6
Job Nih A Hawile Kha A Sik Hna
Cun Job nih a leh i:
“Ka thinlinhnak hi a khing thlai
hei si seh law,
Ka vanchiatnak hi a cuai thlai
hei si seh law ka hei duh hnga dah!
Rili thetse nakin a rit deuh ko hnga,
Cucaah cun pei ka bia hi a bultan cu.
Zeicahtiah Lianngan Bik nih
a thal in a ka kah i
A sivai nih ka thlarau cu a ciah.
Pathian òihnunnak nih cun
hmaitonh in an ka tianhnawh.
Ramlak laa cu ram a òam lioah
a awn bal maw?
Cawtum tah ramrawl a ei lioah
a paw bal maw?
Thawtnak a ngei lomi rawl,
cite phulh lomi cu
aho nih dah an ei khawh?
Arti hawng ah khin zeital thawtnak
a um maw?
Cu bantuk rawl cu ka duh hna lo i
ka caah fihnung an si.
 
“Ka halmi cu hei hmu ning law,
Pathian nih ka duhmi cu
hei ka pe seh law,
Pathian nih hei ka rial cikcek dih
seh law,
A kut kha hei samh seh law hei ka lek
ko seh law, ka hei duh hnga dah!
10 Mah hihi ka hnangamnak
a si ko hnga;
Zawnruahnak ngei lo fahnak ah cun
kaa lawm ko hnga;
Zeicahtiah Mi Thiang bia cu
ka hlaw hna lo.
11 Hngah rih khawhnak ding caah
thazang ka ngei ti hnga maw?
Zei donghnak i ruahchan in dah
lungsau in ka um rih hnga?
12 Ka thazang cu lung thazang maw
a si?
Ka titsa cu dar dah a si?
13 Biatak tein, keimah chungah hin
bawmtu zeihmanh a um lo,
Thazang petu paohpaoh cu ka sinin
an zam dih.
 
14 “Mahle hawi cung i zaangfahnak
a ngei lomi cu
Lianngan Bik òihnak a hlawmi a si.
15 Ka unaule hna cu tivacek bantuk
hlen hmangmi an si,
Tivate a kuang a liammi bantuk an si;
16 An chungah tikhal a um caah
an nak i
An chungah hawhra tlang kha
an i thup.
17 A linh caan a phak tikah an lo,
A sat tikah an umnak hmun in
an lo.
18 A run in khual a tlawngmi hna nih
an hun pialhnawh hna,
Ramlak ah cun an hun luhhnawh
hna i an thi tawn.
19 Tema khualtlawng run hna nih
ti cu an kawl,
Sheba khualtlawng mi hna nih
an i ruahchan.
20 An rak i zumh caah khan
an hnabei a dong,
Cuka cu an phan i an lung a ar.
21 Cu bantuk ah cun ka caah hin
nan i cang,
Ka chiatnak kha nan hmuh i
nan òih.
22 ‘Laksawng ka pe tuah u,’ ka ti maw?
Asiloah, ‘Nan chawva chungin
zik ka nawhpiak tuah u,’
ka ti dah?
23 Asiloah, ‘Hi ral kut chung hin
ka chuah u,’ ka ti maw?
Asiloah, ‘Hremtu hna kut chungin
ka tlan u,’ ka ti dah?
 
24 “Ka cawnpiak u law, dai tein
ka um ko lai;
Zeitindah ka palhnak a si kha
ka hngalhter tuah u.
25 Fimnak in òha tein chimh ahcun
ka lung a pem sawk hnga,
Sihmanhsehlaw nan chimmi cu
pakpalawng a si.
26 Ka bia cu leh nan ka duh maw?
A hnabei a dong cangmipa nih
a chimmi cu thli lawng pei
a si ko cu.
27 Ngakòah hna sal i lak awkah
camcawhfung hmanh
nan khiah ko hnga i
Nan hawi òha bik hmanh cu
chawlehnak ah
nan hman ko hnga.
28 Sihmanhsehlaw atu cu ka zoh hnik u,
Nan hmaiah ka lih hrimhrim lai lo.
29 Ruat rih hmanh u, dinlonak cu
ka cungah tuah si hin ti hlah seh,
Cun ka òhatnak cu zumh lo bantukin
um a si caah hin, ruat rih hmanh u.
30 Ka leiah hin palhnak zeital
a um maw?
A ding le a dinglo kha
thleidang kho loin maw ka um?