4
Kain le Abel
1 Cun Adam nih a nupi Evi cu a hngalh i fa a pawi. Fapa pakhat a hrin i, “ Bawipa bawmhnak thawngin fapa pakhat ka hmuh,” tiah a ti. Cucaah a min ah Kain a sak.
2 Cun hnu deuh ah a nau Abel zong kha a hun hrin. Abel cu tuukhal a si i Kain cu lothlo a si.
3 Kain nih cun a lochung chuak cu Bawipa sinah laksawng ah a rak put hna.
4 Cun Abel zong nih khan a saòil nih an hrin hmasa bikmi hna kha a rak put ve hna i a thah hna i an sa a òhatnak bik kha Bawipa sinah cun laksawng ah a pek ve hna. Bawipa cu Abel le a laksawng cungah khan a lung a si, Ref 4.4: Heb 11.4
5 sihmanhsehlaw Kain le a laksawng cungah khan cun a lung a si lo. Kain cu a thin a hung i a hmai a chia.
6 Cu tikah Bawipa nih Kain cu a thawh i, “Zeicahdah na thin a hun i na hmai a chiat?
7 Òhatnak kha rak tuah law cu na merh ko hnga; sihmanhsehlaw òhat lonak kha na rak tuah caah sualnak nih cun nangmah tei awkah sahrang bantukin an bawh ko. Nangmah kha uk an duh, sihmanhsehlaw nangmah nih na tei awk a si,” a ti.
8 Cun Kain nih a nau Abel kha a thawh i, “I chawk tuah u sih,” a ti. Lo an va phak tikah khan Kain nih a nau cu a thah. Ref 4.8: Mat 23.35; Luk 11.51; 1Jhn 3.12
9 Bawipa nih Kain cu, “Na nau Abel tah, khuazei ah dah a um?” tiah a hal. Kain nih cun, “Ka hngal lo. Ka nau cawngtu maw ka si awk a si?” tiah a leh.
10 Cun Bawipa nih cun, “Zeicahdah hi thil òhalo hi na tuah? Ngai hmanh! Nangmah nih na chuahmi na nau thisen nih khan vawlei in a ka auh lengmang ko. Ref 4.10: Heb 12.24
11 Nangmah cu chiatserh na si cang i hi hmun hin òhawl na si lai. Hi hmun vawlei hi na nau thisen na chuahmi dolh awkah a kaa a rak angmi kha a si.
12 Lo na thlawh tikah vawlei nih rawl zeihmanh an chuahpiak lai lo; vawlei cungah inn ngei loin a vak lengmangmi na si lai,” a ti.
13 Cun Kain nih khan Bawipa cu: “Hi dantatnak hi ka caah a fak tuk.
14 Hi ram le nangmah hmaika in na ka òhawl i kei cu mivakvai ka si cang lai i a ka hmumi paoh nih an ka thah lai,” tiah a leh.
15 Cun Bawipa nih Kain cu, “Cuticun a si lai lo, nangmah an thatmi paoh cu a let sarih in teirul cham a si lai,” tiah a ti. Cucaah Bawipa nih Kain cungah cun, a hmumi paoh nih that hna hlah seh tiah hmelchunhnak pakhat a chiah.
16 Kain nih cun Bawipa cu a kaltak i Eden nichuahlei i a ummi ram “Vahvaihnak ram” timi ah cun a va um.
Kain Tefa Hna
17 Kain nih a nupi cu a hngalh i fa a pawi i fapa pakhat a hrin i a min ah Enok a sak. Cun Kain nih cun khua pakhat a ser i cu khua cu a min ah a fapa min chuankhan in Enok a sak.
18 Enok nih fapa pakhat a ngeih i a min cu Irad a si; Irad cu Mehujael pa a si, Mehujael cu Methusael pa a si i Methusael cu Lamek pa a si.
19 Lamek cu nupi pahnih a ngei, pakhat cu Adah a si i a dang pakhat cu Zillah a si.
20 Adah nih cun Jabal a hrin i Jabal cu, caw a khal i thlam chung i khua a sami pawl, a hringsortu hna a si.
21 Jabal nau cu a min ah Jubal a si, amah cu tingtang le thonglawi tum a thiammi hna a hringsortu hna a si.
22 Cun Zillah nih Tubal-kain a hrin i amah cu thir le dar hreihriam vialte a sertu hna a hringsortu a si. Tubal-kain far cu Naamah a si.
23 Lamek nih khan a nupile cu a thawh hna i,
“Ka nupi Adah le Zillah, ka bia ngai tuah u.
Mipa pakhat cu, amah nih
a ka tuk caah ka thah,
Tlangval pakhat cu, amah nih
a ka hliam caah ka thah.
24 Kain a tutu paoh cu a let sarih in
phuhlam an si ahcun,
Keimah a ka tutu chinchin cu
let sawm sarih let sarih in phuhlam an si lai,” a ti. Ref 4.24: Mat 18.22
Seth le Enosh
25 Cun Adam nih khan a nupi cu a hngalh òhan i fapa a hrin. A nupi nih cun, “Kain nih a thahmi Abel airawltu ah khan Pathian nih fapa pakhat a ka pek,” a ti i a min ah Seth a sak.
26 Seth nih cun fapa pakhat a ngeih i a min ah Enosh a sak. Cu caan cun mi nih Bawipa kha a min in biak hram an thawk.