22
Jerusalem Kong Bia
1 Hi bia hi Langhnak Nelrawn kong bia a si.
Zei thil dah a um? Zeicahdah khuapi chung mi hna cu an dihlak in an inn cung cio ah puai an tuah?
2 Khuapi cu a dihlak in aa tuai, thaw le ri he a khat i a hninh in aa hnin.
Hi ral ah a thimi nan mi hna hi raltuk i a thimi an si lo.
3 Nan haotu vialte kha, an zam dih i thal fang khat thlah hlanah an ral nih an tlaih dih hna.
4 Cucaah cun diriam tein ka òah nakhnga, ka dawn hlah u. Ka mi hi zat riamruam an thih caah hin, hnemh ka zal hlah u.
5 Atu caan hi lau caan, sungh caan, i tuai caan, Langhnak Nelrawn caah a si i, hihi Bawipa Ralkapbu Bawipa nih kan cungah a tluntermi a si. Kan khua kulhnak vampang cu an chimh dih hna i kan bawm u ti au thawng cu tlang ah a thang.
6 Elam ram in a rami ralkap hna cu rang an rak i cit i li le thal he an ra. Kir ram in a rami ralkap hna cu an phaw kha timh cia tein an um.
7 Judah ram chung nelrawn hna cu rangleng an khat i Jerusalem hauka ah rangcung ralkap kha an dir.
8 Judah ralhruang vialte cu an cim dih.
Cu bantukin thil a hung si tikah nan hriamnam kha nan i chuah.
9-10 Jerusalem kulhnak vampang kha khuazei zawn dah remh a herh ti kha nan hngalh. Jerusalem khua chung inn kha nan rel dih hna i a cheu cu khua kulhnak vampang remhnak caah khan nan òheh hna i a lung kha nan hman hna. Khua chung i ti i khon awkah
11 kulhnak vampang chungah khan tikhonnak inn nan sak i a hlunmi tidil in a rung luangmi ti kha nan khon. Sihmanhsehlaw hi thil vialte hlan piin a rak khangtu, hi thil a tluntertu Pathian cu zeihmanh ah nan rel lo.
12 Bawipa Ralkapbu Pathian nih cun, òah awk le mitthli tlak awk le nan lu i kongh awk le buri i aih awkah an auh hna.
13 Sihmanhsehlaw a nih salam men in nan ni i puai tu nan tuah. Tuu le caw kha nan that i zu nan ding. “Ding in ei ko u sih! Thaizing ah cun kan hei thi dih ko lai hen cu,” nan ti. Ref 22.13: 1Kor 15.32
14 Ralkapbu Bawipa hrimhrim nih a ka chawnh i, “Hi thil òhalo hi, an nun chung paoh cu, ngaihthiam an si bal lo. Hi bia cu Bawipa Ralkapbu Pathian nih ka chimmi a si,” a ti.
Shebna Ralrin Peknak
15 Bawipa Ralkapbu Pathian nih Shebna sin kal kha a ka fial, (Shebna cu siangpahrang inn chungkhar uktu bawi a si.)
16 A ka thawh i, “Aho ah dah naa rel? Tlangpang lungpang ah khan zeicahdah thlan pakhat naa ser?
17 Mingan cu na si sawk ko lai, sihmanhsehlaw Bawipa nih an thur lai i an hlonh lai.
18 Pumpululh zit in an zit i ram ngan deuh ah an hlonh vurmar lai. Cuka ah cun naa uanthlar ngaingaimi rangleng hna hramah khan na thi lai. Nangmah cu na bawipa innchungkhar cungah ningzahnak a tluntertu na si.
19 Bawipa nih na rian in an phuah lai i a sangmi na umnak hmun khan an òhumh lai, tiah va chim,” a ka ti.
20 Bawipa nih Shebna cu a thawh i, “Cu thil cu a hung phanh tikah, Hilkiah fapa Eliakim ka sal kha ka kawh lai.
21 Na bawinak puan le taisawm cu amah kha ka pek lai i nangmah nih na rak ngeihmi nawlngeihnak vialte kha amah cungah ka chiah lai. Jerusalem khuami le Judah ram mi hna caah anih cu pa bantuk a si lai.
22 David te chung tawh cu a liang cungah ka chiah lai i a hunmi cu ahohmanh nih an khar kho lai lo, a kharmi cu ahohmanh nih an hung kho lai lo. Ref 22.22: Biat 3.7
23 Thlam hri hrennak khenhteo bantukin fek tein ka khenh lai i a innchungkhar dihlak caah upatnak hrampi a si lai.
24 “Sihmanhsehlaw a rualchan vialte hna le a tefa vialte hna cu a caah thilrit an si lai. Thil bahnak in aa thlaimi um le kheng bantukin a cungin an i thlai lai.
25 Cu bantukin thil a si tikah fek tein aa khenhmi thil bahnak cu a pong lai i a tla lai i cucu a cungin aa thlaimi vialte an donghnak a si lai,” a ti. Cu bia cu Bawipa bia a si.