3
Solomon Nih Fimnak A Hal
(2Cha 1.3-12)
1 Solomon nih Izipt ram siangpahrang Faro he òan òinak cu òhitumnak in a ser; Faro fanu kha a lak i amah inn le Bawipa inn le Jerusalem kulhnak vampang kha a sak dih hna hlan cu David khua ah khan a umter.
2 Mizapi cu khuahrum bo ah khan raithawinak an tuah ko, zeicahtiah Bawipa min caah inn sakmi a um rih lo.
3 Solomon nih Bawipa kha a dawt ko, a pa David nawlbia kha a zulh ko hna; amah belte, khuahrum bo ah khan rai a thawi i zihmui a khangh.
4 Cun siangpahrang cu raithawi awkah Gibeon ah a kal, zeicahtiah mah cucu an khuahrum bo ngan a si; Solomon nih khika biakòheng cungah khan khangh thawinak 1-000 a pekchanh tawn.
5 Gibeon ah cun Solomon sinah Bawipa cu mang in zan ah a lang i Pathian nih cun, “Zeidah kan pek lai, ka hal tuah,” tiah a ti.
6 Cun Solomon nih, “Nangmah nih ka pa David cu zumhawktlak in le dinnak in le nangmah lei i lungthin ding ngeihnak in na hmaiah a um caah, a ngan le a fekmi dawtnak cu na hmuhsak cang; cun hi a ngan i a fekmi dawtnak cu na chiahpiak i nihin i a bawi òhutdan cung i a òhu dingah fapa pakhat na pek.
7 Cun atu cu, maw Bawipa ka Pathian, nangmah nih na salpa hi ngakchiate ka si ko nain, ka pa David hmun ah siangpahrang ah na ka ser cang; keimah cu zeitindah ka chuah lai i zeitindah ka luh lai, ti a hngal lomi ka si.
8 Cun na salpa hi, nangmah nih na thimmi miphun ngan, an tam lei i rel cawk lo le zeizat an si hngalh cawk lomi hna lakah hin ka um.
9 Cucaah na mi hi uk khawhnak caah a òha le a chia kha ka thleidan khawh nakhnga, na salpa hi hngalhthiamnak lungthin ka pe tuah; zeicahtiah, aho nih dah hi na miphun ngan hi a uk khawh hna lai?” tiah a ti.
10 Solomon nih hi thil hi a hal caah Bawipa cu aa lawm.
11 Cun Pathian nih amah cu, “Mah hihi na ka hal i nangmah caah nun saunak siseh, rumnak siseh, na ral hna thihnak siseh, hal loin nangmah caah a dingmi thil kha hngalh khawhnak na ka hal caah,
12 zohhmanh, na bia bangin ka tuah lai. Zohhmanh, a fim le thil a thleidang khomi lungthin kan pek, cucaah nangmah bantuk ahohmanh an rak um bal lo i nangmah bantuk hi a chuah zong an chuak bal ti fawn lai lo.
13 Cun na ka hal lomi zong kan pek, rumnak he upatnak he, cucaah na nun chung vialte siangpahrang dang ahohmanh nih an in tluk lai lo.
14 Cun ka nawlbia hna le ka phungbia hna kha zul in na pa David nih a zulh bangkhan ka lam kha na zulh hna ahcun, na nunnak ka sauter fawn lai,” tiah a ti.
15 Cun Solomon cu a hun i hlau i zohhmanh, mang a si. Cun Jerusalem ah a ra i Bawipa biakamnak kuang hmaiah khan a dir i khangh thawinak hna le daihnak thawinak hna kha a pekchanh hna i a sinum vialte kha rawl danghnak a serpiak hna.
Solomon Fim Biaceihnak
16 Cun hlawhhlangnu pahnih, siangpahrang sinah cun an ra i a hmaiah an dir.
17 Minu pakhat nih cun, “Maw ka bawipa, hi nu le keimah hi inn khat ah kan um i inn chung i a um lioah khan fa ka hrin.
18 Cun nau ka hrin hnu ni thum ah hi nu zong nih fa a hrin ve i kanmah lawng kan si, kan sinah inn chungah a dang ahohmanh an um lo; kanmah pahnih lawngte inn chungah cun kan um.
19 Cun hi nu nih hin a fapa cu a nenh caah zan ah a thi.
20 Cun zanòim ah a tho riangmang i ka pawng i ka fapa cu na salnu kaa hngilh karah a lak i a òang chungah a chiah i a thimi a fapa tu cu ka òang chungah a chiah.
21 Zinglei i ka fa cu hnuk dinh awk i ka thawh tikah, zohhmanh, a rak thi ko; sihmanhsehlaw òha tein zing ah ka zoh tikah, zohhmanh, ka hrinmi ka fate kha a si lo,” tiah a ti.
22 Sihmanhsehlaw a dang pakhat nu nih cun a thawh i, “Asilo, a nungmi fate hi keimah i a si i a thimi fate hi nangmah i a si,” tiah a ti. A hmasa nu nih khan a thawh i, “Asilo, a thimi fate hi nangmah i a si i a nungmi fate hi keimah i a si,” tiah a ti. Cuticun siangpahrang hmaiah cun an chim veve.
23 Cun siangpahrang nih a thawh hna i, “Pakhat nih, ‘A nungmi hi keimah fapa a si i a thimi hi nangmah fapa a si,’ nan ti, cun pakhat nih, ‘Asilo, a thimi hi na fapa a si i a nungmi hi ka fapa a si,’ nan ti,” tiah a ti.
24 Cun siangpahrang nih, “Vainam rak ka pe tuah u,” tiah a ti. Cucaah vainam pakhat siangpahrang hmaiah cun an rak put.
25 Cun siangpahrang nih a thawh i, “A nungmi ngakchiate kha cheu hnih ah cheu u law, cheu khat cu pakhat kha pe u law cheu khat cu a dang pakhat kha pe u,” tiah a ti.
26 Cun a nungmi fa a nu nih khan siangpahrang sinah cun, a lung nih a fapa kha a tlaihchan caah, “Maw ka bawipa, a nungmi ngakchiate kha amah cu pe ko, that sawh hlah,” tiah a ti. Sihmanhsehlaw a dang pakhat nih khan cun, “Keimah ta zong si hlah seh, nangmah ta zong si hlah seh; cheu ko,” tiah a ti.
27 Cun siangpahrang nih a leh hna i, “A nungmi fate kha pakhatnak nu kha pe u, that hrimhrim hlah u, amah kha a nu cu a si,” tiah a ti.
28 Cun Israel mi vialte nih siangpahrang biachahmi kha an theih i siangpahrang cu an khuaruah a har, zeicahtiah biading in biachah khawh awkah Pathian fimnak kha a chungah a um ti an hngalh.