SALM 89
Pathian Cu Zumhawktlak A Si
(1Sia 4.31)
Bawipa, a fekmi na dawtnak cu
hla in ka sak zungzal ko lai i
zumhawktlak na sinak cu ka chim
thluangthluan ko lai.
Na dawtnak cu zungzal in
a hmun lai ti kha ka hngalh,
zumhawktlak na sinak cu
van tlukin a fek.
Naa thawh i, “Ka thimmi sinah
bia kaa kam cang;
ka sal David cu bia ka kam i,
‘Na tefa pakhat cu siangpahrang
a si zungzal lai;
na pennak cu zungzal in
ka hmunhter lai,’ ka ti,” na ti.
Selah
Ref 89.4: 2Sam 7.12-16; 1Cha 17.11-14; Slm 132.11; Lam 2.30
 
Vancung pathian hna nih khin
khuaruahharmi thil na tuahmi
hna cu hla in an sak hna;
Bawipa, zumhawktlak na sinak cu
hla in an thangòhat.
Bawipa, vancung i a ummi khi
nangmah bantuk ahohmanh
an um lo,
pathian hna lakah hin ahohmanh
nangmah tluk an um lo.
Nangmah cu pathian hna nih
an khuakhannak bu chungah khan
an in upat i
na kiang i a ummi vialte nih khan
an in òih dih.
 
Lianngan Bik Bawipa Pathian,
ahohmanh nangmah tluk i
a òhawngmi an um lo;
zeizong vialte ah nang cu
zumhawktlak na si, Bawipa;
nangmah nih rilipi cu na uk i
a tilet cu na daihter hna.
10 Limkeng Rahab cu na tei i na thah;
a liannganmi na òhawnnak in
na ral cu na tei hna.
11 Vawlei hi na ta a si, van zong khi
na ta a si ko;
vawlei le a cung i a ummi thil
vialte hi na sermi an si;
12 nangmah nih Chaklei le Thlanglei
kha na ser hna,
Tabor Tlang le Hermon Tlang nih
lunglawmhnak in hla in
an in thangòhat.
13 Zeitluk in dah na lianhngan!
Zeitluk in dah na òhawn!
14 Na pennak cu dinnak le biading
cungah a hram bunh a si,
na tuahmi thil kip chungah hin
dawtnak le zumhawktlak
sinak an um.
 
15 Hla in nangmah an biami cu
milunglawm an si,
na zaangfahnak ceunak chung i
a ummi cu lunglawmmi an si.
16 Nangmah thawngin chun nitlak
an i lawm i
na òhat ruangah nangmah cu
an in thangòhat.
17 Nangmah nih teinak ngan pipi
na kan pek,
na zaangfahnak thawngin teinak cu
kan hmu,
18 cu ti kan hmuhnak cu
a kan hupphengtu kha nangmah
thimmi a si caah a si;
nangmah Israel Mi Thiang nih
kan siangpahrang cu na kan pek.
Pathian Nih David Bia A Kamh
19 Zumhawktlak a simi
na sal hna sinah
hlan liopi ah
langhnak in bia na chim i,
“Ralkap minthang pakhat cu
bawiluchin ka chinh cang;
mizapi hna chungin thimmi kha
bawiòhutdan cu ka pek cang.
20 Ka sal David cu ka thim cang i
nan siangpahrang ah ka ser cang. Ref 89.20: 1Sam 13.14; Lam 13.22; 1Sam 16.12
21 Ka thazang cu a sinah a um
zungzal lai i
ka òhawnnak nih a òhawnter lai.
22 A ral nih zeitikhmanh ah
an tei lai lo i
miòhalo nih an tei bal lai lo.
23 A ral cu ka rial dih hna lai i
amah a huatu cu ka thah hna lai.
24 Amah cu ka dawt zungzal lai i
a cungah zumhawktlak in
ka um zungzal lai;
ral teinak kha ka pek zungzal lai.
25 A penmi a ram cu Mediterranean
Rili in Zufrates Tiva tiang
ka phakter lai.
26 Keimah cu a ka thawh lai i,
‘Nangmah cu ka pa le ka Pathian na si;
a ka hupphengtu le ka khamhtu
na si,’ a ka ti lai.
27 Amah cu ka fater ah ka ser lai i
siangpahrang vialte lak i
a ngan bik ka siter lai. Ref 89.27: Biat 1.5
28 A sin i bia kaa kammi cu
ka tuah zungzal lai i
amah he kan biakamnak cu
zungzal in a hmun lai.
29 A tefa pakhat cu siangpahrang
a si zungzal lai;
a bawiòhutdan cu van a hmunh
chung paoh a hmun ve lai.
 
