22
Balak Nih Balaam Bia A Cah
Cun Israel mi cu an i thawh i Jordan khattelei ral Moab ramrawn ah, Jeriko zawn ah khan, an riak. Cun Zippor fapa Balak nih khan Amor mi cungah Israel nih an tuahmi vialte kha a hmuh. Cu mi cu an tampi caah; Moab nih an òih ngaingai hna. Moab mi hna cu Israel mi an òih hnanak nih cun a tei hna. Cun Moab nih Midian upa hna sinah, “Cawtum nih lo chung ram a òam dih bantukin, hi bupi nih hin kan pawngkam i a ummi thil vialte a òam dih lai,” tiah a ti. Cucaah Zippor fapa Balak, cu caan lio i Moab siangpahrang a simi nih cun, Amaw ram i a ummi, Tiva pawng i a ummi Pethor khuami Beor fapa Balaam cu kawh awkah lamkal a hei thlah hna i, “Zohhmanh, Izipt ram in miphun pakhat an ra chuak i vawlei an khat dih i keimah zawn ah an um cang. Ref 22.5: Nam 31.8; 2Pet 2.15-16; Jud 11 Ra tuah law, mah mi hna hi chiat ka serhpiak hna, keimah caah an òhawng tuk; ka tei hna in hi ram hin ka hei dawi khawh hna hmanh hnga maw; zeitintiah thluachuah na pekmi cu thlua an chuak i, chiat na serhmi cu a chiat hna ti kha ka hngalh,” tiah a ti.
Cucaah Moab upa hna le Midian upa hna cu an kut ah litin man i put in an kal i Balaam sinah an phan i Balak biacahmi cu an chimh. Cun anih nih annih cu, “Tuzan cu hika ah hin riak u law, Bawipa nih ka sinah a chim bantuk paoh in, bia cu ka rak in phorh òhan hna lai,” tiah a ti. Cucaah Moab bawi hna cu Balaam sinah an riak. Cun Pathian cu Balaam sinah a ra i, “Na sinah a ummi hna hi ahodah an si?” tiah a ti. 10 Cun Balaam nih Pathian sinah, “Zippor fapa Balak, Moab siangpahrang nih cun, a run ka cah i, 11 ‘Zohhmanh, Izipt ram in miphun pakhat an chuak i vawlei kha an khat dih. Ra tuah law, annih kha chiat ka serhpiak hna; annih kha ka doh khawh hna in ka òhawl khawh hna hmanh hnga maw,’ a ti,” tiah a ti. 12 Pathian nih Balaam cu, “An sinah na kal hnga lo; cu mi hna cu chiat na serh hna hnga lo, zeitintiah thluachuakmi an si,” tiah a ti. 13 Cucaah Balaam cu zinglei ah a tho i Balak bawi hna cu, “Nanmah ram ah va kir ko u, zeitintiah nanmah sin kal cu Bawipa nih a ka sianh lo,” tiah a ti. 14 Cun Moab bawi hna cu an tho i Balak sinah an kal i, “Balaam nih kan sin i rat cu a duh lo,” tiah an ti.
15 Balak nih annih nakin hmaizah awk deuh a simi bawi kha tam deuh in a thlah òhan hna. 16 Cun annih nih Balaam sinah an ra i, “Hi bangin Zippor fapa Balak nih, ‘Keimah sin rat cu zeihmanh i donhter hlah; 17 zeitintiah upatnak nganpi kan pek hrimhrim lai i na ka chimhmi paoh kha ka tuah lai; ra law, mah mi hna hi chiat ka serhpiak ko hna,’ a ti,” tiah an ti. 18 Sihmanhsehlaw Balaam nih a leh hna i Balak sal hna sinah cun, “Balak nih a inn cu sui le ngun a khat in ka pe hmanh seh law, Bawipa ka Pathian nawlbia lengah cun zeihmanh ka tuah kho lo. 19 Tuzan zong hika ah hin riak tuah u, tiah kan nawl hna, Bawipa nih zeidah ka sinah a chim rih lai kha ka hngalh nakhnga,” tiah a ti. 20 Cun Pathian nih Balaam sinah zan ah a ra i, “Hi mi hna nih nangmah kawh awkah an rat ahcun, tho law, an sinah va kal ko; sihmanhsehlaw kan chimhmi lawnglawng kha na tuah lai,” tiah a sinah a ti.
