5
Mitsur Dum Hla Phuahmi
1 Ka hawipa le a mitsur dum hla ka
phuahmi hna hi ngai tuah u.
Vawlei òhatnak tlang cungah
ka hawipa nih mitsur dum
pakhat a ngei. Ref 5.1-2: Mat 21.33; Mar 12.1; Luk 20.9
2 Vawlei kha a cawh i lung kha
a hlonh hna;
mitsur kung òha bik phun kha
a cin hna.
Mitsur ruang cawnghnak caah cun
parthlam pakhat a sak i
mitsur thei nennak caah cun
khor pakhat a cawh.
Mitsur thei an hmin lai cu a hngah,
sihmanhsehlaw an thor dih ai.
3 Cucaah ka hawipa nih cun aa thawh i, “Jerusalem khua chung i a ummi hna le Judah ram chung i a ummi hna, keimah le ka mitsur dum hi bia kan thlek tuah u.
4 Ka dum caah hin tuah ka tlolhmi zei tal a um maw? Ka tlolhmi zeihmanh a um lo ahcun, zeicahdah mitsur thei a òhami a tlai lai tiah ka ruahmi tu tlai loin, a thormi lawng a tlai kun?
5 “Cucaah cun ka dum cu hitihin ka tuah lai. A kulhnak kha ka bauh hna lai i a hau kha ka hrawh hna lai i saram kha ka eiter dih hna lai i ka nanter dih hna lai.
6 Ka buatter lai i mitsur ruang cu an nge ka tanpiak hna lai lo; vawlei zong kha ka co lai lo, hling le so tu ka khahter hna lai. Khuadawm hmanh kha, ruah pe hlah, tiah ka thlauh lai,” a ti.
7 Israel cu Lianngan Bik Bawipa dum cu a si;
Judah ram mi hna cu mitsur ruang
a cinmi cu an si.
Thil òha kha nan tuah lai tiah a ti hna,
sihmanhsehlaw lai nawnnak
lehlam kha an tuah.
A dingmi thil kha nan tuah lai
tiah a ti hna,
Sihmanhsehlaw an hremmi hna
òah thawng tu kha
a theihmi cu a si.
Mi Nih Thilòhalo An Tuahmi
8 Nan lo cang! Nan ngeih cia ah khan inn thar le lo thar lawng nan i chap chin luaimai ko. Midang caah hmun a dih zau cang lai i ram chungah hin nanmah pi lawng khua nan sa lai.
9 Cun Ralkapbu Bawipa nih a chimmi kha ka theih i, “Hi inn ngan pipi le inn òhaòha hna hi an rawk dih lai.
10 Rel nga hmun lo ah an cinmi mitsur ruang nih mitsur hang thawl khat lawng a chuah lai i faci phor hra an tuhmi nih phor khat lawng a vui lai,” a ti.
11 Nan lo cang! Zu din ah zingkate in nan tho i zan ah tlaipi tiang ri cikcek in nan din.
12 Nan puai ah tingtang le thonglawi le khuang he a erh in nan i erh i zu he nan i ciah. Sihmanhsehlaw Bawipa nih zeidah a tuah ti kha nan hngal lo.
13 Cucaah cun nannih cu sal ah kalpi nan si lai. Nan hruaitu pawl cu rawlòam in an thi lai i nan zapi pawl cu tihal in an thi lai.
14 Mithi khua cu anmah ei duh ah khan a kaa kau piin aa an ko. Jerusalem khuachung tuavon pawl zong kha, zapi pawl aa chawk ur komi hna he cun a dolh duahmah ko hna.
15 An dihlak in ningzahnak an hmu lai i milungpuam vialte kha òhumh an si lai.
16 Sihmanhsehlaw Ralkapbu Bawipa nih a lianhngannak cu ahmaanmi thil a tuahmi ah khan a langhter i a thiannak cu a mi hna an bia a ceihpiak hnanak ah khan a langhter.
17 Khuapi an rawhnak hmun ah cun tuufa nih ram an òam lai i meheh fa nih ram no an ei lai.
18 Nan lo cang! Nan sualnak kha nan i hlitphuak kho ti lo.
19 Nan i thawh i, “ Bawipa nih ka tuah lai a timi cu khulrang in tuah tuah ngat seh, kan zoh fom lai ta. Israel Pathian nih cun aa timhmi cu tuah tuah ngat seh. A lung chungah zeidah aa chiah ti cu kan zoh fom lai ta,” nan ti.
20 Nan lo cang! Thil òha cu thil òhalo nan ti i thil òhalo cu thil òha nan ti. Khuamui cu khuaceu nan ti i khuaceu cu khuamui nan ti. A khaami kha a thlum nan ti i a thlummi kha a khaa nan ti.
21 Nan lo cang! Kan fim nan ti, a fim ngaingai ah nan i ruat.
22 Nan lo cang! Zureu thawl lei i minthang hna! Zu ser le zu lap ton i òih ngei lo hna!
23 Hi bantuk thil tuah ah cun hi tlukin nan ral a òha nain zik an in nawh hna tikah misual cu nan luatter hna i a sual lomi kha an bia ding tein nan ceihpiak duh hna lo.
24 Cucaah cun facangzi le ramro cu an ker i an kangh bantukin, Israel Pathian a thiangmi Ralkapbu Bawipa nih a kan cawnpiakmi kha nan ngaih duh lo caah nan hram cu a thu lai i nan par cu a ro lai.
25 Bawipa cu a mi hna cungah a thin a hung i anmah kha dantat awkah a kut a samh. Tlang cu an i hnin lai i a thimi cu an ruak kha zatlang lam ah an ril lai. Cu ti a si hmanh ahcun Bawipa thinhunnak cu a dong rih lai lo i dantatnak pek awkah a kut cu aa samh ko rih lai.
26 Bawipa nih, lamhlapi i a ummi miphun kha, ra u, tiah hmelchunhnak a pek hna. Vanhramdeng in fifik in a kawh hna. An ra cang, khulrang in an ra cang.
27 Ahohmanh a bami an um lo, ahohmanh a rilmi an um lo, ahohmanh a ngu i aa hngilhmi an um lo. Taisawm a dormi pakhat hmanh an um lo, kedan hri a catmi pakhat hmanh an um lo.
28 An cantiang cu a har ngaingai i an likuk cu i kuai pengpung in an um. An rang cu an tin kha òeklung bantukin an hak, an rangleng kekual hna cu phuchim herh in an i herh.
29 An ralkap hna cu, a sasehmi ka chut hna hlah seh, tiah aa kalpimi chiandeih bantuk an si.
30 Cu ni a phak tikah cun Israel cu an hawhawthnawh lai i an aw cu rili thawng bantuk a si lai. Hi ram hi zohhmanh u! Muihnak le harnak lawng a si ko. Ceunak cu muihnak nih a dolh cang!