15
Pathian le Abram Biakamnak
1 Cu hnuah cun Abram nih langhnak a hmuh i Bawipa bia kha a theih. Bawipa nih cun a thawh i,
“Abram, na thinphang hlah.
Keimah cu phaw bantukin
an hupphengtu ka si.
Na laksawng cu a nganpi a si lai,”
a ti.
2 Sihmanhsehlaw Abram nih cun a thawh ve i, “Maw Bawipa Pathian, kei cu fa ka ngei lo; cucaah zeitindah laksawng cu na ka pek khawh lai? Ka ro a ka cotu ding cu Damaskas khuami Eliezer hi pei a si ko hi.
3 Fa zeihmanh na ka pe lo i cucaah cun ka sal hna lak i pakhatkhat nih ka ro an ka co cu a hau ko lai,” a ti.
4 Cun Bawipa nih, “Hi sal hi na rocotu cu a si lai lo, na rocotu cu nangmah na fapa hrimhrim a si lai,” tiin a chimh cu a theih òhan.
5 Bawipa nih cun lengah a chuahpi i, “Van khi zoh law na rel khawh ahcun arfi khi rel tuah hna. Na tefa cu khi arfi zat khi an si lai,” a ti. Ref 15.5: Rom 4.18; Heb 11.12
6 Abram nih Bawipa cu a zumh i cu a zumhnak cu Bawipa nih a dinnak ah a cohlanpiak. Ref 15.6: Rom 4.3; Gal 3.6; Jei 2.23
7 Cun Bawipa nih Abram cu a thawh i, “Hi ram hi nangmah pek awkah Khaldi ram Ur khua in chuah an fialtu cu Bawipa hi ka si,” a ti.
8 Sihmanhsehlaw Abram nih cun, “Maw Bawipa Pathian, cucu ka ta a si lai ti cu zeitindah ka hngalh khawh lai?” a ti.
9 Pathian nih cun, “Cawla kum thum a timi pakhat, meheh kum thum a timi pakhat, tuukawng kum thum a simi pakhat, cun òhuro pakhat le laileng pakhat kha rak ka pe hna,” a ti.
10 Hi saram vialte hi Abram nih Pathian sinah khan a rak put hna. A cheu hna i a cheumi hna cu hmaitonh cio in tlang hnih ah a chiah hna; va kha cu a can hna lo.
11 Langta nih an run zuanhnawh hna i a òhawl hna.
12 Ni a tlak cuahmah tikah khan Abram cu aa hngilh i a cungah òihnak nganpi a tlung. Ref 15.12: Job 4.13-14
13 Bawipa nih cun a thawh i, “Na tefa hna cu ram dang ah khual an si lai, cuka ah cun sal ah an cang lai i kum 400 chung hremnak an ing lai. Ref 15.13: Exo 1.1-14; Lam 7.6
14 Asinain cu bantukin a hremtu hna miphun kha keimah nih dan ka tat hna lai i cu ram in an chuah tikah chawva tampi he an chuak lai. Ref 15.14: Exo 12.40-41; Lam 7.7
15 Nang tu cu chan tling in na nung lai i dai tein na thi lai; khup kha hmuah in na nun hnuah an in vui lai.
16 Na tefa hna cu chan li hnuah an ra kir òhan lai, zeicahtiah Amor mi hna cu dantat awktlak hrimhrim in an sual tik lawngah ka òhawl hna lai,” a ti.
17 Cun ni a tlak i khua a muih tikah a khumi mei um pakhat le a alhmi mei tom pakhat kha an hung chuak i sa a chiahmi hna karlak ah khan an kal.
18 Cu ni ah cun Bawipa nih Abram cu bia a kam i, “Hi ram hi a dihlak in na tefa kha ka pek hna lai tiah bia kaa kam, Izipt ram ri i a ummi tiva in tiva ngan Zufrates tiang a si lai; Ref 15.18: Lam 7.5
19 Ken mi hna ram le Keniz mi hna ram le Kadmon mi hna ram le
20 Hit mi hna ram le Periz mi hna ram le Refaim mi hna ram le
21 Amor mi hna ram le Kanaan mi hna ram le Girgash mi hna ram le Jebus mi hna ram zong hi an i tel chih dih lai,” a ti.