3
Israel Siangpahrang Joram Pennak
1 Judah siangpahrang Jehoshafat a bawi kum hleiriatnak ah, Ahab fapa Joram cu Israel mi cungah Samaria khua ah siangpahrang a cang i kum hleihnih a pen hna.
2 Bawipa mithmuh ah thil òhalo kha a tuah, sihmanhsehlaw a nu le a pa bantuk kha cu a si lo, zeicahtiah a pa nih a rak sermi Baal lungphun kha a hlonh.
3 Sihmanhsehlaw Nebat fapa Jeroboam nih Israel mi a sualter hnanak a sualnak kha aa tlaih i a kaltak lo.
Moab He Dohnak
4 Moab siangpahrang Mesha cu tuu zua a si i Israel siangpahrang cu kum fate in tuufa 100-000 le tuukawng 100-000 hmul a pek lengmang awk a si.
5 Sihmanhsehlaw Ahab a thih tikah Moab siangpahrang nih cun Israel siangpahrang cu a doh.
6 Cucaah cu caan ah cun Siangpahrang Joram cu Samaria in a chuak i Israel mi vialte kha a pumh hna.
7 Cun a kal i Judah siangpahrang Jehoshafat kha bia a cah i, “Moab siangpahrang nih a ka doh; Moab doh awkah ral tuknak hmun ah na ka kalpi lai maw?” tiah a ti. Cun anih nih, “Kan kalpi lai; keimah le nangmah cu pum khat kan si, ka mi cu na mi an si ve ko i ka rangtum hna cu na rangtum an si ve ko,” tiah a ti.
8 Cun amah nih cun a thawh i, “Khuazeilei lam in dah kan kal lai?” tiah a ti. Joram nih, “Edom ramlak lei lam in,” tiah a leh.
9 Cucaah Israel siangpahrang cu Judah siangpahrang le Edom siangpahrang he tiah an kal. Cun annih nih aa vel in ni sarih an kal tikah ralkap caah siseh, anmah a zultu saòil hna caah siseh ti a um lo.
10 Cu tikah Israel siangpahrang nih a thawh i, “Aize! Bawipa nih kannih siangpahrang pathum hna hi Moab kut chung i pek awkah a kan kawh ko hi ta,” tiah a ti.
11 Cun Jehoshafat nih a thawh i, “Hika ah hin Bawipa a kan halpiaktu ding Bawipa profet aho tal an um lo maw?” tiah a ti. Cu tikah Israel siangpahrang sinum pakhat nih a leh i, “Elijah kut i ti a rak toihtu Elisha, Shafat fapa kha hika ah hin a um ko,” tiah a ti.
12 Cun Jehoshafat nih cun, “ Bawipa bia cu amah sinah cun a um,” tiah a ti. Cucaah Israel siangpahrang le Jehoshafat le Edom siangpahrang cu amah sinah cun an vung kal.
13 Cun Elisha nih khan Israel siangpahrang cu, “Nangmah he kan i tlaknak zeidah a um? Na pa profet hna le na nu profet hna sinah khan va kal ko,” tiah a ti. Sihmanhsehlaw Israel siangpahrang nih amah cu a thawh i, “Asilo; Moab kut chung i pek awkah hi siangpahrang pathum hna a autu hna hi Bawipa a si ko,” tiah a ti.
14 Cun Elisha nih cun a thawh i, “Ralkapbu Bawipa, a rian ka òuanmi a nun bangin, Judah siangpahrang Jehoshafat kha hmaizah hlah ning law cu, a zoh zong kan zoh duh hnga lo i a hmuh zong kan hmu duh hnga lo.
15 Sihmanhsehlaw tingtang tum thiammi hunpi tuah ngat u,” tiah a ti. Cun tingtang tum thiam nih khan a hun tum tikah Bawipa òhawnnak cu a cungah a tlung.
16 Cun amah nih cun, “Hi bangin Bawipa nih, ‘Hi a carmi tiva kuang hi tili in ka khahter lai,’ a ti.
17 Zeitintiah Bawipa nih hi bangin, ‘Nannih nih thli siseh, ruah siseh nan hmu lai lo, sihmanhsehlaw kha tiva cu ti a khat lai i cucaah nannih nih, nanmah he nan caw he nan saòil he nan din lai,’ a ti.
18 Mah hi cu Bawipa mithmuh ah cun a fawimi thil a si ko; Moab mi hna zong cu nan kut chungah an pek hna lai,
19 cun nannih nih kulhmi khua paohpaoh le khua òha vialte kha nan tei hna lai i thingkung òha vialte kha nan hau hna lai i ti putnak vialte kha nan phih hna lai i vawlei òhatnak hmun paohpaoh kha lung in nan hrawh hna lai,” tiah a ti.
20 A thaizing ah, raithawinak pekchanh caan ah khin, zohhmanh, ti cu Edom lei in a ra i ram cu ti in a khat dih.
21 Moab mi vialte hna nih siangpahrang hna nih kannih kha tuk awkah an kan hunhnawh tiah an theih tikah, ralthuam aa hruk kho vialte, ngakchia bik in upa bik tiang, an kawh hna i ramri ah khan an hun kalpi hna.
22 Zingkate ah an thawh i ni nih ti kha a vun cerh tikah, an ral i ti cu thi bantukin a sen in Moab mi nih an hmuh.
23 Cun annih nih, “Mah hihi thisen a si ko; siangpahrang hna cu pakhat le pakhat an i tu i an i that ko hih. Cucaah Moab mi hna, hranchaw kha zuanhnawh u luao!” tiah an ti.
24 Sihmanhsehlaw Israel mi riahhmun kha an phak tikah Israel mi cu an tho i Moab mi cu an òhuat ciammam hna i an hmai in an zam; cun hmailei ah an kal i an kalpah cun Moab mi cu an thah lengmang hna.
25 Cun annih nih khua kha an hrawh hna i vawlei òhatnak hmun vialte kha an phih dih i thingkung òha vialte kha an hau dih; a lung hna lawng kha Kir-hareseth ah cun an tang i cu zong cu lungherh cheh thiam nih an kulh i an tei.
26 Moab siangpahrang nih an i dohnak kha ka celh ding a si lo tiah a hngalh tikah Edom siangpahrang lei khan bauh awkah vainam pumi 700 aa kalpi hna; sihmanhsehlaw an pah kho lo.
27 Khi tikah amah hmun ah bawi a si ding a fapa upa bik kha aa lak i ralhau cungah cun khangh thawinak caah a thawi. Cu tikah Israel mi hna cu an thin a hung ngaingai i amah sin cun anmah an ram leiah khan an kir òhan.