4
Sual Thawinak
Cun Bawipa nih Moses cu Israel mi kha chim hna law timh ciammam si loin sualnak a tuah i Bawipa nawlbia a buarmi hna cu a tanglei nawlbia hi an zulh a hau lai, va ti hna.
Sualnak a tuahmi cu Tlangbawi Ngan a si i mizapi cungah mawhnak a tlunter a si ahcun, cawtum no dotla pakhat Bawipa sinah a sualnak hna caah cun a thawi lai. Cawtum cu tonnak thlam innka ah Bawipa hmaiah cun a rak put lai i cawtum lu cungah cun a kut a chuan lai i Bawipa hmaiah cun cawtum cu a thah lai. Cun chiti thuhmi tlangbawi nih cawtum thi tlawmpal cu a lak lai i tonnak thlam ah a rak put lai; thi chungah cun tlangbawi nih a kutdong a hnim lai i hmunthiang puanzar hmai Bawipa hmaika ah cun thi cu tlawmpal in voi sarih a theh lai. Cun tlangbawi nih tonnak thlam chung a ummi rimthaw zihmui biakòheng ki hna ah cun, Bawipa hmaika ah, thi cu tlawmpal a thuh lai. Cun cawtum thi a taangmi cu tonnak thlam innka ah a ummi khangh thawinak biakòheng hram ah cun a thlet lai. Cun sual thawinak cawtum thau vialte cu a chuah dih lai, a chungril tuamtu thau siseh, a kiar siseh, a kal pahnih a tai zawn ah a ummi le an thau si hna seh, a thin tuamtu siseh, a lak hna lai i 10 daihnak thawinak ca i pekchanhmi cawtum a thau a tuah bantuk khan, khangh thawinak biakòheng cungah a khangh hna lai. 11 Sihmanhsehlaw cawtum phaw le a sa vialte cu, a lu he, a ke hna he, a chungril hna he, a ek he, 12 cawtum cu a pumpi in riahbuk lengah hmun thiang pakhat vutcam thletnak hmun ah cun, a kalpi lai i thing cungah a khangh lai; vutcam thletnak hmun ah cun khangh a si lai.
13 Israel mibu nih an bupi in hngalh loin sualnak an tuah i cu thil cu zapi hmuh lomi thil a si i Bawipa nih tuah lo awk tiin nawl a pekmi pakhatkhat cu an tuah i an mawh ahcun, 14 annih nih an tuahmi sualnak cu a langh tikah, an zapi in sual thawinak caah cawtum no pakhat an thawi lai i tonnak thlam hmaiah an rak put lai. 15 Cun an bu chung upa hna nih cawtum lu ah cun Bawipa hmaika ah an kut an chuan lai i cawtum cu Bawipa hmaika ah an thah lai. 16 Cun chiti thuhmi tlangbawi nih cawtum thi cu tlawmpal in tonnak ah a rak put lai i 17 tlangbawi nih cun sathi chungah cun a kutdong a hnim lai i Bawipa hmaiah puanzar hmaiah cun voi sarih a theh lai. 18 Cun sathi cu tlawmpal in tonnak thlam chungah a ummi biakòheng ki ah cun a thuh lai, Bawipa hmaika ah cun; cu sathi a taangmi cu tonnak thlam innka ah a ummi khangh thawinak biakòheng hram ah cun a thlet lai. 19 Cun a thau vialte cu a lak dih lai i biakòheng cungah a khangh lai. 20 Cu bantukin cawtum cu a tuah lai; sual thawinak cawtum a tuah bantuk khan, mah hi zong cu a tuah ve lai; cun tlangbawi nih cun annih caah remnak a ser lai i annih cu ngaihthiam an si lai. 21 Cun cawtum cu riahbuk lengah a kalpi lai i a hmasa cawtum a khangh bantuk khan a khangh ve lai; mah hihi mi zapi ca i sual thawinak a si.
22 Uktu pakhatkhat nih sualnak a tuah tikah, Bawipa a Pathian nih tuah lo awk i nawl a pekmi thil pakhatkhat kha hngalh loin a tuah i a mawh tikah, 23 cu sualnak a tuahmi cu a hngalh ahcun, aa thawinak caah meheh pakhat, a pa dotla, a rak put lai. 24 Amah nih meheh lu cungah cun a kut a chuan lai i Bawipa hmai i khangh thawinak an thahnak hmun ah khan a thah lai; mah hihi sual thawinak a si. 25 Cun tlangbawi nih sual thawinak thisen cu tlawmpal in a kutdong in a tawh lai i khangh thawinak biakòheng ki ah cun a thuh hna lai i a tangmi a thi cu khangh thawinak biakòheng hram ah cun a thlet lai. 26 Cun a thau vialte cu biakòheng ah a khangh hna lai, daihnak thawinak pekchanhnak sathau bantuk khan; cu bantuk cun tlangbawi nih a sualnak caah cun remnak a tuahpiak lai i ngaihthiam a si lai.
27 Zaran chungin pakhatkhat nih Bawipa nih tuah lo awk i nawl pekmi thil pakhatkhat tuah in, hngalh lo i sualnak a tuah i a mawh a si ahcun, Ref 4.27-31: Nam 15.27-28 28 sualnak a tuahmi kha a hngalh tikah aa thawinak caah meheh pakhat, a nu dotla, a tuahmi a sualnak caah cun a rak put lai. 29 Cun sual thawinak lu cungah cun a kut a chuan lai i sual thawinak cu khangh thawinak hmun ah khan a thah lai. 30 Cun tlangbawi nih a thi cu tlawmpal in a kutdong in a lak lai i khangh thawinak biakòheng ki ah khan a thuh hna lai i a taangmi a thi cu biakòheng hram ah cun a thlet lai. 31 Cun a thau vialte cu daihnak thawinak chungin a thau lak a si bang khan a lak dih lai i tlangbawi nih biakòheng cungah Bawipa ca i rimthaw ah a khangh lai; cun tlangbawi nih a caah remnak a tuahpiak lai i ngaihthiam a si lai.
32 Sual thawinak ca i a pekchanhmi ah tuufa a rak put ahcun, a nu dotla a rak put lai i 33 sual thawinak lu cungah cun a kut a chuan lai i sual thawinak caah khangh thawinak an thahnak hmun ah khan a thah lai. 34 Cun tlangbawi nih sual thawinak sathi cu tlawmpal in a kutdong in a lak lai i khangh thawinak biakòheng ki ah cun a thuh hna lai i a tangmi a thi cu biakòheng hramah a thlet lai. 35 Cun a thau vialte cu daihnak thawinak ca i pekchanhmi tuufa chungin a thau lak a si bantuk khan a lak lai i, tlangbawi nih biakòheng cungah, Bawipa sinah mei in pekchanhmi hna cungah khan, a khangh lai. Cun tlangbawi nih sualnak a tuahmi caah khan remnak a serpiak lai i ngaihthiam a si lai.