20
Himnak Khua Hna
1 Cun Bawipa nih Joshua cu a chawnh i, Ref 20.1-9: Nam 35.6-32; Deu 4.41-43, 19.1-13
2 “Israel mi hna cu, ‘Moses sinin nannih sinah ka chimmi himnak khua kha ser hna u,
3 khika ah timh cianak um lo le hngalh loin mi a that sualmi nih a zam nakhnga; nannih caah thisen phuhlamtu sinin himnak khua an si lai.
4 Hi khua pakhatkhat ah hin a va zam lai i khua luhnak kutka ah cun a dir lai i khi khua upa hna sinah khan a kong cu a va chim lai; cun annih nih khua chungah cun an luhpi lai i hmun an pek lai i, anmah sinah cun a um lai.
5 Cun thisen phuhlamtu nih a dawi ahcun, mithattu cu a kut chungah an rak pek awk a si lai lo, zeicahtiah a innpa a rak thah cu hngalh lo le hlanah huatnak ngei loin a si.
6 Cun mi zapi hmaiah biaceih awkah a dir hlan le khi caan ah Tlangbawi Ngan a simi a thih hlan tiang cu, khi khua ah cun a um lai; khi tikah mithattu cu a zaamtakmi amah khua le amah inn ah khan a kir òhan lai,’ tiah chim hna,” tiah a ti.
7 Cucaah Naftali tlangram i Galilee ram chungah Kedesh le, Efraim tlangram ah Shekhem le, Judah tlangram ah Kiriath-arba (cucu Hebron) cu an thim hna.
8 Cun Jeriko nichuahlei Jordan tiva ral ah Reuben phun chungin tlangrawn ram ramlak i a ummi Bezer le, Gad phun chungin Gilead i a ummi Ramoth le, Manasseh phun chungin Bashan i a ummi Golan kha an thim hna.
9 Mah khua hna hi Israel mi vialte le an lak i khual a pemmi hna caah tinhmi an si, zeitintiah timh cianak um loin mi a thatmi paoh nih khika ah an zam i, mi zapi hmaiah a dir hlanah cun thisen phuhlamtu kut in a thih nakhnga lo, tinhmi an si.