1 Jesuh nih Johan nakin zultu tam deuh a ser hna i tam deuh baptisma a pek hna ti Farasi mi hna nih an hngalh ti kha Bawipa nih a theih tikah, 2 (Amah Jesuh nih baptisma a pe hna lo, a hnuzultu hna tu nih an pek). 3 Judea ram a chuahtak i Galilee ah a kir òhan. 4 Samaria ram hei tan pah a hau; 5 cucaah Samaria ram Saikhar timi khua a va phan. Cucu Jakob nih a fapa Josef sinah a pekmi ram pawng kha a si. 6 Jakob tikhor timi kha cuka ah cun a um i Jesuh cu a khualtlawnnak in a baat ngaingai cang caah tikhor hramah cun a òhu. Cu lio cu chun lingcingte a si.

7 Cu lioah cun ti than awkin Samaria minu a ra. Jesuh nih, “Din awk ti ra ka pe,” a ti. 8 A hnuzul hna cu rawl cawk awkin khua chungah an kal. 9 Samaria minu nih cun, “Zeitindah nang Judah mi nih kei Samaria minu cu din awk ti na ka hal?” a ti. Judah mi le Samaria mi hi zei thil hmanh an hmang òi bal lo. 10 Jesuh nih, “Pathian laksawng le ‘Din awk ti ka pe’ a titu hi hngal law cu amah sinah na hal deuh hnga i nunnak ti cu an pek ko hnga,” a ti. 11 Minu nih cun, “Bawipa, ti thannak na ngei lo, tikhor nih a thuk fawn, nunnak ti cu khoika in dah na than hnga? 12 Kan pu Jakob nakin maw na ngan deuh? Hi tikhor hi a kan pek i amah le a fale le a saòil hna zong nih hika ti hi an din tawn,” a ti. 13 Jesuh nih, “Hi ti a dingmi paoh cu an ti a hal òhan lai. 14 Sihmanhsehlaw keimah nih ka pek hngami ti a dingmi paoh cu an chungah tiput ah a cang lai i nuncang hmunhnak tiangin a put lai,” tiah a ti. 15 Minu nih, “Bawipa, ka ti a hal ti nakhnga lo le hika ah hin ti ka than ti nakhnga lo cu ti cu rak ka pe,” tiah a ti.

16 Jesuh nih, “Na va va au law hika ah hin ra òhan,” a ti. 17 Minu nih cun, “Va ka ngeih òung lo,” a ti. Jesuh nih, “Va ka ngei lo, na ti hi na hmaan. 18 Va panga na ngei cang i atu ah na ngeih komi hi na va taktak a si lo; na chimmi hi a hmaan ko,” a ti. 19 Minu nih cun, “Bawipa, profet na si ti ka hngalh. 20 Kan pupa hna cu hi tlang ah hin Pathian an bia tawn. Nannih tu nih cun Jerusalem lawngah mi nih Pathian cu biak awk a si nan ti,” a ti. 21 Jesuh nih a leh òhan i, “Minu, hi tlang theng le Jerusalem theng ah si loin mi nih Pathian an biak caan a ra lio, cucu zum ko. 22 Nannih nih nan hngalh lomi nan biak tawn; kannih nih cun kan hngalhmi kan biak, zeitintiah khamhnak cu Judah mi hna sinin a ra; 23 atu cu Pathian a bia taktakmi hna nih cun thlarau le biatak in an biak caan a ra lio, a phanh hmanh a phan ko cang. Cu bantukin a biatu cu Pa nih a duh hna. 24 Pathian cu thlarau a si, amah a biatu hna paoh nih thlarau le biatak in an biak awk a si,” a ti. 25 Minu nih, “Messiah (Khrih an timi) a ra lai, ti cu ka hngalh. A rat tikah cun zeizong vialte a kan hmuhsak te ko lai,” a ti. 26 “Nangmah sin i bia a chimtu hi Keimah a simi pei ka si cu,” tiah Jesuh nih a ti.

