1 Jesuh nih cu bia a chim dih cun van a cau i, “Ka Pa, a caan a phan deng cang. Fapa nih an sunlawiter nakhnga na Fapa cu sunlawiter ko cang. 2 Na ka pekmi vialte hna cungah nuncang hmunhnak ka pek khawh hna nakhnga nawlngeihnak na ka pek cang. 3 Nangmah Pathian taktak pakhat le na thlahmi Jesuh Khrih hngalh hi nuncang hmunhnak cu a si. 4 Òuan awkah na ka pekmi cu tlam ka tlinh cang caah hin vawlei ah kan sunlawiter cang; 5 Atu cu ka Pa, vawlei sem hlan in na sin i sunlawinak ka ngeih cangmi khan nangmah hmai theng ah hin ka sunlawiter ko cang.

6 Vawlei in na ka pekmi hna sinah na min cu ka langhter cang, nangmah mi an si i ka sinah na ka pek hna i na bia cu an zulh. 7 Atu cu ka sinah na ka pekmi vialte cu nangmah sinin a rami a si ti kha an hngalh; 8 zeitintiah na ka pekmi bia hna kha an sinah ka pek hna; an cohlan i na sinin a ra taktakmi ka si kha an hngalh i nangmah nih na ka thlah ti kha an zumh. 9 Anmah caah thla ka cam, vawlei caah thla ka cam lo; na ka pekmi hna ca tu ah thla ka cam deuh, zeitintiah nangmah ta an si. 10 Ka ta paoh cu na ta an si i na ta paoh cu ka ta an si i anmah thawngin sunlawiter ka si. 11 Atu cu vawlei ah ka um ti lai lo, sihmanhsehlaw annih tu cu vawlei ah an um ko rih lai i kei cu na sinah ka ra lai. A Thiangmi ka Pa, nangmah le keimah zong pakhat kan si bantukin pakhat an si ve nakhnga na ka pekmi hna cu na min in huppheng ko hna. 12 An sinah ka rak um lio i na ka pekmi paoh kha cu na min in ka huhphenh ko hna. Cathiang a tlin nakhnga, a tlau hnga ding pa ti lo kha cu pakhat hmanh tlau loin him tein ka kilven ko hna. 13 Sihmanhsehlaw atu cu na sinah ka ra lai. A cungah kaa lawmhnak tlam a tlin khawh nakhnga hi thil hna hi vawlei ah ka chim. 14 Na bia ka thanh cang hna; keimah zong vawlei ta ka si lo bantukin annih zong vawlei ta an si lo caah vawlei nih a huat hna. 15 Vawlei cung hin la ko hna tiah thla ka cam lo; sihmanhsehlaw òhat lo nakin na huhphenh hna awk caah thla ka cam. 16 Keimah zong vawlei ta ka si lo bantukin vawlei ta an si lo. 17 Na bia cu biatak a si i biatak ah cun thianter ko hna. 18 Vawlei ah na ka thlah bantukin keimah zong nih vawlei ah ka thlah ve hna. 19 Biatak ah thianter an si taktak khawh ve nakhnga anmah ruangah keimah zong kaa thianh cang.

20 Mah hna ca lawngah hin thla ka cam lo, an chimmi thawngin a ka zum laimi hna ca zongah ka cam. 21 An dihlakin pakhat an si awkah ka cam. Ka Pa, keimah ah nangmah na um i kei zong nangmah ah ka um bantuk hin annih zong kanmah ah um ve hna seh law nangmah nih na ka thlah hi mi vialte nih an zumh lai. 22 Sunlawinak na ka pekmi kha anmah sinah ka pek ve hna, kannih zong pakhat kan si bantukin pakhat si ko hna seh. 23 Pakhat taktak an si khawh nakhnga an chungah ka um i nang zong ka chungah na um. Cucaah vawlei nih hin na ka thlah ti le na ka dawt bantukin na dawt ve hna ti kha a hngalh lai. 24 Ka Pa, vawlei sem hlan in na ka dawt caah na ka pekmi sunlawinak kha an hmuh nakhnga nangmah nih na ka pekmi annih zong hi ka umnak ah um ter ka duh hna. 25 A dingmi ka Pa, vawlei nih cun nang cu an hngal lo nain keimah nih kan hngalh; mah hna zong nih hin na ka thlahmi ka si kha an hngalh. 26 Na min ka hngalhter hna i na ka dawtnak kha an chungah a um i an chungah ka um ve khawh nakhnga na min kha ka hngalhter rih hna lai,” tiah a ti.