1 Gilead mi Jefthah cu a òhawngmi ralkap a si, sihmanhsehlaw amah cu hlawhhlangnu fapa a si. Gilead cu Jefthah pa a si. 2 Cun Gilead nupi zong nih cun fapa hna a hun hrinpiak i a nupi fapa hna cu an hung òhan tikah Jefthah cu an hlonh i amah cu, “Nang cu kan pa inn chungah ro na co lai lo, nu dang fa na si caah,” an ti. 3 Khi tikah Jefthah cu a unau hna sinin a zam i Tobram ah a um; cun santlailo pawl kha Jefthah sinah cun an i pumkhawm i amah he cun ral an hranh tawn.

4 Cun tlawmpal hnuah Ammon mi nih Israel mi kha an doh hna. 5 Cun Ammon mi hna nih Israel mi kha an doh tik hna ah, Gilead upa hna cu Jefthah kha Tobram in va lak awkah an kal; 6 cun Jefthah cu, “Ra law, kan hruitu si tuah, Ammon mi kha kan doh khawh hna nakhnga,” tiah an ti. 7 Sihmanhsehlaw Jefthah nih Gilead upa hna cu, “Nannih nih nan ka huat i ka pa inn in nan ka dawi a si lo mei? Zeicahdah atu ah harnak chung nan phak tikah ka sinah nan rat?” tiah a ti hna. 8 Cun Gilead upa hna nih Jefthah cu, “Cucaah cun pei atu cu, kan sin i na kal i Ammon mi cu na doh hna i Gilead chung i a ummi vialte i kan lu na si nakhnga, nangmah leiah kan i mer cu,” an ti. 9 Jefthah nih Gilead upa hna cu, “Ammon mi hna he i doh awkah inn i nan ka tlunpi òhan a si i, annih cu Bawipa nih keimah kha a ka pek ahcun nan lu ka si hnga,” tiah a ti hna. 10 Cun Gilead upa hna nih Jefthah cu, “ Bawipa cu kan karlak i biahngaltu a si lai; na chim bantukin kan tuah hrimhrim lai,” tiah an ti. 11 Cucaah Jefthah cu Gilead upa hna sinah cun a kal i mizapi nih cun an lu le an hruitu ah an ser; cun Jefthah nih a bia vialte cu Bawipa hmaiah Mizpah ah a chim.

12 Cun Jefthah nih Ammon mi hna siangpahrang sinah cun lamkal a hei thlah hna i, “Zei tuah awk dah ka cungah na ngeih i ka ram doh awkah ka sinah na rat?” tiah a ti. 13 Cun Ammon mi hna siangpahrang nih Jefthah i a lamkal hna cu a rak leh hna i, “Israel mi nih Izipt ram in an rat lioah khan ka ram, Arnon in Jabbok tiang, cun Jordan tiang an lak caah, cucaah atu cu remnak tein ka khirh òhan tuah hna,” tiah a ti. 14 Cun Jefthah nih Ammon mi hna siangpahrang sinah cun lamkal a hei thlah òhan hna i 15 anih sinah, “Hi bangin Jefthah nih a ti: Israel mi nih Moab ram siseh, Ammon mi hna ram siseh an la lo, 16 sihmanhsehlaw Izipt ram in an hung kai tikah Israel mi hna cu ramlak in Rili Sen ah an kal i Kadesh an phan. 17 Cu tikah Israel mi nih Edom siangpahrang sinah lamkal an hei thlah hna i, ‘Na ram chungin kan kalter ko, tiah kan in nawl,’ an ti; sihmanhsehlaw Edom siangpahrang nih a ngai duh lo. Cun Moab siangpahrang sin zongah an hei thlah hna, sihmanhsehlaw a hna a tla duh lo. Cucaah Israel mi cu Kadesh ah an tang ko. Ref 11.17: Nam 20.14-21 18 Cun ramlak in an kal i Edom ram le Moab ram kha an vel hna i Arnon khattelei kamah an riak; sihmanhsehlaw Moab ram chungah an lut lo, zeitintiah Arnon cu Moab ramri a si. Ref 11.18: Nam 21.4 19 Cun Israel mi nih Amor mi siangpahrang, Heshbon siangpahrang Sihon sinah lamkal an hei thlah hna; cun Israel mi nih a sinah, ‘Na ram chungin kan ram ah kan kalter ko sawh,’ tiah an nawl. Ref 11.19-22: Nam 21.21-24 20 Sihmanhsehlaw Sihon nih Israel mi hna cu a ram chungin kal awkah a zum hna lo; cucaah Sihon nih a mi vialte kha a pumh hna i Jahaz ah an riak i Israel mi kha an doh hna. 21 Cun Bawipa, Israel mi hna Pathian nih, Sihon le a mi vialte cu Israel mi kut chungah a pek hna i an tei hna; cucaah cu ram i a ummi Amor mi hna ram vialte cu Israel mi nih an co. 22 Cun annih nih Amor mi hna ram vialte cu Arnon in Jabbok tiang, ramlak in Jordan tiang an co. 23 Cuticun Bawipa, Israel mi hna Pathian nih, a mi Israel mi hna hmai in Amor mi hna cu a pawnchuah hna; annih cu nang nih na co awk an si hnga maw? 24 Na pathian Khemosh nih co awkah an pekmi kha na co awk cu a si hnga lo maw? Bawipa kan Pathian nih kan hmai in a pawnchuahmi vialte cu kannih nih kan co hna lai. 25 Nangmah hi, Moab siangpahrang Zippor i a fapa Balak nakin, zei ti tal in na òha deuh maw? Amah nih Israel mi hna kha a hnahnawh hna in a do bal hna maw? Ref 11.25: Nam 22.1-6 26 Israel mi nih Heshbon le a khuate hna chungah le Aroer le a khuate hna chungah le, Arnon tiva kam i a ummi khua vialte hna chung i an um lio, kum 300 chungah khan, zeicahdah kha chungah khan na rak lak òhan hna lo? 27 Cucaah nangmah cungah ka sual lo, ka cung i ral na ser caah hin nangmah tu nih ka cungah na sual; Bawipa, Biaceihtu nih nihin ah hin Israel mi le Ammon mi hna karlak ah bia khiak seh,” tiah a ti. 28 Sihmanhsehlaw Ammon mi hna siangpahrang nih cun Jefthah nih a hei cahmi bia cu zeihmanh ah a rel lo.

