31
Midian Mi Kha Israel Mi Nih Phu An Hlam Hna
1 Bawipa nih Moses cu a chawnh i,
2 “Midian mi hna cungah Israel mi hna phu cu va hlam tuah; cu hnuah na mi hna sinah pumh na si lai,” tiah a ti.
3 Cun Moses nih mi hna sinah cun, “Midian cungah Bawipa phuhlamnak tuah awkah annih nih Midian kha an doh nakhnga nannih lak in raldohnak caah mi thim hna u.
4 Raldohnak ah cun Israel miphun vialte chungin mi 1-000 cio nan thlah hna lai,” tiah a ti.
5 Cucaah Israel mi thong tampi chungin, phun khat chungin 1-000 cio, 12-000 cu raldoh awk caah hriamnam an tlai.
6 Moses nih phun khat chungin 1-000 cio cu le, tlangbawi Eleazar fapa Phinehas a kut in hmunthiang umkheng le ralrin peknak muko aa putmi cu, raldohnak ah a thlah hna.
7 Bawipa nih Moses nawl a pek bangin, Midian cu an doh; pa vialte kha an thah hna.
8 An thahmi hna lakah Midian mi siangpahrang hna, Evi, Rekem, Zur, Hur, le Reba zong an i tel; Beor fapa Balaam zong nam in an thah.
9 Cun Israel mi nih Midian nu hna le an ngakchia hna cu sal ah an tlaih hna; an caw vialte le an tuurun le an thilri vialte hna cu hranchaw ah an lak hna.
10 An umnak hmun i an khua vialte hna le an riahnak hmun vialte hna cu mei in an khangh i
11 thil le hranchaw vialte cu minung siseh, saram siseh an lak dih.
12 Cun sal hna le hranchaw hna le thilri hna cu Moses le tlangbawi Eleazar le Israel mibu sinah cun, Moab nelrawn i Jordan tiva kam Jeriko zawn i an riahhmun ah khan an rak put hna.
13 Moses le tlangbawi Eleazar le mibu hruaitu vialte hna nih khan riahhmun leng i va don hna awkah an chuak.
14 Cun Moses cu ralbawi hna, thong cung i nawlngeimi hna le za cung i nawlngeimi hna, raldohnak in a rami hna cungah khan a thin a hung.
15 Moses nih annih cu, “Mah nu vialte hi nan zuah ko hna mu?
16 Zohhmanh, hi mi hrimhrim hna hi Balaam fimchimhnak thawngin Peor kongah khan Israel mi cu Bawipa nawl a buartertu an si, cu caah rai kha Bawipa mibu cungah khan a tlung. Ref 31.16: Nam 25.1-9
17 Cu a si caah ngakchia hna lak i pa vialte kha that hna u law, pa a hngal cangmi nu vialte kha that hna u.
18 Sihmanhsehlaw pa a hngal rih lomi ngaknu vialte hna cu nanmah caah i zuah hna u.
19 Riahhmun lengah ni sarih riak u; nannih lakah mi a thatmi paoh le miruak a tawngmi paoh nih nanmah le nan sal hna cu ni thumnak ni le ni sarihnak ni ah nan i thianh lai.
20 Puan paohpaoh le saphaw in sermi thil paohpaoh le meheh hmul in sermi thil vialte le thing in sermi paohpaoh cu nan thianh hna lai,” tiah a ti.
Hranchaw Phawtnak
21 Cun tlangbawi Eleazar nih raldohnak ah a kalmi ralkap hna sinah cun: “Mah hihi Bawipa nih Moses nawl a pekmi phungbia i nawlbia cu a si:
22 sui, ngun, dar, thir, canphio le suan,
23 mei a ing khomi hna lawnglawng cu, mei chungah nan hliau hna lai i an thiang lai. Asinain tlenghnak ti zongin thianter an si ve lai i mei a ing kho lomi thil paoh cu, ti in nan tlengh hna lai.
