44
Bawipa Lawnglawng Hi Pathian A Si
1 Bawipa nih aa thawh i,
“Ka sal Israel mi hna, ngai tuah u,
Jakob tefa, ka mi thimmi hna,
ngai tuah u.
2 Nanmah an sertu hna cu Bawipa ka si,
nan nunnak a hram a thawknak
khan keimah nih kan bawmh hna.
Nan thinphang hlah u; nanmah cu
ka sal nan si,
ka dawtmi ka mithim nan si.
3 “Ti a halmi ram kha ti ka pek lai i
thetse ram ah khan tiva ka luanter
hna lai.
Nan tefa cu ka lianhngannak
ka toih hna lai i
nan ciruang cu ka thluachuahnak
ka toih hna lai.
4 Ti òha tein toihmi ram le tiva kam i
a khomi inhliam kung bantukin
5 “Midang zong nih, pakhat hnu
pakhat in,
‘Kei cu Bawipa mi ka si,’ an ti lai i
Israel mi chungah khan an i fon lai.
An ban ah khan Bawipa min
hmelchunhnak kha an ser lai i
‘Kei cu Bawipa mi ka si ve,’ an ti lai,”
6 Israel mi kha a uk i
a hupphengtu hna Bawipa,
Ralkapbu Bawipa nih hitin a ti:
“Keimah cu a hmasa bik le
a hmanung bik ka si,
Keimah lawnglawng hi Pathian ka si i
Keimah chim lo a dang pathian
zeihmanh an um lo. Ref 44.6: Isa 48.12; Biat 1.17; 22.13
7 Ka tuahmi hi a tuah khotu a dang
aho tal an um maw?
Caan hramthawknak in caan donghnak
tiang thil a um lai ding
fiang tein a chimchung khotu
aho tal an um maw?
8 Ka mi hna, nan thinphang hlah u.
Thil um lai ding vialte kha hlanlio
piin atu tiang,
ka rak chimchung cang kha nan
hngalh i ka tehte cu nanmah nan si.
Pathian dang aho tal an um maw?
Lungpi dang ahohmanh an um lo,
ka hngalhmi pakhat hmanh
an um lo.
Siasal Biak Cu Nihchuak A Si
9 Siasal a sermi hna cu pakpalawng an si i a sung tuk hringhran ah an ruahmi an pathian hna cu santlailo an si. Hi pathian a biami hna cu mitcaw le mihrut an si i ningzahnak an ing lai.
10 Pathian bantukin biak awkah thir le dar in siasal ser rian cu pakpalawng rian a si.
11 Siasal a sertu hna cu minung an si, minung nak ngan deuh an si lo. Ra hna seh law biaceihnak hmun ah ra chuak ve tuah hna seh § an thin a phang lai i nihsawhnak an ing ve ko lai.
12 Sosertu nih thir pakhat kha aa lak i mei ah a linh. A òhawngmi a kut in a den i mui ngei ah a ser. A rawl a òam, a ti a hal i a ba.
13 Lehtama nih khan thing kha a tah. A ser dingmi mui kha thungrang in a rin i a rinning cun a hriamnam in a saih. Minung mui in a ser, aa dawh ngai mipa mui in a ser i biakinn chungah an chiah.
14 Cu sernak i hman awkah sidar thing a va hau, asiloah kuhthing maw saipres thing maw tupi chungah khan a va thim. Cucu a duh lo ahcun lawril thing kha a cin in a cin hna i a òhantertu hna ding ruah kha a hngah.
15 Thingkung kha a cheu cu tih awkah a hman i a cheu cu siasal sernak ah a hman. A cheu kha mei tih awkah a hman i cu a mei cu toh awk le rawl chuannak ah a hman. Cun a cheu kha pathian sernak ah a hman i cucu a biak.
16 Thing a cheu cu mei tih awkah khan a hman, cu mei ah cun sa kha a chuan i a ei i a paw a khim. Mei cu a to i, “A lum i a va nuam dah!” a ti.
17 Cu thing òhiamòhiam a tangmi cun siasal pakhat a ser. A hmaiah a kun i a biak. A sinah thla a cam i, “Nangmah cu ka pathian na si, ka khamh tuah,” a ti.
18 Cu bantuk mi cu an hrut tuk, kan tuahmi kha zei a si ti awk an hngal lo. Biatak hngalh kha an duh lo, an mit an chinhkanh i an lungthin an kharkanh.
19 Siasal a sertu nih, “Thing cu, a cheu mei tih awkah ka hman. Cun mei ah cun rawl le sa ka chuan hna i ka ei hna. Cun thing kha a tangmi cu siasal ah ka ser i cu thingtan hmaiah cun atu hi ka kun,” ti ruah awk a hngal lo.
20 Cu ti a tuah cu vutcam ei sullam bantuk men a si. Ruahnak hrut a rak ngeihmi nih khan a pingah a hruai tuk cang caah bawmh khawh hmanh a si ti lo. Ka kut i kaa putmi siasal hi pathian a si hrimhrim lo ti kha a hngal lo.
Bawipa Cu Israel Tlantu A Si
21 Bawipa nih aa thawh i,
“Israel mi hna, hi thil hi philh hlah u;
ka sal nan si kha philh hlah u.
Nannih cu ka sal si awkah
kan ser hna, cucaah kan philh
bal hna lai lo.
22 Nan sualnak cu khuadawm bantukin
ka chem dih cang.
Ka sinah ra kir u, nanmah
an khamhtu hna cu keimah
23 Nannih van hna, lunglawmhnak in
au tuah u,
vawlei cung i a thukmi hmun hna,
au tuah u.
Tlang te tupi chung thing vialte hna,
lunglawmhnak in au tuah u.
Bawipa nih a mi Israel mi cu
a khamh cang hna i
cuticun a lianhngannak kha
24 “Keimah cu Bawipa, nanmah
an sertu hna le an khamhtu hna ka si.
Keimah cu zeizong vialte a sertu
Bawipa ka si.
Keimah lawnglawng nih
van cu ka samh hna;
vawlei ka rak ser ah hin
ahohmanh nih an ka bawm lo.
25 Kut òial zohthiam kha mihrut ah
ka canter hna i
arfi zohthiam nih an chimchungmi
kha pakpalawng ah ka canter.
Mifim hna fimnak bia cu
pakpalawng ah ka ser i
an fimnak cu hruhnak a si kha
ka langhter. Ref 44.25: 1Kor 1.20
26 Sihmanhsehlaw ka sal nih cun thil
a chimchung tikah le
ka timhmi phuan awkah lamkal
ka thlah tikah,
cu ka timhmi hna le chimchungmi
thil hna cu ka tlinter hna.
Jerusalem cu ka thawh i, na chungah
mi an um òhan lai,
Judah ram khua cu remh an si òhan lai
tiah ka chimh.
Hi khua hna cu an rawhnak chung
khan an tho òhan lai.
27 Rili cu ka nawl in ka carter.
28 Sairas cu ka thawh i, ‘Keimah aiawh
in uktu a si ding cu nangmah na si;
tuah seh ti kan duhmi kha
na tuah lai:
Jerusalem cu sa òhan u tiah nawl
na pek hna lai i
Biakinn cu a hram ser u, tiah
na ti hna lai,’ ka ti,” tiah a ti. Ref 44.28: 2Cha 36.23; Ezr 1.2