27 Cu lioah cun a hnuzul hna cu an ra phan. Minu he an i chawnh an hmuh tikah an khuaruah a har, sihmanhsehlaw ahohmanh nih, “Zeidah na duh?” ti maw, “Zeicahdah mah nu he khan nan i chawnh?” ti zong an ti lo. 28 Cun minu nih a tium cu a kaltak, khua chungah a va lut i, 29 “Ra u, ka sining vialte a ka hngaltu pa hi ra zoh hmanh u, Khrih cu a si kho sual hnga maw?” a ti. 30 Khua cun an chuak i Jesuh sinah cun an kal.

31 Cu lioah cun a hnuzul hna nih, “Cawnpiaktu, zeital ei tuah hen,” an ti. 32 Sihmanhsehlaw anih nih, “Nan hngalh lomi ei awk rawl ka ngei,” a ti hna. 33 Cucaah a hnuzul hna cu pakhat le pakhat an i ceih i, “Aho tal nih rawl an rak put hnga maw?” an ti. 34 Jesuh nih, “Kei ka rawl cu a ka thlahtu duhnak tuah le a rian tlamtlinh hi a si; 35 ‘Hi hnu thla li ah rawl òuan a cu lai’ nan ti lo mei? Kan chimh hna, hei zohhmanh u, zeitluk in dah òuan a cut i a vaar dih cang khi. 36 A òuantu hna nih cun òuan man an hmuh i nuncang hmunhnak caah theitlai zong an khawmh; a vorhtu hna le a zuntu hna cu an i lawmh òi nakhnga caah a si. 37 Cucaah, ‘Pakhat nih a tuh i pakhat nih a zun’ timi phungthluk kha a hman ko. 38 Nan tuh lomi zun awkah kan thlah hna; midang nih an rak òuan i an òuanmi chungah cun nannih nan vaa tel ve,” a ti hna.

39 Minu nih khan, “Ka tuahmi vialte a hngalh dih,” a ti caah khan cu khua i Samaria mi tampi nih an zumh. 40 Cucaah Samaria mi hna a sin i an rat tikah an sin i um dingin an nawl i cuka ah cun ni hnih a cam. 41 A bia chimmi thawng cun midang tampi nih an zumh. 42 Minu cu an thawh i, “Kan zumh hi na bia ruangah khan a si ti lo, kanmah hrimhrim nih kan theih i, hihi vawlei khamhtu cu a si taktak ko, tiah kan hngalh,” an ti.

43 Ni hnih hnuah khan cuka cun a chuak i Galilee ram ah a kal. 44 Amah Jesuh hrimhrim nih khan profet cu amah ram ah upatnak a hmu lo, timi kha a langhter. 45 Cucaah Galilee a phanh tikah cun Jerusalem puai lio i a tuahmi vialte kha an rak hmuh cang caah Galilee mi hna nih cun an rak conglawmh; annih zong kha puai ah cun an rak kal ve caah a si.

46 Cucaah Galilee ram Kana khua, ti kha mitsur zu i a canternak ah khan a va kal òhan. Cun Kapernaum khua ah khan bawi pakhat a fapa a zawmi a rak um. 47 Judea in Galilee ah Jesuh a ra ti kha a theih tikah a thi dengmangmi a fapa damter awkah rat awkin a va nawl. 48 Jesuh nih a thawh i, “Hmelchunhnak le khuaruahharnak nan hmuh lo ahcun nan zum lai lo,” a ti. 49 Bawi nih cun, “Bawipa, ka fa a thih hlanah rung ko,” a ti. 50 Jesuh nih, “Va kal, na fapa cu a nung lai,” a ti. Mipa nih Jesuh chimmi bia kha a zumh i a kal. 51 A vung kal lioah khan a miòhi hna he lam ah an i tong i a fapa a nun kha an chimh. 52 A hung òhat deuh caan te kha a hal hna tikah, “Nizan chunhnu suimilam pakhat hrawngah a tak linh a dai,” an ti. 53 Cu caan te cu, “Na fapa cu a nung lai,” tiah Jesuh nih a ti caan te kha a si, ti kha a pa nih a hngalh. Cun amah le a innchungkhar nih an dihlak in an zumh. 54 Cucu Jesuh nih Judea in Galilee i a rat hnuah a voi hnihnak hmelchunh a tuahmi a si.