12
Jefthah le Efraim Mi Hna
Efraim mi hna cu, hriamnam i lak u, tiah ti an si i Zafon ah an va kal i Jefthah sinah cun, “Zeicahdah Ammon mi hna doh awkah tiva kha na tan i kannih kha nangmah sin i kal awkah na kan auh lo? Na inn ah kan in duah chih lai,” tiah an ti. Cun Jefthah nih annih cu, “Keimah le ka mi hna nih Ammon mi hna he ralnak fakpi kan rak ngei; cun kan auh tik hna ah an kut chungin nan ka chuah lo. Cun nan ka chuah duh lo ti kha ka hmuh tikah, thih le thih tiin, Ammon mi hna doh awkah khan ka kal i Bawipa nih annih cu ka kut chungah a ka pek hna; cucaah, zeicaah hen dah, keimah doh awkah nihin ah nan ka rathnawh?” tiah a ti hna. Cun Jefthah nih Gilead mi vialte kha a pumh hna i Efraim kha an doh; annih nih, “Efraim le Manasseh lakah, nannih Gilead mi hna cu Efraim chungin a zammi nan si,” an ti hna caah Gilead mi nih Efraim mi kha an thah len hna. Cun Gilead mi nih Jordan tiva tannak hna kha Efraim mi cu an lakkanh hna. Cun Efraim mi a zammi paoh nih, “Ka tanter ko,” an ti tikah, Gilead mi hna nih cun, “Efraim mi na si maw?” tiah an ti. Cun anih nih, “Ka si lo,” a ti tikah, annih nih, “A si ahcun, Shibboleth ti kun,” tiah an ti i anih nih, “Sibboleth,” tiah a ti, zeitintiah dik tein a chim kho lo; khi tikah an tlaih i Jordan tiva tannak hna ah cun an thah hna. Cun khi caan ah Efraim mi 42-000 an thi.
Jefthah nih Israel cu kum ruk bia a ceih hna. Cun Gilead mi Jefthah cu a thi i amah khua Gilead ah cun an vui.
Ibzan, Elon le Abdon Nih Israel Mi Bia An Ceih Hna
Amah hnuah Bethlehem khuami Ibzan nih Israel mi cu bia a ceih hna. Amah nih fapa 30 a ngeih hna; fanu 30 amah phun lengah va a ngeihter hna i a lenglei in fanu 30 a fapale hna caah a luhter hna. Cun Israel mi cu kum sarih bia a ceih hna. 10 Cun Ibzan cu a thi i Bethlehem khua ah an vui.
11 Amah hnuah Zebulun mi Elon nih Israel mi kha bia a ceih hna; cun Israel mi cu kum hra bia a ceih hna. 12 Cun Zebulun mi Elon cu a thi i Zebulun ram chung i Aijalon khua ah an vui.
13 Amah hnuah Pirathon mi Hillel fapa Abdon nih Israel mi kha bia a ceih hna. 14 Amah cu laa 70 cungah aa citmi fapa 40 le tupa 30 a ngei; cun Israel mi kha kum riat bia a ceih hna. 15 Cun Pirathon mi Hillel fapa Abdon cu a thi i Amalek mi tlangram chung i a ummi Efraim ram chungah, Pirathon khua ah an vui.