19
A Thiang Lomi Thianhnak
1 Cun Bawipa nih Moses le Aaron cu a chawnh hna i,
2 “Mah hihi Bawipa pekmi phungbia i a nawlbia cu a si: Israel mi kha nannih sinah cawla sen, soi awk zeihmanh a ngei lo i do a tlami, hngawngkual hlinh bal lomi cu, rak pu hna seh tiah chim hna u.
3 Cun tlangbawi Eleazar cu nan pek lai i riahhmun lengah an hruai lai i amah hmaiah an thah lai.
4 Cun tlangbawi Eleazar nih a thi kha a kutdong in tlawmpal a lak lai i cu thi chung cun tlawmpal in tonnak thlam hmailei cu voi sarih a theh lai.
5 Cun cawla cu amah mithmuh ah an khangh lai; a phaw le a sa le a thi cu a ek he khangh a si lai i
6 tlangbawi nih cun sidar thing le husop le thil sen kha a lak hna lai i cawla khanghnak mei chungah cun a paih hna lai.
7 Cun tlangbawi nih a hnipuan kha a suk hna lai, a pum cu ti in aa kholh lai i cu hnuah riahhmun chungah cun a ra lut lai. Cun tlangbawi cu zanlei tiang thianglo a si lai.
8 Cawla a khangmipa nih a hnipuan cu ti in a suk hna lai i a pum cu ti in aa kholh lai i zanlei tiang thianglo a si lai.
9 Cun a thiangmi pa nih cawla vutcam kha a ruh lai i riahhmun lengah hmun thiang pakhat ah a chiah lai; cun Israel mibu hna sual tlenghnak, i thianhnak ti caah, an chiah lai. Ref 19.9: Heb 9.13
10 Cun vutcam a ruttupa nih khan a hnipuan a suk hna lai i zanlei tiang thianglo a si lai. Mah hihi Israel mi ca le an sin i a pemmi khual caah nawlbia a si camcin lai.
11 “Miruak zeipaoh a tawngtu cu ni sarih chung thianglo a si lai;
12 ni thumnak ni le ni sarihnak ni ah i thianhnak ti khan aa thianh lai i cu bangin a thiang lai; sihmanhsehlaw ni thumnak ni le ni sarihnak ni ah aa thianh lo ahcun a thiang lai lo.
13 Ahohmanh nih mithi aho ruak hmanh siseh, a tawngh i aa thianh lo ahcun, Bawipa puan biakinn kha a thurter; cu pa cu Israel mi sinin hlonh awk a si lai; thianhnak ti kha a cungah theh a si lo caah amah cu thianglo a si lai; a thian lonak cu a cungah a tang rih.
14 “Mah hihi mi pakhatkhat nih thlam chungah a thih tik i phungbia a si: thlam chungah a lutmi paoh le thlam chungah a ummi paoh cu ni sarih thianglo an si lai.
15 Cun aa hungmi um, a chin chinh lomi paoh cu, thianglo a si.
16 Ahohmanh nih lo i a um lioah nam in thahmi siseh, miruak siseh, miruh siseh, thlan siseh a tawngh ahcun ni sarih thianglo a si lai.
17 A thiang lomi caah cun khanghmi sual thawinak vutcam kha tlawmpal in an lak lai i ti luangmi tlawmpal he um chungah an rawn lai;
18 cun a thiangmi pakhatkhat nih husop kha a lak lai i ti chungah cun a hnim lai i thlam le a thilri vialte le cuka i a ummi hna le, ruh siseh, thahmi siseh, mithi siseh, thlan siseh, a tawngmi pa cungah cun a theh lai;
19 cun a thiangmi pa nih a thiang lomi cu ni thumnak ni le ni sarihnak ni ah a theh lai; cu bangin ni sarihnak ni ah khan a tlengh lai i a hnipuan a suk hna lai i ti in a kholh lai i zanlei ah a thiang lai.
20 “Sihmanhsehlaw thianglo a si i aa tleng lomi cu, cu mi cu aa pummi hna lakin hlonh a si lai, Bawipa hmunthiang kha a thurhhnawmhter caah; thianhnak ti kha a cungah theh a si lo caah amah cu thianglo a si.
21 Cun mah hihi annih caah nawlbia a si camcin lai. Tlenghnak ti a thehtu nih khan a hnipuan a suk lai; cun tlenghnak ti a tawngmi kha zanlei tiang thianglo a si lai.
22 Cun a thiang lomi nih a tawnghmi thil paoh kha thianglo a si lai i, cu thil a tawngmi paoh cu zanlei tiang thianglo a si lai,” tiah a ti.