5
Solomon Nih Biakinn Sak A Timh
(2Cha 2.1-18)
1 Tair siangpahrang Hiram nih Solomon cu a pa hmun ah siangpahrang ah an ser cang ti kha a theih tikah, a sinah sinum kha a hei thlah hna; zeitintiah Hiram nih David cu a rak dawt zungzal.
2 Cun Solomon nih Hiram cu bia a hei cah i,
3 “ Bawipa nih a keza tangah a chiah hna hlantiang a ral hna nih a kenkip in an dum caah, ka pa David nih Bawipa a Pathian min caah inn a sa kho lo ti kha na hngalh.
4 Sihmanhsehlaw atu cu Bawipa ka Pathian nih a kenkip ah daihnak a ka pek i ral siseh, vanchiatnak siseh a um lo.
5 Cucaah Bawipa nih ka pa David sinah, ‘Nangmah hmun ah, na bawi òhutdan cungah ka chiah laimi na fapa nih ka min caah inn cu a sak te lai,’ tiin a rak ti bang khan, Bawipa ka Pathian min caah inn ka sa lai, tiah kaa tim. Ref 5.5: 2Sam 7.12-13; 1Cha 17.11-12
6 Cucaah Lebanon tlang i sidar thing cu an ka haupiak nakhnga nawl pe hna; cun ka sinum hna nih na sinum hna kha an bawmh hna lai i nangmah nih na khiahning bantukin na sinum hna cu òuan man ka pek hna lai; zeitintiah Sidon mi tlukin thing saih a thiammi kan lakah an um lo ti kha na hngalh,” tiah a ti.
7 Hiram nih Solomon bia kha a theih tikah a lung aa lawm ngaingai i, “Hi a nganmi miphun cung i a um dingah David kha a fimmi fapa a petu Bawipa cu nihin ah hin thangòhat si ko seh,” tiah a ti.
8 Cun Hiram nih Solomon sinah cun mi a hei thlah hna i, “Bia na ka cahmi kha ka rak theih; sidar thing le saipres thing kong ah na duhmi paoh tuahpiak awkah kaa tim ko.
9 Ka sinum hna nih Lebanon tlang in rili ah an vun kalpi lai; cun na ka tinhmi hmun i rili in kalpi awkah puum ah ka ser hna lai i khika ah cun ka phoihter hna lai i nang nih na rak lak hna lai; cun ka duhnak cu ka innchungkhar cu rawl na rin hna lai,” tiah a ti.
10 Cucaah Hiram nih Solomon cu sidar thing le saipres thing a duhmi vialte kha a pek,
11 cun Solomon nih Hiram cu, a innchungkhar hna ca rawl ah changvut phorh 20-000 le chiti phorh 20-000 a pek. Solomon nih mah hihi kum khat hnu kum khat a pek lengmang.
12 Cun Bawipa nih Solomon cu bia a kam bang khan fimnak a pek; cun Hiram le Solomon karlak ah remnak a um i annih pahnih nih hnatlaknak an ser.
13 Cun Siangpahrang Solomon nih khan Israel mi vialte chungin rian òuan awk i hnekmi bu a ser i cu hnekmi bu cu mi 30-000 an si.
14 Cun thla khat ah 10-000 lengmang in, aa chaang lengmang dingin, Lebanon ah a kuat hna; Lebanon ah thla khat, cun inn ah thla hnih lengmang an um; cu hnekmi bu a uktu ah cun Adoniram a si. Ref 5.14: 1Sia 12.18
15 Cun Solomon nih cun thil phortu 70-000 le tlangram i lung ceektu 80-000 zong a ngeih hna,
16 cu hna hleiah cun Solomon nih rian a òuantu mi a zohtu hna bawi ngan deuh pawl 3-300 zong a ngeih fawn hna.
17 Siangpahrang nih nawl a pek hna bantukin, inn hram cu remhmi lung in ser awkah, a nganmi le a man a sungmi lung kha an khoih hna.
18 Cuticun inn satu pawl, Solomon mi hna le Hiram mi hna le Gebal mi hna nih, innsaknak caah cun lung kha an remh hna i thing kha an timh hna.