41
1 Cun hmunthiang chungah khan a ka luhpi i a tung kha a tah hna; an chahlei cu dong ruk cio an si.
2 A luhnak kaa cu dong hra a kau. Luhnak khattelei kap le khattelei kap i a ummi vampang cu dong nga veve a kaumi an si. A saulei cu a tah i dong 40 a si, a kauhlei cu dong kul a si.
3 A chungah a vung lut i luhnak kaa i a ummi tung kha a tah hna i dong hnih cio an si; luhnak kaa cu dong ruk a si, khattelei kap le khattelei kap i a ummi vampang hna cu dong sarih cio an si.
4 Cun hmunthiang a va donghnak i a khaan cu a tah i a saulei dong kul, a kauhlei dong kul a si. Cun a ka thawh i, ‘Hihi Hmun Thiang Bik cu a si,’ a ti.
5 Biakinn vampang cu a tah; dong ruk a sang i cun biakinn velchum in khattelei kam le khattelei kam i a ummi khaan hna cu dong li cio an kauhlei cu a si.
6 A khaan hna cu a thonh in an i thonh, dot thum in an um i dot khat ah khaan 30 lengmang an si. Biakinn a velchum i a ummi vampang ah cun a khaan hna dohtu caah khan fonghlei an chiah hna i cucaah biakinn vampang nih khan a doh hna a hau lo.
7 A khaan hna dohnak cu dot khat hnu dot khat in biakinn velchum i an kai i an kauh chin lengmang bantuk khan a sir i a ummi khaan hna cu dot khat in dot khat ah an hung kai tikah khan an kau deuh chin lengmang ve; biakinn a kap ah cun cunglei kainak hlei pakhat a um, cucaah tangnung bik dot in cungnung bik dot tiang kai duh tikah a laifang dot tan khan kai a hau.
8 Cun biakinn velchum ah cun donhhlei pakhat zong a um kha ka hmuh; a sir i a ummi khaan hna an hram cu fung pakhat khengte kha a si, dong ruk cio an si.
9 A sir i a ummi khaan hna lenglei vampang an chahlei cu dong nga cio a si; cun donhhlei le
10 tual a khaan hna karlak cu dong kul a si i biakinn a velchum in a si dih.
11 A sir khaan hna in innleng i va kalnak caah khan chaklei kamah luhnak a um i thlanglei kamah luhnak pakhat a um. Innleng a kauhlei cu a velchum in dong nga a si.
12 Biakinn tual lei a hoihmi inn, nitlaklei kam i a ummi cu dong 70 a kau; inn vampang cu a velchum in dong nga a chah i a saulei cu dong 90 a si.
Biakinn Tahnak le Sining
13 Biakinn cu a tah; a saulei cu dong 100 a si; cun a tual le a innpi le a vampang hna cu dong 100 an dihlak in an saulei a si;
14 cun biakinn nichuahlei kap le a tual cu a kauhlei dong 100 a si.
15 Biakinn in nitlaklei ah a ummi tual a donghnak i a ummi inn le a kam veve i a ummi vampang cu a tah hna i a saulei dong 100 a si.
Biakinn chung hmunthiang le chungchin hmunthiang le a lenglei innleng hna cu thingphel in an chon hna;
16 cun an pathum cun an velchum i a ummi thlalangawng cu an velchum in thing in kamh an si.
17 Vawlei in thlalangawng tiang, innka cung tiang, a chunglei he a lenglei he a ummi khaan hna, vampang velchum i a ummi hna cu a chunglei he a lenglei he an cungah hmanthlak suai an si,
18 an suaimi hna cu cherubim le tumkung an si, cherubim pahnih karlak ah tumkung pakhat lengmang in.
19 Cherub pakhat nih hmai pahnih lengmang an ngei: pakhat cu minung hmai a si i tumkung pakhat lei kha a zoh, a dang pakhat cu chiandeih hmai a si i a dang tumkung pakhat lei kha a zoh ve. Cuticun biakinn kha a velchum in hmanthlak an suai dih.
20 Cherubim le tumkung hna cu vawlei in innka cunglei tiang kha an suai hna i hmunthiang vampang zongah khan an suai hna.
21 Hmunthiang innka tung hna cu tungvangpalh an si.
22 Hmun Thiang Bik hmaiah cun thing biakòheng a lomi kha a um, a saulei cu dong hnih a si, a sanlei cu dong thum a si; a kil ah khan tung an bunh hna i a hram le a sir cu thing an si. Mah hihi Bawipa hmai i a ummi cabuai a si, tiah a ka chimh.
23 Chungpi nih cun innkhar pahnih a ngei i Hmun Thiang Bik zong nih cun pahnih a ngei ve.
24 Innka nih cun a khar pahnih cio an ngei i cu a khar hna cu kapza in hrenhmi an si caah hun khawh, kau khawh, an si.
25 Vampang i an suai bantuk khan an cungah cherubim le tumkung kha an suai hna, cun lenglei innleng cungah cun thing in sermi cungzar a um.
26 Cun innleng ah cun a kap hnih in vampang ah khan thlalangawng an um i an kil ah cun tumkung kha an suai hna.