7
Gideon Ralkap Nih Midian An Tei Hna
1 Cun Jerubbaal (cucu Gideon) le amah sinah a ummi vialte cu zing tein an tho i Harod tiput pawngah an riak; cun Midian riahhmun cu an chaklei ah, Moreh tlang hram, nelrawn chungah a si.
2 Bawipa nih Gideon cu a chawnh i, “Keimah nih Midian mi cu an kut chung i pek awkah na sin i a ummi hna kha an tam tuk; Israel nih, ‘Keimah kut hrimhrim nih pei a ka khamh tiah,’ tiin ka cung lam ah aa uangthlar sual hnga.
3 Cucaah mizapi hnatheih ah, ‘A thin a phangmi le a tha a thermi paoh inn ah kir hna seh,’ tiah va thanh tuah,” tiah a ti. Cun Gideon nih a hneksak hna; 22-000 an kir i 10-000 an tang. Ref 7.3: Deu 20.8
4 Cun Bawipa nih Gideon cu, “Mi cu an tam tuk rih; tiva ah vun kalpi hna law, khika ah keimah nih kan hneksakpiak hna lai; nangmah sinah, ‘Hi pa hi na sinah kal seh,’ ka timi paoh na sinah an kal lai; cun ‘Hi pa hi na sinah kal hlah seh,’ ka timi paoh cu an kal lai lo,” tiah a ti.
5 Cucaah mi cu ti ah cun a vun kalpi hna i Bawipa nih Gideon sinah cun, “Uico nih ti a liah bangin a lei in ti a liakmi paoh cu a dang tein na chiah hna lai; cu bantukin ti din awkah khuk bilmi zong,” tiah a ti.
6 Cun a liah in a liakmi, a kut a kaa i a hun chiami cu 300 an si; sihmanhsehlaw a dang vialte tu nih cun ti din awkah an khuk kha an i bil.
7 Cun Bawipa nih Gideon cu, “A liah in a liakmi mi 300 khan nannih cu kan khamh hna lai i Midian mi cu nan kut chungah kan pek hna lai; a dang vialte cu an inn cio ah kal hna seh,” tiah a ti.
8 Cucaah mi hna i an thawl le an muko cu an sin khan a lak hna; cun Israel mi a dang vialte cu anmah le an thlam cio ah a kalter hna, sihmanhsehlaw 300 kha cu a umter hna; cun Midian riahhmun cu nelrawn chungah an thlang ah a si.
9 Khi zan òhiamòhiam ah cun Bawipa nih amah cu, “Tho law, an riahhmun cu vung do tuah, zeitintiah na kut chungah kan pek cang.
10 Sihmanhsehlaw a kal na òih ahcun, na sinum Purah he khan riahhmun ah cun vung kal u;
11 cun annih nih an chimmi kha nan theih lai i cu hnuah cun an riahhmun cu vung doh awkah na kut cu òhawnter an si lai,” tiah a ti. Cun a sinum Purah he khan riahhmun chung i a ummi hriampumi hna ralven buk ah khan an vung kal.
12 Cun Midian mi hna le Amalek mi hna le Nichuahlei mi vialte hna cu nel ah cun an tam leiah khaubok zat in an um tengtung ko i an kalauk hna cu rel cawk lo, an tam ning cu rilikam i thetse zat an si.
13 Gideon nih a rat tikah, zohhmanh, mipa pakhat nih a hawipa kha a mang a rak chim len ko i, “Zohhmanh, mang pakhat ka manh; cun zohhmanh, barli changreu hlum khat cu Midian mi hna riahhmun ah a rung ril i riahbuk kha a phan i a khen i cucaah cun a tlu, cun a bingtalet in aa let i cucaah riahbuk cu per thlup in a ril ko,” tiah a ti.
14 Cun a hawipa nih cun, “Mah hihi zeidang zeidang si loin Israel mi Joash fapa Gideon i a vainam a si ko cu; Pathian nih Midian le ralkapbu vialte cu a kut chungah a pek cang hna,” tiah a leh.
15 Gideon nih mang le a sullam kong an i chimh cu a theih tikah Pathian kha a biak; cun Israel riahhmun ah khan a ra kir i, “Tho tuah u, zeitintiah Pathian nih Midian ralkapbu cu nan kut chungah an pek cang hna,” tiah a ti.
16 Cun mi 300 kha phu thum ah a cheu hna i an dihlak in an kut chungah muko le thawllawng, a chung i meifar a ummi kha, a pek cio hna.
17 Cun annih cu, “Keimah kha ka zoh u law, ka tuah bantukin tuah ve u; riahhmun tonter bik ka phak tikah keimah tuah bantukin nan tuah ve lai.
18 Keimah le ka sin i a ummi vialte nih muko kha kan tum tikah, riahhmun velchum i a ummi vialte zong nih muko kha nan rak tum ve lai i, ‘ Bawipa ca le Gideon caah,’ tiin nan au lai,” tiah a ti hna.
19 Cucaah Gideon le a sinah a ummi 100 hna cu zanven a laifang hramthawk, a cawngtu an i chiah kate ah khan, riahhmun tonter cu an va phan; cun muko kha an tum i an kut i an i putmi thawl cu an den hna.
20 Cun phu thum hna nih khan muko kha an tum i thawl kha an khuai hna, an kehlei kut in meifar kha an i put i an orhlei kut in tum awk muko kha an i put; cun, “ Bawipa ca le Gideon caah vainam pakhat!” tiah an au.
21 Cun riahhmun a velchum khan an umnak hmun cio ah an dir i ralkap vialte cu an le dih; an au i an zamter dih hna.
22 Cun muko 300 kha an tum tikah Bawipa nih ralkap vialte cu anmah le anmah kha an vainam in a tukter ciammam hna i ralkap hna cu Zererah lei i Beth-shittah tiang an zam, Tabbath pawng Abel-meholah ramri tiangin.
23 Cun Israel mi hna cu Naftali le Ahser le Manasseh dihlak chungin an kawh hna i Midian kha an dawi hna.
24 Cun Gideon nih Efraim tlangram chung dihlak ah lamkaltu a thlah hna i, “Midian mi doh awkah rung òum tuah u, ti kha rak lakkanh hna u Beth-barah tiangin, cun Jordan zong,” tiah a ti. Cucaah Efraim mi vialte cu an kawh hna i ti kha Beth-barah tiangin an tlaih hna, cun Jordan zong.
25 Cun Midian bawi pahnih Oreb le Zeeb kha an tlaih hna; Midian mi an dawi pah hna ah cun, Oreb cu Oreb lung ah an thah i Zeeb cu Zeeb mitsur nennak ah an thah; cun Oreb lu le Zeeb lu cu Gideon sinah Jordan tiva ral ah an rak phorh hna.