, le Mikneiah, cun kutka cawngtu Obed-edom le Jeiel.
19 Hlasatu Herman le Asaf le Ethan cu dar sumsel tumtu ding an si;
20 Zekhariah, Azeiel, Shemiramoth, Jehiel, Unni, Eliab, Maaseiah, le Benaiah cu Alamoth aw in tingtang tumtu ding an si;
21 Sihmanhsehlaw Mattithiah Elifelehu, le Mikneiah, Obed-edom, Jeiel le Azaziah hna cu Sheminith aw in thonglawi in hruaitu ding an si.
22 Levi mi hla ah a hruaitu hna Chenaniah nih hla cu a thiam caah a hruai awk hna a si lai.
23 Berekhiah le Elkanah cu kuang ca i kutka cawngtu an si lai.
24 Shebaniah, Joshafat, Nethanel, Amasai, Zekhariah, Benaiah le Eliezer, tlangbawi hna nih Pathian kuang hmaiah muko kha an tum hna lai. Obed-edom le Jehiah zong kuang ca i kutka cawngtu an si ve lai.
25 Cucaah David le Israel mi upa hna le a thong pawl haotu hna kha, Bawipa biakamnak kuang cu Obed-edom inn in lunglawmhnak he va lak awkah an kal.
26 Cun Bawipa biakamnak kuang a zawntu Levi mi hna cu Pathian nih a bawmh hna caah, annih nih cawtum pasarih le tuutum pasarih an thawi hna.
27 David cu lahmangòhia angki fual in aa thuam, kuang a zawntu Levi mi vialte hna le hlasatu hna le hlasatu hna i an hla a hruaitu Khenaniah zong kha cu bantuk cun an i thuam ve; cun David cu laa in tahmi tlangbawi angki aa hruk.
28 Cuticun muko le saki le sumsel aw zulh cun Israel mi vialte nih au pah in Bawipa biakamnak kuang cu an hunpi i hla fak piin an sa i tingtang le thonglawi kha fak piin an tum hna.
29 Cun Bawipa biakamnak kuang cu David khua i a rat lioah khan, Saul fanu Mikhal nih khan thlalangawng in a hei zoh i Siangpahrang David a lam len ko le aa nuamh len ko kha a hei hmuh i a lung chungin a nihsawh.