Balaam Laa le Vancungmi
21 Cucaah zinglei ah Balaam cu a tho i a laa cu a danh i Moab bawi hna sinah khan a kal. 22 Sihmanhsehlaw a kal caah Pathian thinhunnak cu a alh i Bawipa vancungmi pakhat nih amah dawntu ah lam ah a dir. Amah cu laa cungah cun aa cit i a sal pahnih cu amah sinah an um. 23 Cun laa nih cun Bawipa vancungmi cu lamkalai ah vainam phawi cia i put in a dir ko kha a hmuh i, laa cu lam in a pial i lo chungah a kal; cun Balaam nih laa cu lam lei i mer òhan awkah a tuk. 24 Cun Bawipa vancungmi cu mitsur dum le mitsur dum karlak i lam bi ah a dir i a kap hnih in hau a um veve. 25 Cun laa nih Bawipa vancungmi kha a hmuh tikah, hau cu a hei en i Balaam ke cu hau ah khan a rial chih; cucaah a tuk òhan. 26 Cun Bawipa vancungmi cu hmailei ah a kal òhan i orhlei ah siseh, kehlei ah siseh, i mernak a um lonak hmun, hmun ceprep pakhat ah a dir. 27 Laa nih Bawipa vancungmi kha a hmuh tikah Balaam cu a bawhpi i Balaam thinhunnak cu a alh i a òhiangòhunh in laa cu a tuk. 28 Cu tikah Bawipa nih laa cu a holhter i Balaam sinah cun, “Na cungah zeidah ka tuah i voi thum tiang na ka tuk?” tiah a ti. 29 Cun Balaam nih laa cu, “Nihchuak capo ah na ka ser caah a si. Nam rak i put ning law, ka ti pei tiah, ka rak in thah ko hnga,” tiah a ti. 30 Cun laa nih Balaam cu, “Keimah cu na hmette in atu tiang i naa citmi na laa ka si lo mei? Hi bantukin na cungah ka tuah bal maw?” tiah a ti. Cun anih nih, “Na tuah bal lo,” a ti.
31 Cu tikah Bawipa nih Balaam cu a mit a auter i, Bawipa vancungmi, vainam zuh cia a kut ah i put in, lamkalai ah a dir ko kha a hmuh, cun a lu a khun i a bawk. 32 Cun Bawipa vancungmi nih amah sinah cun, “Zeicaahdah hi voi thum tiang na laa kha na tuk? Zohhmanh, na tuahnak cu ka hmaiah a òha lomi a si caah nangmah kha donh awkah ka ra chuak. 33 Laa nih khan a ka hmuh i voi thum tiang hin ka hmaiah a pial. Ka hmai in rak pial hlah seh law, amah cu thah loin nangmah kha ka rak in thah cang hnga,” tiah a ti. 34 Cun Balaam nih Bawipa vancungmi sinah cun, “Ka sual cang, zeitintiah keimah donh awkah lam ah na rak dir ti kha ka hngal lo. Cucaah na mithmuh ah thil òhalo a si ahcun ka kir òhan ko lai,” tiah a ti. 35 Cun Bawipa vancungmi nih Balaam cu, “Mi hna sinah cun va kal ko, sihmanhsehlaw kan chimhmi bia lawnglawng na chim lai,” tiah a ti. Cucaah Balaam cu Balak bawi hna sinah cun a kal.
36 Balaam a ra cang tiah Balak nih a theih tikah, Arnon tiva nih a thlehmi an ramri, cu ramri a donghnak bik i a ummi Moab khua tiangin va don awkah a kal. 37 Cun Balak nih Balaam cu, “Nangmah kawh awkah mi ka rak thlah hna, a si lo mei? Zeicaahdah ka sinah na rat lo? Upatnak an pe kho lo maw ka si?” tiah a ti. 38 Balaam nih Balak sinah cun, “Zohhmanh, nangmah sin ka ra phan cang! Keimah thamtham cu zeihmanh chim khawhnak nawl ka ngei i mei? Pathian nih ka ka chung i a chiahmi bia lawng pei ka chim khawh ko lai cu,” tiah a ti. 39 Cun Balaam cu Balak sinah cun a kal i Kiriath-huzoth an phan. 40 Cun Balak nih cawtum hna le tuu hna in rai aa thawi i Balaam le a sinah a ummi bawi hna kha a hei hleh hna. 41 Cun a thaizing ah Balak nih Balaam cu Bamoth-baal ah a hun kalpi i cuka cun a naih bik i a ummi hna cu a hmuh hna.