24 Ni sarihnak ni ah nan thil kha nan suk hna lai i nan thiang lai; cu hnuah riahhmun chungah nan lut lai,” tiah a ti.
25 Bawipa nih Moses cu a chawnh i,
26 “Nangmah le tlangbawi Eleazar le mibu chung i phun cio lu hna nih khan hranchaw lakmi cu minung he saòil he rel hna u.
27 Cun hranchaw cu raldohnak i a kalmi ralkap hna le aa pummi vialte hna caah cheu hnih ah nan cheu lai.
28 Cun raldohnak ah a kalmi ralkap hna sinin Bawipa caah vo na lak lai, minung si hna seh, cawtum si hna seh, laa si hna seh, tuurun si hna seh, 500 ah pakhat in;
29 hnarcheu an covo a simi chung khan na lak lai i Bawipa sin i pekchanhnak caah tlangbawi Eleazar kha na pek lai.
30 Cun Israel mi nih an covo a simi hnarcheu chung khan, minung si hna seh, cawtum si hna seh, tuurun si hna seh, saòil vialte si hna seh, 50 ah pakhat in na lak lai i Bawipa puan biakinn a zohkhenhtu Levi mi kha na pek hna lai,” tiah a ti.
31 Cun Bawipa nih Moses nawl a pek bangin Moses le tlangbawi Eleazar nih an tuah.
32 Ralkap nih an lakmi hranchaw chungin a taang rihmi cu tuu 675-000,
33 caw 72-000,
34 laa 61-000,
35 minung, pa a hngal lomi nu, an dihlak in 32-000 an si.
36 Cun raldohnak ah a kalmi hna i an covo a simi hnarcheu cu tuu 337-500 a si i,
37 Bawipa vo cu tuu 675 an si.
38 Caw cu 36-000 an si i Bawipa vo cu 72 an si.
39 Laa cu 30-500 an si i Bawipa vo cu 61 an si.
40 Minung cu 16-000 an si i Bawipa vo cu 32 an si.
41 Cun Moses nih Bawipa pekchanh awk a simi vo kha tlangbawi Eleazar cu, Bawipa nih Moses nawl a pek bang khan, a pek.
42 Cun Israel mi nih an covo a simi hnarcheu, Moses nih raldohnak ah a kalmi hna ta in a òhenmi §
43 mibu covo hnarcheu cu tuu 337-500,
44 caw 36-000,
45 laa 30-500 le
46 minung 16-000 an si §
47 Israel mi covo a simi hnarcheu chung cun 50 ah pakhat lengmang, minung siseh, saòil siseh, Moses nih a lak hna i Bawipa puan biakinn a zohkhenhtu Levi mi kha Bawipa nih Moses kha nawl a pek bangin a pek hna.
48 Cun ralkap bu a thongthong pawl cung i bawi hna, a thong pawl haotu hna le a za pawl haotu hna nih, Moses an va naih i
49 Moses sinah cun, “Na sal hna nih kan kut tang i a ummi ralkap hna cu kan rel hna i kannih sinin a baumi pakhat hmanh an um lo.
50 Bawipa hmaiah kannih caah remnak ser awkah Bawipa pekchanhmi thil kannih cio nih kan hmuhmi thil cu kan rak put, sui in sermi thil, bankhih le kutkhih tehna, min khenhnak kutdonghrolh tehna, hnatonh le òhi tehna,” tiah an ti.
51 Cun Moses le tlangbawi Eleazar nih annih sinin thil ah ser cangmi sui vialte cu an rak lak.
52 A thong pawl haotu hna le a za pawl haotu hna sin in Bawipa sinah an pekchanhmi sui cu shekel 16-750 a si.
53 (Ralkap nih hranchaw cu anmah ca cio ah an i lak).
54 Cun Moses le tlangbawi Eleazar nih a thong pawl le a za pawl haotu hna sinin sui kha an lak i Bawipa hmai i Israel mi hngalh camcinnak caah tonnak thlam chungah an luhpi.