58
Rawl Ulh Taktak
1 Bawipa nih, “Nan au khawh chungin au tuah u. Ka mi Israel mi cu an sualnak kha chim hna u.
2 Ni fate in an ka biak i, na nawl kha kan zulh hna i ahmaanmi kha kan tuah hna, an ti. Thluachuahnak kan pe law a dingmi phunglam kan pe, an ti,” tiah a ti.
3 Mi nih khan an i thawh i, “ Bawipa nih a hmuh hrathrai ding òung lo ahcun zeicahdah rawl cu kan ulh lai? Zei i a rel òung lo ahcun zeicahdah harnak cu kan in lai?” an ti.
Bawipa nih a thawh hna i, “Rawl nan ulh pah ah pei nanmah duhnak kha nan kemh chih i nan rianòuantu kha nan hrem hna cu.
4 Nan puarhrang zungzal, nan i vel, nan i si lengmang. Hi bantuk rawl ulhnak nih hin nan thlacamnak cu a ka ngaihter lai, tiah nan ruat maw?
5 Rawl nan ulh tikah nanmah le nanmah sifah nan i pe, nan lu cu ram hnah bantukin niam tein nan khun i bawhnak caah khumpuan nan phah i a cungah vutcam nan phulh. Cucu maw rawl ulh nan timi cu a si? Cu nih cun a lung a ton lai ti ah maw nan ka ruah?
6 “Ka duhmi rawl ulhnak cu hihi a si: Hremnak cikcin kha chat hna u law dinlonak hngawngkual kha phoih hna u law hremmi kha luatter hna u.
7 A rawl a òammi kha nan rawl hrawm hna u law inn ngei lo misifak kha tlun inn onh hna u. Aih awk a ngei lomi kha thilpuan òhen hna u law nan sahlawh le nan rualchan hna kha bawm loin um hna hlah u. Hi hi ka duhmi rawl ulh phun cu a si. Ref 58.7: Mat 25.35
8 “Cu ti nan tuah ahcun kan dawt hnanak kha nan cungah zinglei ni ceu bangin a ceu lai i nan hma cu khulrang in a dam lai. Nanmah khamh awkah nan sinah ka um zungzal lai; nan sin i ka umnak nih cun a kam kip in an ven hna lai.
9 Thla nan cam tikah kan leh hna lai. Nan ka chawnh tikah kan chawnh ve hna lai.
“Hremnak le nautatnak le holh òha lo kha nan ngol i
10 rawlòam mi kha rawl nan pek hna i herhbau in khua a sami kha an herhnak nan bawmh hna ahcun, nannih an zultu hna muihnak kha chun ceu ah a cang lai.
11 Cun nannih cu keimah nih lam kan hmuhsak zungzal hna lai i thil òha in nan paw kan khimter zungzal hna lai. Ngandam le thazang òhawng in kan umter hna lai. Ti tampi a ngeimi dum bantuk nan si lai; a kao bal lomi cerhti bantuk nan si lai.
12 Saupi a rawk cangmi nan inn le nan lo kha nan mi nih cun an remh òhan hna lai i hmasa a hlun hram ah khan an bunh òhan hna lai. A kuaimi thil kha a remh i a rawkmi inn kha a sa òhantu, ti nannih cu nan si lai,” a ti hna.
Sabbath Ni Ulh Man Laksawng
13 Bawipa nih, “Sabbath ni cu nizarh ah nan rel i cu ni ah cun nanmah duhnak tuah kha nan i sum i ka nizarh cu nan sunhsak i nan upat i cu ni ahcun khual tlawng lo le rian òuan lo le holh sawhsawh loin nan um ahcun,
14 ka rian nan òuannak chungin a chuakmi lawmhnak kha nan hmuh lai. Vawleicung mi vialte kha nanmah cu kan upatter hna lai i nan pu Jakob ka pekmi ram kha nanmah nih nan co lai. Hi bia cu Bawipa nih ka chim,” tiah a ti.