20
Nawlngailo Dantatnak
1 Bawipa nih Moses a chawnh i, Israel mi hna sinah hi bangin va chim, tiah a ti:
2 “Israel mi lak in siseh, an sinah a pemmi khual hna lak in siseh, ahohmanh nih a fa zeihmanh kha Molek a pek ahcun amah cu thah a si lai; ram mi nih lung in an cheh lai.
3 Cu pa cu ka hmai ka chiathnawh lai i a mi hna lakin ka hlonh lai, a fa pakhat cu ka hmunthiang thurhnawmhter awk le ka min thiang thurhnawmh awkah Molek kha a pek caah, ka hlonh hna lai.
4 Cun hi ram mi hna nih cu pa i a fa pakhat Molek a pek cu an i hngalhter duh lo i an thah lo ahcun,
5 cu pa le a innchungkhar hna cu ka hmai ka chiathnawh hna lai i an mi hna lak in ka hlonh hna lai, amah le Molek sin i vaa hlawhhlan awkah amah a zulmi vialte cu, ka hlonh hna lai.
6 “Mi pakhatkhat nih khuavang le camhthiam kha a fuhpanh hna i hlawh a hlanhnawh hna ahcun, cu mi cu ka hmai ka chiathnawh lai i a mi hna lak in ka hlonh lai.
7 Cucaah i thianter u law, thianghlim tuah u; zeicahtiah kei cu Bawipa nan Pathian ka si.
8 Ka nawlbia kha ul hna u law, tuah hna u; nannih an thiantertu hna Bawipa cu keimah ka si.
9 Zeitintiah a nu siseh, a pa siseh, chiat a serhmi paoh cu thah awk a si lai; a nu siseh, a pa siseh, chiat a serh cang hna, an thisen cu amah cungah a si. Ref 20.9: Exo 21.17; Mat 15.4; Mar 7.10
10 “Mipa pakhatkhat nih a innpa nupi he an sual ahcun, nu he pa he an pahnih in thah an si lai. Ref 20.10: Exo 20.14; Lev 18.20; Deu 5.18
11 A pa nupi a ihpimi cu a pa pumlawnnak a hlim a si; an pahnih in thah an si lai, an thisen cu anmah cungah a si. Ref 20.11: Lev 18.8; Deu 22.30; 27.20
12 Mipa pakhatkhat nih a fapa nupi a ihpi ahcun an pahnih in thah an si lai; mah rualchan he sualnak an tuah, an thisen anmah cungah a si. Ref 20.12: Lev 18.15
13 Mipa nih mipa cu nu bantukin a ihpi ahcun, an pahnih in fihnung an tuah; thah an si lai, an thisen cu anmah cungah a si. Ref 20.13: Lev 18.22
14 Mipa pakhatkhat nih nupi a òhit i a nu zong nupi ah aa serh ahcun, mah cucu òhat lo cikcek a si; mei in khangh an si lai, amah he anmah he; nannih lakah cu òhat lonak cu um hlah seh. Ref 20.14: Lev 18.17; Deu 27.23
15 Mipa nih saram a ihpi ahcun thah a si lai; cun saram cu nan thah lai. Ref 20.15-16: Exo 22.19; Lev 18.23; Deu 27.21
16 Nu nih zei saram paoh a fuh i a ihpi ahcun, cu nu le saram cu nan thah hna lai; annih cu thah an si lai, an thisen cu anmah cungah a si.
17 “Mipa pakhatkhat nih amah far, amah pa fanu maw amah nu fanu maw a lak i pa nih nu a pumlawnnak kha a hmuh i nu nih pa a pumlawnnak kha a hmuh ahcun, mah cucu ningzah awk thil a si, an mi hna mithmuh ah hlonh an si lai; pa nih a farnu pumlawnnak kha a hlim a si caah a dantatnak cu amah nih a in lai. Ref 20.17: Lev 18.9; Deu 27.22
18 Pa pakhatkhat nih nu pakhatkhat cu a zawtnak a ngeih lioah a ihpi i a pumlawnnak a hlim ahcun, a cerhti cu a hlim a si i nu nih a thi chuahnak a hun a si; an mi hna sinin an pahnih in hlonh an si lai. Ref 20.18: Lev 18.19
19 Na nu unau siseh, na pa far siseh, an pumlawnnak na hlim lai lo; zeitintiah mah cucu mah he aa naihmi rualchan hlim a si; dantatnak cu anmah nih an in lai.
20 Pa pakhatkhat nih a pa unau nupi a ihpi ahcun a pa unau pumlawnnak a hlim a si, an sualnak cu an in lai; fa ngei loin an thi lai. Ref 20.19-20: Lev 18.12-14
21 Mipa pakhatkhat nih amah unau nupi kha a lak ahcun, mah cucu thianlo a si; amah unau pumlawnnak kha a hlim, fa ngei loin an um lai. Ref 20.21: Lev 18.16
22 “Cucaah ka nawlbia vialte le ka phunglam vialte nan ulh hna lai i nan tuah hna lai, cucaah kan hruai hna lainak ram nih an luak hna lai lo.
23 Nan hmaiah ka dawimi miphun i an phung kha nan zul hna lai lo; zeitintiah mah cu thil hna cu an tuah caah ka huat hna.
24 Sihmanhsehlaw nannih sinah cun, ‘An ram cu nan co lai i nan co awkah kan pek hna lai, cawhnuk le khuaihliti in a luangmi ram cu,’ tiah ka ti. Keimah hi Bawipa nan Pathian, mi hna sinin an thleidangtu hna cu ka si.
25 Cucaah nannih nih saram thiang le thianglo le va thiang le thianglo thleidannak nan ser lai; nannih nih nanmah lila cu saram in siseh, va in siseh, vawlei i a vakmi thil zeipaoh nannih nih a thianglo ah rel awk i ka thleidanmi hna in, fihnung ah nan i ser lai lo.
26 Nannih cu keimah caah mithiang nan si lai; zeitintiah keimah, Bawipa cu, ka thiang i nannih cu keimah ta nan si nakhnga, midang sinin kan thleidan hna.
27 Pa siseh, nu siseh, khuavang ngei maw camhthiam maw a si ahcun thah a si lai; lung in cheh an si lai; an thisen cu anmah cungah a si lai.”