1 Cu hnuah cun Jesuh cu Galilee rili ral ah khan a kal, cucu Tiberius tili an ti. 2 Rai a ngeimi hna cungah khuaruahhar hmelchunhnak a tuahmi an hmuh caah mi runpi nih an zulh. 3 Jesuh cu tlang cungah a kai i cuka ah cun a hnuzul hna he an òhu. 4 Judah mi Lanhtak Puai cu a phan dengmang. 5 A hei zoh i mirunpi cu amah leiah an rat kha a hmuh tik hna ah Jesuh nih Filip kha, “Hi mi hna ei awk caah zeitindah changreu kan cawk hnga?” a ti. 6 Cucu amah hneksaknak ah khan a chim, zeitintiah a tuah hngami cu amah nih a hngalh ko. 7 Filip nih, “Tlawmte cio an co awk hmanh ah danari zahnih nih a zat lai lo,” tiah a leh. 8 A hnuzul lak i pakhat Simon Peter unaupa Andru nih, 9 “Hika ah hin changreu hlum nga le nga fang hnih a ngeimi tlangval pakhat a um; sihmanhsehlaw hi vialte mi caah zeidah a òhathnem hnga?” a ti. 10 Jesuh nih, “Mi hna hi òhutter hna u,” a ti. Cuka ah cun ramhring aa hnuai dul ko, an òhu i thong nga hrawng an si. 11 Jesuh nih changreu cu a lak i lawmhnak in thla a cam hnuah a òhumi kha a phawt hna; nga zong an duh zat in a phawt hna. 12 Khim lakin an ei hnuah a hnuzul hna cu, “Eibang hleivuang kha tlawttlau loin khawm dih u,” a ti hna. 13 An khawmh i changreu hlum nga in an eibang a hleimi cu sei hleihnih a khat. 14 Mizapi nih hmelchunhnak a tuahmi kha an hmuh tikah, “Hi pa hi vawlei ah a ra hngami profet taktak cu a si ko!” an ti. 15 Hramhram in siangpahrang ah tuah an timh kha Jesuh nih a rak hngalh caah amah lawngin tlang leiah aa zukphiak diam òhan.

16 Zanlei a hung si tikah a hnuzul hna cu rili ah cun an vung kal. 17 Lawng chungah an lut i rili tan in Kapernaum lei panh in an i thawh. Khua a mui cang nain Jesuh cu an sinah a phan hlei lo. 18 Thli fak piin a hran caah rili ah tilet a tho. 19 Meng thum meng li hrawng an lawng an zah ah khin Jesuh cu a ke in rili cungah kal in an lawng lei a hun fuh hna kha an hmuh i an òih. 20 Sihmanhsehlaw Jesuh nih, “Keimah ka si, òih hlah u,” a ti hna. 21 Cun an lawng chungah thanuam ngaiin an luhter i luklakte ah an lawng nih cun an i timhmi hmun cu a hei phanh.

22 A thaizing ah cun rili khatlei i a tangmi hna nih cuka ah cun lawng pakhat lawng an hmuh i Jesuh cu a hnuzul hna sinah lawng ah a lut lo, a hnuzul hna kha anmah lawngin an kal, tiah an ruah. 23 Sihmanhsehlaw Tiberius in a rami lawng hna cu Bawipa nih lunglawmhnak thla a cam i changreu an einak hmun pawngah khan an ra. 24 Mizapi nih khika ah Jesuh a um lo, a hnuzul hna zong an um fawn lo, ti an hngalh tikah lawng ah cun an lut i Kapernaum ah an kal i Jesuh cu an va kawl.

25 Jesuh cu rili ral khatlei i an va hmuh tikah, “Cawnpiaktu, zeitik ah dah hika ah hin na rat?” an ti. 26 Jesuh nih, “Biangaite kan chimh hna, hmelchunhnak nan hmuh caah nan ka kawl a si lo, changreu khim ko in nan i ei caah nan ka kawl,” a ti hna. 27 A lo khomi rawl caah nan rethei hlah u, nuncang hmunhnak tiang a nguh ding rawl ca tu ah nan rethei deuh u. Cu rawl cu Mi Fapa nih an pek hna lai; zeitintiah Pa Pathian nih a cungah a cakhenhnak khan a khenh cang,” a ti hna. 28 Cun an thawh i, “Pathian rian kan òuan khawh nakhnga zeidah kan tuah lai?” tiah an hal. 29 Jesuh nih, “A thlahmi nan zumh hi Pathian rian nan òuan cu a si ko,” a ti hna. 30 Cucaah hitihin an ti, “A si ahcun, kan hmuh i kan in zumh khawh nakhnga zei hmelchunhnak dah na tuah lai? Zeidah na òuan hnga? 31 Kan pupa hna nih ramcar ah manna an ei; ‘Amah nih ei awkah van in changreu a pek hna,’ tiah Cathiang ah aa òial bantuk khan, a si,” an ti. 32 Biangaite kan chimh hna, van in changreu an petu hna kha Moses a si lo; van in changreu taktak an petu hna cu ka Pa a si. 33 Zeitintiah Pathian changreu cu van in a rung i vawlei ah nunnak a pek,” tiah Jesuh nih a ti hna. 34 Annih nih, “Bawipa, cu changreu cu kan pe zungzal ko,” an ti.

