24
Israel mi hna thluachuah pek cu Bawipa lawmhmi a si ti kha Balaam nih a hngalh tikah, voi dang bang khan litin ah kal ti loin ramlak lei kha a hoih peng. Cun Balaam nih khua a hei zoh i Israel mi cu an hrin an hrinning cio in riahhmun an khuar kha a hmuh hna. Pathian thlarau nih a cungah a rung i, a konglam chim cu a thawk i,
“Beor fapa Balaam i a bia,
A mit ceuter a simipa bia,
Pathian bia a theimi le
A Lianngan Bik langhnak a hmu i
a tlu nain
A mit hunpiak a simipa bia cu
hihi a si:
Maw Jakob, zeitluk in dah na thlam cu an i dawh,
Maw Israel, zeitluk in dah na riahhmun hna cu an i dawh!
A kau diahduahmi nelrawn hna le tiva pawng dum hna le,
Bawipa nih a phunmi hna inhliam le tipawng sidar thing
bantuk an si.
A balòin chungin ti a luang lai i
Ti tampi chungah a ci cu a um lai,
A siangpahrang cu Agag nakin a sang deuh lai i
A pennak cu hlorh a si lai.
Pathian nih Izipt ram in a chuahpi;
Fungtum ki bantuk a ngei,
A ral miphun dang hna kha
a ei dih hna lai i
An ruh kha a khuai dih cikcek lai,
Cun a thal in a chunh hna lai.
A kun i chiandeih bangin a bawk,
Chiandeihpi a lo; aho nih dah
an thawh ngam lai?
Nanmah thluachuah an petu hna
paoh cu thluachuakmi
si ve hna seh law,
Chiat an serhtu hna paoh cu
chiat serh si ve hna seh,” tiah a ti. Ref 24.9: Gen 12.3, 49.9
10 Cun Balaam cungah cun Balak thinhunnak cu a alh i a kut aa tum i Balak nih cun Balaam cu, “Ka ral hna chiatserh awkah kan kawh i zohhmanh, hi voi thum tiang thluachuah na pek hna. 11 Cucaah na umnak ah zam ko kun; ‘Kan hlorh hrimhrim lai,’ tiah ka rak in ti, sihmanhsehlaw Bawipa nih cu upatnak hmuh cu an sianh lo,” tiah a ti. 12-13 Cun Balaam nih Balak cu, “ ‘Balak nih a inn cu sui le ngun a khat in ka pe hmanh seh law keimah nawl in a òha siseh, a chia siseh tuahnak dingah Bawipa bia cu ka lonh kho lai lo; Bawipa nih a chimmi paoh ka chim ko lai,’ tiah ka sinah na rak thlahmi na lamkal hna kha ka rak chimh hna, a si lo mei?
Balaam Bia Palinak
14 Zohhmanh, ka miphun sinah ka kal cang lai; ra ve law, mah miphun nih hin na mi hna cungah hi hnu i an tuah hnga ding cu kan hngalhter lai,” tiah a ti. 15 Cun a konglam chim cu a thawk i,
“Beor fapa Balaam bia,
A mit auter a simipa bia cu,
16 Pathian bia a thei i
Cungnung Bik
hngalhnak a hngal i,
A Lianngan Bik langhnak a hmu i
a tlu i,
Sihmanhsehlaw a mit huh
a si lomi bia cu hihi an si:
17 Amah cu ka hmuh,
sihmanhsehlaw atu i
a si bantuk hi a si lo,
Amah cu ka zoh, sihmanhsehlaw
atu naite i a si bantuk hi a si lo:
Jakob chungin arfi pakhat
a chuak lai i
Israel chungin bawifung pakhat
a chuak lai;
Moab cal cu a khuai lai i
Sheth fapale hna cu a den dih hna lai.
18 Israel vial cu ral òha ngaiin
an um lioah,
Edom cu pawnchuah a si lai,
Seir, a ral hna zong cu,
pawnchuah a si ve lai.
19 Jakob thawngin uknak a si lai i
Khua chungah a tangmi hna cu
hrawh an si lai!” tiah a ti.
20 Cun Amalek lei cu a hei zoh i
a konglam chim cu a thawk i,
“Amalek cu miphun hna lakah
pakhatnak a si,
Sihmanhsehlaw a donghnak ah cun
rawknak a phan lai,” tiah a ti.
21 Ken mi hna lei cu a hei zoh i
a konglam chim cu a thawk i,
“Na umnak hmun cu a fekmi a si,
Na bu cu lungpi chungah a si;
22 Sihmanhsehlaw Kain cu a òhio dih lai.
Zei tik tiang dah Asshur nih sal ah
an kalpi lai?” tiah a ti.
23 Cun a konglam chim cu a thawk i
“Aize! Pathian nih mah hi
a tuah tikah ahodah
a nung kho lai?
24 Sihmanhsehlaw Kittim in
sangphawlawng an ra lai i
Asshur le Eber kha
an hrem hna lai i
Amah zong rawknak kha a phan lai,”
tiah a ti.
25 Cun Balaam cu a tho i
a umnak hmun ah khan a kal i
Balak zong a tlung ve.