5
1 Nan lak i upa hna kha upa a si vemi le Khrih temhinnak a hmu vemi le phuan a si te laimi sunparnak hrawm ve awkin aa ruahchanmi keimah nih forh kan duh hna,
2 Nan òuanvo ah chiahmi Pathian tuurun kha zohkhenh hna u, hnekchom si loin lungtho te le ningzah awktlak miaknak si loin lungsi tein khal ko hna u.
3 Nan zohkhenmi hna kha a uk in uk loin tuurun caah zohchunh awktlak tu si u.
4 Tuukhal zik a langh tikah a ziam lomi sunparnak luchin kha nan hmuh lai.
5 Cu bantukin nannih a no deuhmi hna nih upa hna an nawl ngai ko u. Nan dihlakin pakhat le pakhat cungah toidornak in i thuam ko u; zeitintiah “Aa porhlawmi cu Pathian nih a duh lo, sihmanhsehlaw mi toiah aa dormi cu vel a ngeih hna.”
6 Cu a si caah a liannganmi Pathian kut tangah i toidor ko u; a caan a cut tikah an hlercawi hna lai.
7 Nan lung retheihnak vialte a cungah chuang ko u, zeitintiah nan zawn an ruah ko hna.
8 Fimhring te le hriphrio tein ot ko u. An ralchantu khuachia cu chiandeih a hrum awrmarmi bantukin pakhatkhat seh awkin nan velchum ah aa chawk len ko.
9 Nan zumhnak ah fel u law amah cu do u, vawlei pumpuluk ah nan unau hna zong cu bantuk cun an temh a herh ve ti kha hngal ko u.
10 Caan tawite nan temh hnuin Khrih ah a hmunmi sunparnak co awkah an autu hna, velngeihnak in a khatmi Pathian hrimhrim nih an tlinter hna lai, an fehter hna lai i an òhawnter hna lai.
11 Amah cungah pennak cu zungzal in zungzal tiang um ko seh. Amen.
12 Zumhtlak ah ka ruahmi unau Silvanas kut in ca tawite kan kuat hna; cucu Pathian vel taktak a si ti kan forhnak hna kan thanhnak hna a si, cu ah cun fek tein dir ko u,
13 Babilon Khrihfabu, nanmah bantukin auh ve a simi hna nih a lang in nan kut an in tlaih hna. Ka fapa Marka zong nih an tlaih ve hna.
14 Pakhat le pakhat dawtnak in i hnam u.
Khrih ah a ummi nan dihlak cungah daihnak um ko seh.