27
Zelofehad Fanu Hna I Nawlnak
1 Cun Josef fapa Manasseh innchungkhar hna chung i Manasseh fapa Makhir i fapa Gilead i fapa Hefer i fapa Zelofehad fanu hna cu an ra, a fanu hna an min cu Mahlah, Noah, Hoglah, Milkah, le Tirzah an si.
2 Cun Moses le tlangbawi Eleazar le mi bupi le an hruaitu hna hmaiah cun, tonnak thlam innka ah cun an dir i,
3 “Kan pa cu ramlak ah khan a thi; amah cu Bawipa doh in aa pummi hna Korah bu chungah khan aa tel lo, sihmanhsehlaw amah sualnak ruangte ah khan a thi ko; cun fapa a ngei lo.
4 Zeicaahdah kan pa min cu amah hrin chungin a loh lai, fapa a ngeih lo ruangah? Kan pa unau hna lakah vo kan pe ve tuah u,” tiah an ti.
5 Moses nih an kong cu Bawipa hmaiah a chuahpi.
6 Cun Bawipa nih Moses cu a chawnh i,
7 “Zelofehad fanu hna cu an dik ko; an pa unau hna lakah ro na coter ve hna lai i, an pa ro cu annih kha na pek hna lai. Ref 27.7: Nam 36.2
8 Cun Israel mi hna cu, ‘Mipa pakhatkhat cu a thih i fapa a ngeih lo ahcun, a ro cu a fanu kha nan pek lai.
9 Fanu a ngeih lo ahcun, a ro cu a unau hna kha nan pek hna lai.
10 Unau pa a ngeih lo ahcun, a ro cu a pa unau hna kha nan pek hna lai.
11 Cun a pa nih unau a ngeih lo ahcun, a ro cu a rualchan lakah a nai bikmi rualchan kha nan pek lai i amah nih cun a co lai. Bawipa nih Moses nawl a pek bangin, Israel mi hna caah nawlbia le phunglam a si lai,’ tiah na chimh hna lai,” tiah a ti.
Moses Nih Joshua Cu Amah Chaangtu Ah A Thim
(Deu 31.1-8)
12 Bawipa nih Moses cu a chawnh i, “Abarim tlang ah khin hung kai law, Israel mi hna ka pekmi ram cu hung cuan tuah. Ref 27.12-14: Deu 3.23-27, 32.48-52
13 Cun na hmuh dih in nangmah zong na mi hna sinah pumh na si ve lai, na u Aaron kha pumh a si bang khan,
14 zeitintiah Zin ramlak i mibu nih an zai lioah khan, an mithmuh ah, ti ah khan, keimah thangòhat awk i ka bia kha na doh,” tiah a ti. (Hi ti cu Zin ramlak i a ummi Kadesh khua i Meribah ti kha an si.)
15 Moses nih Bawipa sinah cun,
16 “ Bawipa, titsa vialte thlarau hna i Pathian nih mibu zohkhenhtu ah mipa pakhat
17 an hmaiah a kal ding le an hmaiah a ra ding le, a chuahpitu hna le a luhpitu hna ah chia ko seh; Bawipa mibu cu tuukhal ngei lo tuu hna bantukin an si nakhnga lo,” tiah a ti. Ref 27.17: 1Sia 22.17; Eze 34.5; Mat 9.36; Mar 6.34
18 Cun Bawipa nih Moses cu, “Nun fapa Joshua, ruahnak a ngei ngaingaimi kha la law a cungah na kut chuang tuah; Ref 27.18: Exo 24.13
19 tlangbawi Eleazar le mibu a dihlak hmaiah khan dirter law, an mithmuh ah nawlngeihnak kha pe tuah.
20 Nangmah nih amah cu na nawlngeihnak tlawmpal in na thuamh lai, Israel mibu dihlak nih a bia a ngaih nakhnga.
21 Cun tlangbawi Eleazar hmaiah khan a dir lai i amah nih Bawipa hmaiah Urim in bia a halpiak lai; amah bia in an chuak lai i amah bia in an lut lai, amah le amah sinah a ummi Israel mi an dihlak in, mibu cu a ning piin,” tiah a ti. Ref 27.21: Exo 28.30; 1Sam 14.41; 28.6
22 Cun Bawipa nih nawl a pek bangin Moses nih a tuah; Joshua cu a lak i tlangbawi Eleazar le mibupi hmaiah khan a dirter i
23 a cungah a kut a chuan i Bawipa nih Moses a chimh bang khan nawlngeihnak kha a pek. Ref 27.23: Deu 31.23