6
Minung Òhat Lonak
1 Cu tikah cun vawlei cung khuazakip ah minung tampi an um cang i fanu kha an hrin hna. Ref 6.1-4: Job 1.6, 2.1
2 Cu fanu hna an i dawh cu pathian fapa hna nih khan an hmuh hna i cucaah an duhmi kha an i thim hna i an òhit hna.
3 Cun Bawipa nih aa thawh i, “Minung hi zungzal in nun cu ka sianh hna lai lo, zeicahtiah titsa an si. Atu thawk in kum za le kum kul nak tam an nung ti lai lo,” a ti.
4 Cu caan le cu hnu zongah cun, vawlei cungah hin Nefilim mingan pipi kha an rak um i annih cu minung fanu hna le pathian fapa hna tefa kha an si. Annih cu hlanlio mi miralòha le miminthang kha an si. Ref 6.4: Nam 13.33
5 Bawipa nih minung cu khuazakip ah an òhat lo tuk hringhran le an lungchung cu ruahnak òhalo lawnglawng a khah kha a hmuh tikah, Ref 6.5-8: Mat 24.37; Luk 17.26; 1Pet 3.20
6 minung a rak ser hna i vawlei cung i a rak umter hna kha a ngaih a chia. Aa ngaichih i,
7 “Ka sermi minung vialte hna hi vawleicung in ka hloh dih hna lai. Saram vialte le va vialte he ka hloh dih hna lai, ka rak ser hna hi kaa ngaichih,” a ti.
8 Asinain Noah nih cun Bawipa kha a lung a ton.
9-10 Noah tefa hna cu hihi an si: fapa pathum a ngeih hna, Shem, Ham le Jafeth an si. Noah cu miòha a si i amah lawnglawng kha cu caan ah cun Pathian lung a tongmi a si; Pathian he i hawikomh in a nungmi a si. Ref 6.9: 2Pet 2.5
11 Sihmanhsehlaw midang vialte cu Pathian mithmuh ah miòhalo an si dih i an òhat lonak cu khuazakip ah a karh.
12 Pathian nih vawlei cu a zoh tikah a òha hrimhrim lo ti kha a hmuh, zeicahtiah minung kha an dihlak in sual in an nung.
Noah Nih Lawng A Ser
13 Cun Pathian nih Noah cu a thawh i, “Minung hi an dihlak in hrawh awkah ka ruah cang. An dihlak in ka hrawh hna lai, zeicahtiah vawlei hi sualnak an tuahmi in a khat.
14 Cucaah cun lawng pakhat in i ser, thing òha kha hmang hna law a chungah a khaan ser hna, cun lawng cu a chunglei he a lenglei he kahtazasi thuh dih.
15 A tung dong 300, a vang dong 50, a san dong 30 in na sak lai.
16 Lawng cu a cungkhuh na ser lai i a cungkhuh le a vampang karah dong khat na awnter lai. Dot thum in na sak lai i a kam ah innka na ser lai.
17 A nungmi thil vialte hrawhnak ding caah vawlei cungah buanchukcho ka tlunter lai. Vawlei cung i a ummi thil vialte an thi dih lai,
18 sihmanhsehlaw nangmah he cun biakamnak tu ka ser lai. Lawng chungah cun na nupi le na fapa hna le an nupile hna kha na luhpi hna lai i
19 saram chungin a nu le a pa cio nung tein chiah dingah na luhpi ve hna lai.
20 Nung tein chiah dingah va phun dihlak chungin pahnih cio, saram phun chungin, a hme he a ngan he, pahnih cio, lawng chungah cun luhpi an si lai.
21 Cun nanmah ca le anmah caah rawl phun zakip na lak hna lai i na khon hna lai,” a ti.
22 Cun Noah nih khan, Pathian nih a fialmi vialte cu a tuah dih. Ref 6.22: Heb 11.7