29 Cun Bawipa Thlarau cu Jefthah cungah a tlung i Gilead le Manasseh ah aa chawk i Gilead ram Mizpah ah a lan i Gilead ram Mizpah cun Ammon mi hna sinah a va lan chin. 30 Cun Jefthah nih Bawipa sinah biakamnak pakhat a ser i, “Ammon mi cu ka kut chungah na ka pek hna ahcun, 31 Ammon mi hna sinin teinak he ka kir tikah keimah don awkah ka inn innka chungin a chuakmi paoh cu Bawipa ta a si lai i khangh thawinak caah ka pekchanh lai,” tiah a ti. 32 Cucaah Jefthah cu anmah doh awkah khan Ammon mi hna sinah cun a va kal i Bawipa nih annih cu amah kut chungah khan a rak pek hna. 33 Cun Aroer in Minnith khua pawng tiang, khua kul, Abel-keramim tiang, tampi a thah hna. Cucaah Ammon mi hna cu Israel mi hna hmaiah an sung.

34 Cun Jefthah cu Mizpah i a inn ah a tlung i zohhmanh, a fanu nih amah kha don awkah khuangte le laam he a hung chuak; amah lawnglawng cu fa a ngeih; amah hleiah fapa siseh, fanu siseh a ngei ti hna lo. 35 Cun a hmuh tikah a puan kha a thleh hna i, “Aize, ka fanu! Na ka niamter ngaingai ai, keimah ca i harnak nganpi tuahtu ah na cang ai; zeitintiah Bawipa sinah ka kaa ka pau cang i ka biakamnak cu ka la òhan kho ti lo,” tiah a ti. Ref 11.35: Nam 30.2 36 Cun anih nih amah sinah, “Ka pa, Bawipa sinah na kaa na pau cang a si ahcun, na kaa chungin a chuakmi bangin ka cungah tuah ko, Bawipa nih pei na ral Ammon mi hna cungah na phu an hlampiak cang sawk cu,” tiah a ti. 37 Cun a pa sinah cun, “Hi thil hi ka tuahpiak tuah; thla hnih chung ka thlah law, tlang ah ka kal lai i ka vak lai i ngaknu ka sinak hi ka òah tuah lai, keimah le ka hawile nih,” tiah a ti. 38 Cun amah nih, “Va kal ko,” tiah a ti. Cun thla hnih chung kha a thlah; cun a hawile he an kal i ngaknu a sinak kha tlang cungah an òah. 39 Cun thla hnih donghnak ah a pa sinah a ra kir i biakamnak a ser ciami ning khan a cungah a tuah. Zeitikhmanh ah pa a hngal bal lo. Cun Israel mi hna lakah phung ah a cang i 40 Israel mi fanu hna nih kum khat hnu kum khat Gilead mi Jefthah fanu kha kum khat ah ni li lengmang an ngaih.