30
Kir Òhannak Ding Bawipa Nih Bia A Kam Hna
1 Bawipa sinin Jeremiah sinah a rami bia.
2 Hihi Bawipa, Israel Pathian bia cu a si: Na sin i ka chimmi bia vialte kha cauk chungah òial tuah,
3 zeicahtiah mah hihi Bawipa bia hrimhrim a si: Ka mi Israel mi hna le Judah mi hna an vanòhatnak ka pek òhan hna lai ni a ra lio, tiah Bawipa nih a ti; an pupa hna sinah ka pekmi ram ah khan ka kirpi òhan hna lai i cu ram cu an co lai.
4 Hi bia hi Israel le Judah kong ah Bawipa nih a chimmi a si:
5 “Daihnak thawng si loin,
launak ai thawng le
òihnak ai thawng kha ka theih.
6 I hal u law ruat tuah hmanh u!
Pa nih fa a hring kho maw?
A si kun ahcun, zeicahdah
pa nih nu naunganfah
ing bangin
an paw lawng an i domh ko kun?
Zeicahdah rau diakduak in
an um dih?
7 Òih a nungmi ni cu a ra lio;
cu tluk òih a nungmi ni cu
a um bal lo,
cu ni cu Jakob tefa hna caah
harnak caan a si;
Sihmanhsehlaw him tein
an chuak ko lai,” tiah a ti.
8 Cun khi ni a phak tikah, an hngawng i hngawngkual cu ka khiah hna lai i an cikcin cu ka chah dih hna lai; ramdangmi nih an duhduh in an hmang ti hna lai lo.
9 Bawipa an Pathian le an caah ka chuahter laimi an siangpahrang David kha an rian an òuan cang hna lai, tiah Ralkapbu Bawipa nih a ti.
10 “Cucaah cun òih hlah maw Jakob,
ka sal;
Maw Israel, lungdong in um hlah,
tiah Bawipa nih a ti.
Zeicahtiah ram hlapi khan
kan ratpi òhan lai i na tefa hna cu
sal i an tannak hmun khan
ka kirpi òhan hna lai;
Cun Jakob cu hnangam tein
a um òhan lai i
thluachuak le lungdai in a um lai. Ref 30.10-11: Jer 46.27-28
11 Zeicahtiah Bawipa nih,
na sinah ka um i
kan khamh lai, tiah a ti.
Nannih kan òhek hnanak
miphun vialte cu
an donghnak ka phakter hna lai.
Sihmanhsehlaw nang cu
na donghnak kan phakter lai lo.
Dantat awk naa tlakning in
dan kan tat nain
a hloh cu kan hlo taktak lai lo,”
12 Hi bia hi Bawipa nih
Zion sinah a chimmi a si:
Na hma cu damh khawh ding
a si ti lo i
Tuknak na inmi cu a fak ngaingai ko.
13 Nangmah an zohkhenhtu ding
ahohmanh an um lo i
Cuar thar cu a corh kho ti lai lo.
14 Nangmah a rak in dawtu vialte nih
khan an in philh cang;
Zeihmanh ah an in rel ti lo.
Ral nih an in òhuat bantukin
kan òhuat i
Zaangfahnak ngei loin dan
kan tat cang;
Zeicahtiah na òhat lonak cu a ngan i
Na sualnak cu a tam ngaingai.
15 Zeicahdah na hliamhma ruangah
na phunzai len ko i
Ka hma cu an dam kho
ti lai lo, na ti?
Na òhat lonak cu a ngan i na sualnak
a tam ngaingai caah pei
hi bantukin dan kan tat cu.
16 Asinain, an eitu vialte cu
ei an si ve lai i
An hremtu vialte hna cu
sal ah an tang lai.
Nangmah aan ramhtu cu ramh
an si ve lai i
nangmah aan hrawktu cu hrawh
ka siter ve hna lai.
17 Mi nih nang cu, “Òhawlmi,
hawikom zeihmanh a ngei lomi
Zion, an in ti nain,
Cuar thar cu ka corhter òhan lai i
na hma cu ka damter òhan lai,”
18 Bawipa nih hitin a ti:
Zohhmanh, Jakob tefa hna cu
an vanòhatnak kha
ka pek òhan hna lai i
An umnak kip ah khan
ka dawtnak kha
ka hmuhsak hna lai.
Khua cu an rawknak mual cungah
khan sak an si òhan cio lai i
Inn kip chungah khan a rak um
tawnmi chungkhar kha
an um òhan cio hna lai.
19 Cuka i a ummi hna nih cun
thangòhatnak hla an sa lai i
lunglawmhnak in an au lai.
Ka karhter hna lai, an zor chuk lai lo;
Upatnak ka pek hna lai, nautat
an si ti lai lo.
20 An fale hna cu hlanlio i
an sining ah khan
ka siter òhan hna lai i
An mibu hna cu ka hmaika ah
fehter an si lai.
A hremtu vialte hna cu dan
ka tat hna lai;
21 Anmah chung mi kha
an uktu ah a chuak lai i
Anmah mi hrimhrim kha
an bawi a si lai.
Ahohmanh nih anmah tein
an ka naih ngam bal lo caah,
Keimah nih amah cu, ka naih, tiah
ka ti lai i a ka naih lai,
tiah Bawipa nih a ti.
22 Cucaah nannih cu ka mi nan si lai i
Kei cu nan Pathian ka si lai.
23 Zohhmanh, zei bantuk thlichia dah
Bawipa sinin a chuakmi khi a si?
Zeizong vialte a phiak dihtu
phuchim a si khih.
Miòhalo hna lu cungah cun aa zel;
24 Aa tinhmi le a duhnak kha
a tlinh hlan le a lim hlanah cun
a dong lai lo.
Mah hi kong hi hmailei ah
fiang tein nan hngalh te lai.