30 “Sihmanhsehlaw a tefa hna nih khan
ka nawlbia an zulh duh lo i
ka phung ningin an nun lo i
31 ka cawnpiakmi hna kha zei ah
an rel lo i
ka chimhmi hna kha
an zulh lo ahcun,
32 an sualnak ruangah khan dan
ka tat hna lai i
palhnak an tuahmi ruangah khan
fungfek in ka tuk hna lai.
33 Sihmanhsehlaw David dawt kha cu
ka ngol lai lo,
bia ka kamhmi zong kha
ka tlolh lai lo.
34 Amah he bia kan i kamnak kha
ka hrawk lai lo,
amah sin i bia ka kammi cu
pakhatte hmanh ka let òhan lai lo.
 
35 “Voi khat ah zungzal ca in
bia kaa kam;
cu kaa kammi cu:
‘David cu ka hleng bal lai lo,’
ti hi a si.
36 Tefa a ngei zungzal hna lai i
ni a tlan chung paoh cu
a pennak kha
keimah nih ka cawnghpiak lai.
37 Thlapa cu van ah khin zumhawktlak
tehte a si bantukin
cu thlapa bantuk cun a pennak cu
a fek lai,” na ti.
Selah
Siangpahrang A Sungh Òahnak Hla
38 Sihmanhsehlaw na thimmi
siangpahrang cungah cun
na thin a hung i
amah cu na kaltak i na hlawt cang.
39 Na sal sin i bia na kammi cu
na hrawh i
a bawiluchin cu leidip lakah
na hlonh.
40 A khua kulhnak cu na chimh dih hna i
a ralhau cu rawk relrul in
na kaltak hna.
41 Aa chawkmi paoh nih a thil kha
an fir i
a innpa pawl nih an nihsawh.
42 Teinak cu a ral hna tu kha
na pek hna i annih cu
lunglawm in na umter hna.
43 A hriamnam cu santlailo ah
na ser hna i
raltuknak hmun ah na sunghter.
44 A bawifung kha na lakpiak i
a bawiòhutdan cu vawlei ah
na hrilh.
45 A kum nih a phak hlanah
na tarter i hmaichiatnak nih
a zual in a zual.
Selah
Khamhnak Ca Thlacamnak
46 Maw Bawipa, zei can dah
naa thuh lai?
Zungzal in maw naa thuh lai?
Na thinhunnak cu mei bangin
zei can dah a alh lai?
47  Bawipa, minung cu a nunnak hi
zeitluk in dah a tawi ti kha
philh hlah;
mi vialte cu a thi dingin
na kan ser dih kha philh hlah!
48 Ahodah thi loin a nung zungzal
kho lai?
Zeitindah mi nih cun thlan cu
a hrial khawh lai?
Selah
 
49 Maw Bawipa, hlan lio i
na dawtnak
na rak langhtermi hna kha
khuazei ah dah an si dih?
David bia na rak kamhmi kha tah,
khuazei ah dah an um kun?
50 Na sal nih nihsawhnak ka in kha
philh hlah law
Pathian zei i a rel lomi hna nih
an ka serhsatnak kha
philh sawh hlah.
51  Bawipa, na thimmi siangpahrang hi
na ral pawl nih an zawmhtaih
hringhran ko!
A kalnak kip ah khan an nihsawh.
 
52  Bawipa cu zungzal in thangòhat
si ko seh!
Amen! Amen!