35 Jesuh nih, “Keimah hi nunnak changreu cu ka si; ka sinah a rami paoh an rawl a òam ti lai lo i a ka zummi paoh cu an ti a hal bal ti lai lo. 36 Asinain nan ka hmu ko cang nain nan ka zum hlei lo, kan ti hna. 37 Ka Pa nih a ka pekmi vialte hna cu ka sinah an ra lai; ka sinah a rami paoh cu ka òhawl hna lai lo. 38 Zeitintiah van in ka rung òum cu keimah duhmi tuah awkah a si lo, a ka thlahtu duhmi tuah awkah a si. 39 A ka thlahtu duhmi cu a ka pekmi hna paoh kha thlau loin a donghnak ni ah thawhter te kha a si. 40 Ka Pa duhmi cu, Fapa a hmu i a zummi paoh nih nuncang hmunhnak hmu hna seh, ti kha a si. A donghnak ni ah ka thawhter te hna lai,” a ti hna.

41 “Keimah cu van in a rungmi changreu ka si,” a ti ruangah Judah mihna cu an phunzai. 42 “Hihi Josef fapa, a nu le a pa zong kan hngalh komi Jesuh kha a si lo maw? Zeitindah atu ah ‘Vancung in ka rung,’ a ti?” an ti. 43 Jesuh nih, “Phunzai lengmang hlah u. 44 A ka thlahtu ka Pa nih keimah leiah a hui lo ahcun ahohmanh ka sinah a ra kho lo. A donghnak ah ka thawhter te hna lai. 45 Profet cauk ah, ‘An dihlakin Pathian nih a cawnpiak hna lai,’ tiah aa òial. Pa sinin a thei i a cawngmi hna paoh cu ka sinah an ra. 46 Pa a hmu cangmi aho tal an um tinak a si lo; Pathian sinin a rami lawng hi Pa a hmumi cu a si. 47 Biangaite kan chimh hna, a zummi paoh nih nuncang hmunhnak an ngeih. 48 Keimah hi nunnak changreu cu ka si. 49 Nan pupa hna nih ramcar ah manna an ei nain an thi. 50 Hihi van in a rungmi changreu a si i a eimi paoh cu an thi lo. 51 Keimah hi a nungmi changreu, van in a rungmi cu ka si; hi changreu a eimi paoh cu an nung zungzal lai. Vawlei nunnak caah ka pek laimi changreu cu ka sa hi a si,” a ti hna.

52 Cu tikah Judah mi hna cu anmah le anmah an i al i, “Zeitindah mah Pa nih hin a sa cu ei awkah a kan pek khawh lai?” an ti. 53 Cucaah Jesuh nih, “Biangaite kan chimh hna, Mi Fapa a sa nan ei i a thi nan din lo ahcun nan chungah nunnak a um lo; 54 ka sa a ei i ka thi a dingmi paoh nih cun nuncang hmunhnak a ngeih i a donghnak ni ah cun ka thawhter te lai. 55 Ka sa cu rawl taktak a si i ka thi cu din awk taktak a si. 56 Ka sa a ei i ka thi a dingmi paoh cu keimah chungah a um i kei zong a chungah ka um ve. 57 A nungmi ka Pa nih a ka thlah bantukin Pa thawngin ka nung i cucaah keimah a ka eimi paoh cu keimah thawngin a nung lai. 58 Cucu van in a rungmi changreu cu a si. Nan pupa hna nih an ei i an thih bantuk kha a si lo; hi changreu a eimi paoh cu an nung zungzal lai,” a ti hna. 59 Hihi Kapernaum khua sinakok ah a cawnpiak lio hna i a chimmi a si.

60 A hnuzul tampi nih an theih tikah, “Hi bia hi bia har a si, ahodah a thei thiam kho hnga?” an ti. 61 Sihmanhsehlaw Jesuh nih a hnuzul hna phunzai kha a lung chungin a hngalh i, “Hihi nan lung a si lo ti u? 62 Cuti a si kun ahcun, Mi Fapa hi a rak umnak ah khan a kai òhan hmu u law zeitindah a si kun hnga? 63 Nunnak petu cu thlarau a si, thisa cu zeihmanh a si lo; kan chimhmi hna bia cu thlarau le nunnak an si. 64 Sihmanhsehlaw nanmah lakah a zum lomi acheu nan um,” a ti hna. Zeicahtiah a thawkter tein ahodah a zum lomi, ti le aho nih dah amah kha a rawi te lai, ti cu Jesuh nih a hngalh ko hna. 65 “Cucaah cun hen pei Pa nih nawl a pek lo ahcun ahohmanh ka sinah an ra kho lo, kan ti hna kha,” a ti hna.

66 Cu hnu cun a zultu tampi hna cu an i zukphiak i an helhnaih ti lo. 67 Jesuh nih hleihnih hna cu a thawh hna i, “Nannih tah zam nan i tim ve maw?” a ti hna. 68 Simon Peter nih, “Aho sinah hen kan zam hnga? Nuncang hmunhnak bia na ngeih; 69 nangmah cu Pathian Mi Thiang na si zong kan hngalh cang i kan zumh fawn cang,” tiah a leh. 70 Jesuh nih, “Nannih hleihnih hna hi keimah nih kan thim hna lo maw? Nan lak i pakhat cu khuachia ah aa cang!” a ti. 71 Simon Iskariot fapa Judas kong kha a chim, zeitintiah hleihnihlak i amah pakhat cu rawitu ding kha a rak si.