1 Mah hihi Bawipa nih ka sinah a chimmi bia an si. A ka thawh i, 2 “Mipa, lainawng khualipi cu bia na ceih lai maw? Thil fihnung a tuahmi vialte cu na hngalhter lai maw? 3 Anih cu thawh law hihi Bawipa bia a si tiah chim tuah: A ralhau chungah thisen a chuah i a cungah amah lila nih vanchiatnak aa tluntertu khualipi, siasal aa ser riangmang hna i cu aa sernak thawngin aa thurhhnawmhmi khualipi cu a caah ngaihchiat awk a va si dah! 4 Thisen na chuah ruang i sualnak na tuahmi cu nangmah cungah a si i siasal na sermi hna ruang i thurhhnawmhnak na hmuhmi cu nangmah cungah a si. Hi na tuahnak thawng hin na chan cu na tawiter i na kum donghnak cu na naiter. Hi caah hin nangmah cu miphun hna nihsawh awkah kan ser i ram kip serhsat awkah kan tuah. 5 A hlami ram nih si hna seh, a naimi ram nih si hna seh, na thangchiatnak ruangah le ningcang lopi i khua na saknak ruangah, an in nihsawh lai. 6 Nangmah chungah hin Israel mi bawi vialte hna nih an thil ti khawhnak cu thisen chuahnak caah an hman; 7 mi nih an nu le an pa hna kha an serhsat hna, ramdangmi kha an hrem hna i ngakòah le nuhmei kha an rial hna. Ref 22.7: Exo 20.12; 22.21-22; Deu 5.16; 24.17 8 Ka ca i a thiangmi thil kha zei ah nan rel hna lo i ka sabbath kha nan buar hna. Ref 22.8: Lev 19.30; 26.2 9 Jerusalem, nangmah chungah hin bia lanhtu hna nih thisen chuahnak ding caah khan rian an òuan i nangmah chungah hin khuahrumbo rawl danghnak i rawl a eimi hna le zuanzamnak a tuahmi hna kha an um. 10 Nangmah chungah hin mi a cheukhat nih an pale kha an ningzahnak an langhter hna i nu kha nuphung an hngalh lioah an buar hna; Ref 22.10-11: Lev 18.7-20 11 cun a cheu nih an innpale nupi kha an thurhhnawmh hna i an fapale nupi hna sinah khan an i buar; an pale fanu hrimhrim, an farle kha an sual hna. 12 Nangmah chungah hin mi nih thisen chuahnak caah ziknawh an ei i docawi tikah dongtanh le a karh an lak hna. Nannih nih i miak duh ruangah nan hawile kha nan hrem hna i keimah cu nan ka philh; tiah Bawipa Pathian nih a ti. Ref 22.12: Exo 22.25; 23.8; Lev 25.36-37; Deu 16.19; 23.19

13 “Cucaah zohhmanh u, a ding loin nan lakmi miaknak kha le nan khua chung i thisen chuahnak kha thinhun in ka kuttum in ka thongh lai. 14 Nannih cu kan tongh hna tikah nan òhawnnak thazang siseh, nan lungòhawnnak siseh, an dir kho lai maw? Bawipa nih hi bia cu ka chim cang i ka tuah lai. 15 Nannih cu miphun hna lakah khan kan òhek hna lai i ram hlapi ah kan dawi dih hna lai; cuticun nannih cu nan i thurhhnawmhnak khan kan thianh hna lai. 16 Miphun hna mit hmuh ah kan vamh hna lai i keimah cu Bawipa ka si kha nan ka hngalh lai,” tiah a ti.

17-18 Mah hihi Bawipa nih ka sinah a chimmi bia an si. A ka thawh i, “Mipa, Israel mi vialte cu ka caah ngun thianglo an si ko, an ngun cu dar le canphio le thir le suan he aa cawh dih. 19 Cucaah hihi Bawipa bia an si: Nannih cu cawhmi ah nan i can caah 20 ngun le dar le thir le suan le canphio aa cawhmi hlumpi cu thir titnak um chungah mei in linh i titter awkah khumh a si bangin nannih cu Jerusalem khua ah kan pumh hna lai. Cuticun ka thinhun le ka thinlinh in kan pumh hna lai i khika ah kan chiah hna lai i kan tit hna lai. 21 Nannih cu kan pumh hna lai i ka thinhunnak mei cu ka chem lai i a chungah nan ti dih lai. 22 Nannih cu thir titnak um chungah ngun an tit bantukin kan tit hna lai i nan cungah Bawipa nih ka thinhunnak ka langh kha nannih nih nan hngalh lai,” a ti.

23-24 Hihi Bawipa nih ka sinah a chimmi bia an si. A ka thawh i, “Mipa, Jerusalem cu thawh law, nangmah cu ruah nih a surh lomi ram bantuk na si; thinhunnak caan lioah na cungah ruah zeihmanh a sur lai lo, tiah chim. 25 A chung i a ummi bawi hna cu, an sa sehmi an ei cuahmah lio i a ngur hluahmahmi chiandeih bantuk an si. Mi kha an seh hna i an chawhlawn le an thilri kha an chuh hna; an khua chung i nu tampi cu nuhmei ah an canter hna. 26 A tlangbawi hna nih ka phunglam kha an hrawh i ka ca i a thiangmi thil kha an thurhhnawmh hna. A thiang le a thianglo kha an thleidang hna lo i a thiang le a thianglo an i dannak kha an cawnpiak hna lo. Ka sabbath hna kha zei ah an rel hna lo i kei cu an lakah hmaizahnak hmu loin ka um. Ref 22.26: Lev 10.10 27 A chung i a bawi pawl hna cu an sa sehmi a ei cuahmahmi cenghngia hrang bantuk an si, a ding loin miaknak hmuhnak caah khan mi thisen kha an chuah i an thah hna. 28 A profet hna nih hi òhat lonak vialte cu an lih in langhnak an hmuhmi le an hrokhrawl bia in sirang an nalh hna i Bawipa nih zei bia a chim lo nain Bawipa nih hitihin a ti, tiah an ti. 29 Zapi kha mipuar le mifir an si, vanchiami le sifakmi kha an serhsat hna i ramdangmi cungah ding loin khua an sa i an puar. 30 Ram cu rawk lo dingin chanhtu dingah, a pemnak ah cun ka hmaiah a dir kho i a phit khotu ding annih lakah ka kawl hna i ahohmanh ka hmu hna lo. 31 An cungah ka thinhunnak kha ka bungh i ka thinlinhnak mei chungah khan annih cu ka hrawh cikcek hna. Cuticun annih nih hmuh awkah an i tlakmi dantatnak cu an cungah ka tlunter,” tiah Bawipa Pathian nih a ti.